ହାଇଦ୍ରାବାଦ: ଭାରତର ବିଲିଅନାର ମୁକେଶ ଆମ୍ବାନୀଙ୍କ ପରେ ଭାରତୀୟ କ୍ରିକେଟ ଲିଗ୍ (ଆଇପିଏଲ୍)ରେ ଏଣ୍ଟ୍ରି ମାରିବେ ଆଉ ଜଣେ ବିଶିଷ୍ଟ ଆରବ ପତି । ଗୁଜୁରାଟ ଟାଇଟନ୍ସ ଉପରେ ବର୍ତ୍ତମାନ ଆଖି ପକାଇଛନ୍ତି ଇଣ୍ଡଷ୍ଟ୍ରିଆଲିଷ୍ଟ ଗୌତମ ଆଦାନୀ । ବିଶ୍ବର ସବୁଠୁ ଦାମୀ କ୍ରିକେଟ ଲିଗ୍ ହେଉଛି ଆଇପିଏଲ୍ ଏବଂ ଏଥିରେ ସାମିଲ ହେବାକୁ କ୍ରିକେଟରଙ୍କ କ୍ରେଜ ଦିନକୁ ଦିନ ବଢୁଥିବା ବେଳେ ବିଜନେସ ଟାଇକୁନ ମଧ୍ୟ ପଛରେ ନାହିଁନ୍ତି । ମାର୍କେଟିଂ, ସ୍ପନ୍ସରସିପ୍ ପାଇଁ ଦିନକୁ ଦିନ ଆଇପିଏଲ୍ ସେୟାର ଭାଲ୍ୟୁ ଏବଂ ବ୍ରାଣ୍ଡ ଭାଲ୍ୟୁ ମଧ୍ୟ ଆକାଶ ଛୁଆଁ ହେବାରେ ଲାଗିଛି ।
ଜାତୀୟ ମିଡିଆ ରିପୋର୍ଟ ମୁତାବକ, ଆଦାନୀ ଗ୍ରୁପ ଏବଂ ଟରେଣ୍ଟ ଗ୍ରୁପ ବର୍ତ୍ତମାନ ଆଇପିଏଲର ନୂଆ ଟିମ୍ ତଥା ଗୋଟିଏ ଥରର ଟାଇଟଲ ବିଜୟୀ ଟିମ୍ ଗୁଜୁରାଟ ଟାଇଟନ୍ସର ଅଧିକାଂଶ ସେୟାର କିଣିବା ପାଇଁ କଥାବର୍ତ୍ତା ଆରମ୍ଭ କରିଛନ୍ତି । ଏପରିକି ବର୍ତ୍ତମାନ ଗୁଜୁରାଟ ଟାଇଟନ୍ସର ଅଧିକାଂଶ ସେୟାର ପାଖରେ ରଖିଥିବା ସିଭିସି କ୍ୟାପିଟାଲ ପାର୍ଟନର୍ସ ସେୟାର ବିକିବା ନେଇ ଚର୍ଚ୍ଚା ଆରମ୍ଭ ହୋଇଛି । ତେବେ ବିସିସିଆଇର ଲକ୍-ଇନ୍ ପିରିୟଡ ନିୟମ ଅନୁଯାୟୀ ବର୍ତ୍ତମାନ ଫେବୃଆରୀ 2025 ପର୍ଯ୍ୟନ୍ତ କୌଣସି ନୂଆ ଟିମର ସେୟାର କୌଣସି କମ୍ପାନୀ କିଣିପାରିବେ ନାହିଁ । ଏହି ଟାଇମ୍ ଫ୍ରେମ ପରେ ଗୁଜୁରାଟ ଟାଇଟନ୍ସ ସେୟାର ଆଦାନୀ କିଣିବେ ବୋଲି ଚର୍ଚ୍ଚା ଆରମ୍ଭ ହୋଇଛି ।
ଗୁଜୁରାଟ ଟାଇଟନ୍ସ ବ୍ରାଣ୍ଡ ଭାଲ୍ୟୁ-
ଏହି ଟିମର ବ୍ରାଣ୍ଡ ଭାଲ୍ୟୁ ରହିଛି ଡଲାର ଏକ ବିଲିଅନରୁ ଡଲାର 1.5 ବିଲିଅନ ମଧ୍ୟରେ । ସିଭିସି କ୍ୟାପିଟାଲ ପାର୍ଟନର୍ସ 2021ରେ 5,625 କୋଟିରେ ଏହି ଟିମ୍ କିଣିଥିଲା । ଏହି ଟିମ ମାତ୍ର 3 ବର୍ଷ ପୁରୁଣା ।
ଆଦାନୀଙ୍କ କ୍ରିକେଟରେ ନିବେଶ-
ପୂର୍ବରୁ ଆଦାନୀ ଗ୍ରୁପ୍ ମହିଳା କ୍ରିକେଟ ଲିଗ (WPL) ଏବଂ ଦୁବାଇ ଇଣ୍ଟରନ୍ୟାସନାଲ ଲିଗରେ ନିବେଶ କରିସାରିଛି । 2023ରେ ଆଦାନୀ ଗ୍ରୁପ୍ WPL ଅହମ୍ମଦାବାଦ ଟିମକୁ 1289 କୋଟିରେ କିଣିସାରିଛି ।
ଆଇପିଏଲରେ ରହିଛି ଆମ୍ବାନୀଙ୍କ ଟିମ୍ -
ମୁମ୍ବାଇ ଇଣ୍ଡିଆନ୍ସ ଟିମ୍ ଆଇପିଏଲ ଇତିହାସରେ ସବୁଠୁ ସଫଳତମ ଦଳ । ଏହି ଟିମ୍ 5 ଥର ଆଇପିଏଲ ଚାମ୍ପିଅନ ହୋଇସାରିଛି । ଟିମର ବ୍ରାଣ୍ଡ ଭାଲ୍ୟୁ ଚେନ୍ନାଇ ଟିମ୍ ତଳେ ରହିଛି ଏବଂ ଫ୍ୟାନ୍ସଙ୍କ ସଂଖ୍ୟା ଦିନକୁ ଦିନ ବଢୁଛି । ବର୍ତ୍ତମାନ ମୁମ୍ବାଇ ଟିମର ଅଧିନାୟକ ରହିଛନ୍ତି ହାର୍ଦ୍ଦିକ ପାଣ୍ଡ୍ୟା, ଯିଏ ଏହା ପୂର୍ବରୁ ଗୁଜୁରାଟ ଟିମର ଅଧିନାୟକ ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
