ଭୁବନେଶ୍ବର: ହକି ତାରକା ଅମିତ ରୋହିଦାସଙ୍କୁ ସମ୍ବର୍ଦ୍ଧିତ କରିଛନ୍ତି ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅମିତ ଓଡ଼ିଶାର ଗର୍ବ ବୋଲି କହିଛନ୍ତି ନବୀନ । ପରବର୍ତ୍ତୀ ଅଲିମ୍ପିକରେ ଭାରତୀୟ ହକି ଦଳ ପାଇଁ ସୁନା ପଦକ କାମନା କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ । ଭାରତୀୟ ହକି ଦଳ ନବୀନ ପଟ୍ଟନାୟକଙ୍କ ନିକଟରେ କୃତଜ୍ଞ ବୋଲି ଅମିତ କହିଛନ୍ତି ।
![ହକି ତାରକା ଅମିତଙ୍କୁ ସମ୍ବର୍ଦ୍ଧିତ କଲେ ନବୀନ](https://etvbharatimages.akamaized.net/etvbharat/prod-images/16-08-2024/od-bbsr-05-amit-meet-naveen-7209787_16082024183253_1608f_1723813373_904.jpg)
'ଅମିତ ଓଡ଼ିଶାର ଗର୍ବ'
ଭାରତୀୟ ହକି ଦଳର ଓଡ଼ିଆ ଖେଳାଳି ଅମିତ ରୋହି ଦାସଙ୍କୁ ଆଜି ବିରୋଧୀ ଦଳ ନେତା ନବୀନ ପଟ୍ଟନାୟକ ଭେଟିଛନ୍ତି । ନବୀନ ନିବାସରେ ଅମିତଙ୍କୁ ସମ୍ବର୍ଦ୍ଧିତ କରିଛନ୍ତି ନବୀନ । ଅମିତଙ୍କୁ ରୁପା ତାରକସି କାମର ରଥା ରୁଢ଼ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ପ୍ରତିମୂର୍ତ୍ତି ଏବଂ ଉତ୍ତରୀୟ ଦେଇ ନବୀନ ସମ୍ବର୍ଦ୍ଧିତ କରିଛନ୍ତି । ଅମିତଙ୍କୁ ଓଡିଶାର ଗର୍ବ ଭାବରେ ନବୀନ ବର୍ଣ୍ଣନା କରିଛନ୍ତି । ଏହା ସହ ଯୁବ ପିଢ଼ିଙ୍କୁ ତାଙ୍କର ସଫଳତା ପ୍ରେରଣା ଦେଇ ଚାଲିବ ବୋଲି କହିଛନ୍ତି ।
![ହକି ତାରକା ଅମିତଙ୍କୁ ସମ୍ବର୍ଦ୍ଧିତ କଲେ ନବୀନ](https://etvbharatimages.akamaized.net/etvbharat/prod-images/16-08-2024/od-bbsr-05-amit-meet-naveen-7209787_16082024183253_1608f_1723813373_1045.jpg)
ହକି ଦଳକୁ ପ୍ରାୟୋଜିତ କରିଥିଲା ନବୀନ ସରକାର:-
ନବୀନ ସରକାର ସମୟରେ ଓଡ଼ିଶା ଭାରତୀୟ ହକି ଦଳକୁ ପ୍ରାୟୋଜିତ ହୋଇଥିଲା । ଏହା ପରେ ଲଗାତାର ଦୁଇଟି ଅଲିମ୍ପିକରେ ଦଳ ଦୁଇ ଦୁଇଟି ବ୍ରୋଞ୍ଜ ପଦକ ପାଇଛି । ଦେଶର ଗୌରବ ବୃଦ୍ଧି କରିଥିବାରୁ ନବୀନ ଅମିତଙ୍କୁ ଓ ଭାରତୀୟ ହକି ଦଳକୁ ଅଭିନନ୍ଦନ ଜଣାଇଛନ୍ତି । ଆଗାମୀ ଲସ ଏଞ୍ଜେଲସ ଅଲିମ୍ପିକରେ ଭାରତୀୟ ଦଳ ଆହୁରି ଭଲ ପ୍ରଦର୍ଶନ କରି ସୁନା ପଦକ ଜିତିବ ବୋଲି ନବୀନ ଦୃଢ଼ ଆଶା ବ୍ୟକ୍ତ କରିଛନ୍ତି ।
![ହକି ତାରକା ଅମିତଙ୍କୁ ସମ୍ବର୍ଦ୍ଧିତ କଲେ ନବୀନ](https://etvbharatimages.akamaized.net/etvbharat/prod-images/16-08-2024/od-bbsr-05-amit-meet-naveen-7209787_16082024183253_1608f_1723813373_1030.jpg)
ନବୀନଙ୍କୁ ଧନ୍ୟବାଦ ଜଣାଇଲେ ଅମିତ:-
ଅମିତ ସମ୍ବର୍ଦ୍ଧନା ପାଇଁ ନବୀନଙ୍କୁ ଧନ୍ୟବାଦ ଜଣାଇଛନ୍ତି । ନବୀନ ପଟ୍ଟନାୟକଙ୍କୁ ସେ ପ୍ୟାରିସ ଅଲିମ୍ପିକର ମାସକୋଟ୍ ପ୍ରଦାନ କରିଛନ୍ତି । ଏହା ସହ ଭାରତୀୟ ହକି ଦଳର ଏହି ସଫଳତାରେ ନବୀନ ପଟ୍ଟନାୟକଙ୍କ ପ୍ରୋତ୍ସାହନ ପାଇଁ ଦଳ ପକ୍ଷରୁ ଅମିତ କୃତଜ୍ଞତା ଜଣାଇଛନ୍ତି । ବିରୋଧୀ ଦଳ ନେତାଙ୍କ ବ୍ୟକ୍ତିଗତ ସଚିବ ଆଦିତ୍ୟ ମହାପାତ୍ର ଉପସ୍ଥିତ ଥିଲେ ।
![ହକି ତାରକା ଅମିତଙ୍କୁ ସମ୍ବର୍ଦ୍ଧିତ କଲେ ନବୀନ](https://etvbharatimages.akamaized.net/etvbharat/prod-images/16-08-2024/od-bbsr-05-amit-meet-naveen-7209787_16082024183253_1608f_1723813373_206.jpg)
ପ୍ୟାରିସ ଅଲିମ୍ପିକ୍ସରେ ଭାରତୀୟ ହକି ଟିମକୁ ବ୍ରୋଞ୍ଜ:-
52 ବର୍ଷ ପରେ ଇତିହାସ ରଚିଲା ଭାରତୀୟ ହକି ଟିମ୍ । ସ୍ପେନକୁ ହରାଇ ଜିତିଲା ଐତିହାସିକ ବ୍ରୋଞ୍ଜ ମେଡାଲ । ଏହା ପୂର୍ବରୁ ଭାରତ 1972ରେ ଲଗାତାର ଭାବେ ଅଲିମ୍ପିକ୍ସରେ ପଦକ ଜିତିଥିଲା । ଗତ ଟୋକିଓ ଅଲିମ୍ପିକ୍ସରେ ଭାରତ ଜର୍ମାନୀକୁ ହରାଇ ବ୍ରୋଞ୍ଜ ଜିତିଥିଲା ।
ଇଟିଭି ଭାରତ, ଭୁବନେଶ୍ବର