ହାଇଦ୍ରାବାଦ: ଟିମ୍ ଇଣ୍ଡିଆ ଟି୨୦ ବିଶ୍ବକପ୍ ୨୦୨୪ ଚମ୍ପିଆନ ହେବାପରେ ଖୁସିରେ ଆତ୍ମହରା ଭାରତବାସୀ । ହେଲେ ଏହାପରେ ଅପ୍ରତ୍ୟାଶିତ ଭାବରେ ଦଳର ଦୁଇ କିମ୍ବଦନ୍ତୀ ବିରାଟ କୋହଲି ଓ ରୋହିତ ଶର୍ମା ଟି୨୦ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରି ପ୍ରଶଂସକଙ୍କୁ ଝଟ୍କା ଦେଇଥିଲେ । ଆଉ ଏହାପରେ ଆଜି ଭାରତୀୟ ଫ୍ୟାନ୍ସଙ୍କୁ ଲାଗିଛି ତୃତୀୟ ଝଟ୍କା । ଭାରତୀୟ ଷ୍ଟାର ଅଲରାଉଣ୍ଡର ରବୀନ୍ଦ୍ର ଜାଡେଜା ମଧ୍ୟ ଟି୨୦ ଅନ୍ତର୍ଜାତୀୟ କ୍ରିକେଟରୁ ଆଜି ନିଜର ଅବସର ନେଇ ଘୋଷଣା କରିଛନ୍ତି । ନିଜ ସୋସିଆଲ ମିଡିଆରେ ଭାବପୂର୍ଣ୍ଣ ପୋଷ୍ଟ କରି ଟି୨୦ ଅନ୍ତର୍ଜାତୀୟ କ୍ରିକେଟରୁ ନିଜର ସନ୍ୟାସ ଘୋଷଣା କରିଛନ୍ତି ଜାଡେଜା । ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏକ୍ସରେ ପୋଷ୍ଟ କରି ଜାଡେଜାଙ୍କୁ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି ।
ଜାଡେଜାଙ୍କ ଟି୨୦ କ୍ୟାରିୟର: ୨୦୦୯ରେ ଅନ୍ତର୍ଜାତୀୟ ଟି୨୦ରେ ପ୍ରବେଶ କରିଥିଲେ ଜାଡେଜା । ଭାରତ ପାଇଁ ପ୍ରଥମ ଟି୨୦ ମ୍ୟାଚ୍ ଶ୍ରୀଲଙ୍କା ବିପକ୍ଷରେ ଖେଳିଥିଲେ ରବୀନ୍ଦ୍ର ଜାଡେଜା । ଏହି ମ୍ୟାଚ୍ରେ ସେ ୪ ଓଭର ବୋଲିଂ କରି ୨୯ ରନ ବ୍ୟୟ କରିଥିବାବେଳେ କୌଣସି ୱିକେଟ୍ ହାତେଇବାରେ ସକ୍ଷମ ହୋଇନଥିଲେ । ସେହି ମ୍ୟାଚ୍ରେ ବ୍ୟାଟିଂ କରି ସେ ୭ ବଲରୁ କେବଳ ୫ ରନ ହିଁ କରିପାରିଥିଲେ । ତେବେ ତାଙ୍କ ସମ୍ପୂର୍ଣ୍ଣ ଅନ୍ତର୍ଜାତୀୟ ଟି୨୦ କ୍ୟାରିୟରରେ ଜାଡେଜା ୭୪ ମ୍ୟାଚ୍ ଖେଳିଥିବାବେଳେ ୪୧ ଇନିଂସ୍ରେ ଭାରତ ପାଇଁ ବ୍ୟାଟିଂ କରିବାର ସୁଯୋଗ ପାଇଥିଲେ । ଏଥିରେ ସେ ମୋଟ ୫୧୫ ରନ ସ୍କୋର କରିଛନ୍ତି । ସେହିଭଳି ୭୪ ମ୍ୟାଚ୍ରୁ ଜାଡେଜା ୭୧ ପାଳିରେ ବୋଲିଂ କରିବାର ସୁଯୋଗ ପାଇଛନ୍ତି । ଏଥିରୁ ସେ ୫୪ ୱିକେଟ୍ ଅକ୍ତିଆର କରିଛନ୍ତି ।
ଏହା ମଧ୍ୟ ପଢ଼ନ୍ତୁ...ଏକ ଯୁଗର ଅବସାନ, T20ରୁ ସନ୍ନ୍ୟାସ ନେଲେ କିମ୍ବଦନ୍ତୀ ରୋହିତ-କୋହଲି - T20 World Cup 2024
ଶନିବାର ବ୍ରିଜଟାଉନରେ ଖେଳାଯାଇଥିବା ଟି୨୦ ବିଶ୍ବକପ୍ ୨୦୨୪ ଫାଇନାଲ୍ ମ୍ୟାଚ୍ରେ ଦକ୍ଷିଣ ଆଫ୍ରିକା ବିପକ୍ଷରେ ଜାଡେଜା ନିଜର ଶେଷ ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିଥିଲେ । ଯଦିଓ ସେ ଏହା ପୂର୍ବରୁ ଘୋଷଣା କରିନଥିଲେ, ହେଲେ ଗତକାଲି ବିରାଟ କୋହଲି ଓ ରୋହିତ ଶର୍ମା ଟି୨୦ କ୍ରିକେଟରୁ ଅବସର ଘୋଷଣା କରିବା ପରେ ଆଜି ଜାଡେଜା ମଧ୍ୟ ସମାନ ନିଷ୍ପତ୍ତି ନେଇ ଘୋଷଣା କରିଛନ୍ତି । ତେବେ ନିଜ ଶେଷ ମ୍ୟାଚ୍ରେ ଜାଡେଜା ଦକ୍ଷିଣ ଆଫ୍ରିକା ବିପକ୍ଷରେ ଗୋଟିଏ ଓଭର ବୋଲିଂ କରି ୧୨ ରନ ବ୍ୟୟ କରିଥିବାବେଳେ କୌଣସି ୱିକେଟ ଦଖଲ କରିପାରିନଥିଲେ ।
Dear @imjadeja,
— Narendra Modi (@narendramodi) June 30, 2024
You have performed exceptionally as an all-rounder. Cricket lovers admire your stylish stroke play, spin and superb fielding. Thank you for the enthralling T20 performances over the years. My best wishes for your endeavours ahead.
ଶୁଭେଚ୍ଛା ଜଣାଇଲେ ମୋଦି: ରବୀନ୍ଦ୍ର ଜାଡେଜା ଅବସର ନେଇ ଘୋଷଣା କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ଏକ୍ସ ହ୍ୟାଣ୍ଡେଲରେ ଜାଡେଜାଙ୍କ ପାଇଁ ଏକ ସ୍ବତନ୍ତ୍ର ପୋଷ୍ଟ କରିଛନ୍ତି । ପ୍ରଧାନମନ୍ତ୍ରୀ ଲେଖିଛନ୍ତି, "ପ୍ରିୟ ଜାଡେଜା, ତୁମେ ଅଲରାଉଣ୍ଡର ଭାବରେ ଅତୁଳନୀୟ ପ୍ରଦର୍ଶନ କରିଛ । କ୍ରିକେଟ ପ୍ରେମୀମାନେ ତୁମ ଷ୍ଟାଇଲିଷ୍ଟ ଷ୍ଟ୍ରୋକ ପ୍ଲେ, ସ୍ପିନ ବୋଲିଂ ଓ ସୁପର ଫିଲ୍ଡିଂକୁ ପ୍ରଶଂସା କରନ୍ତି । ଅନ୍ତର୍ଜାତୀୟ ଟି୨୦ କ୍ରିକେଟରେ ବର୍ଷ ବର୍ଷ ଧରି ଚିତ୍ତାକର୍ଷକ ପ୍ରଦର୍ଶନ ପାଇଁ ଧନ୍ୟବାଦ । ଭବିଷ୍ୟତ ପାଇଁ ତୁମକୁ ମୁଁ ଶୁଭେଚ୍ଛା ଜଣାଉଛି ।"
ବ୍ୟୁରୋ ରିପୋର୍ଟ, ଇଟିଭି ଭାରତ
