ମୁମ୍ବାଇ : ଗତ ବର୍ଷ ଅକ୍ଟୋବର-ନଭେମ୍ବରରେ ଭାରତରେ ଅନୁଷ୍ଠିତ ODI ବିଶ୍ବକପ 2023 ପରଠାରୁ ଭାରତର ଷ୍ଟାର ପେସର ମହମ୍ମଦ ଶାମି କ୍ରିକେଟଠାରୁ ଦୂରରେ ରହିଛନ୍ତି । ଏହି ବିଶ୍ବକପ ସମୟରେ ଆଣ୍ଠୁରେ ଆଘାତ ଲାଗିବାରୁ ଭାରତୀୟ ଦଳଠାରୁ ଦୂରରେ ଅଛନ୍ତି ଶାମି । ଏପରିକି ଚଳିତ ବର୍ଷ ଟି20 ବିଶ୍ବକପ୍ କିମ୍ବା ଆଇପିଏଲ୍ରେ ମଧ୍ୟ ଶାମିଙ୍କ ଅନୁପସ୍ଥିତି ଅନୁଭବ କରିଥିଲେ ପ୍ରଶଂସକ । ତେବେ ବର୍ତ୍ତମାନ ପୁନର୍ବାସ ପାଇଁ ବେଙ୍ଗାଲୁରୁର ନ୍ୟାସନାଲ କ୍ରିକେଟ୍ ଏକାଡେମୀ (ଏନସିଏ)ରେ ଅଛନ୍ତି ଶାମି । ଏହାରି ଭିତରେ ବିସିସିଆଇ ସଚିବ ଜୟ ଶାହ ଦଳକୁ ଶାମିଙ୍କ ଫେରିବା ନେଇ ଏକ ବଡ଼ ସୂଚନା ଦେଇଛନ୍ତି ।
Mohammad Shami with team Nepal at the NCA in Bengaluru.
— Mufaddal Vohra (@mufaddal_vohra) August 18, 2024
- Great gesture by Shami...!!! 🫡❤️ pic.twitter.com/eM3MjBveVL
ଜୟ ଶାହ ଦେଲେ ବଡ଼ ଅପ୍ଡେଟ୍ :-
ବିସିସିଆଇ ସଚିବ ଜୟ ଶାହ ସ୍ପଷ୍ଟ କରିଛନ୍ତି ଯେ ବର୍ଡର ଗାଭାସ୍କର ଟ୍ରଫି ସମୟରେ ଅଷ୍ଟ୍ରେଲିଆ ଗସ୍ତ ପାଇଁ ଅଭିଜ୍ଞ ଦ୍ରୁତ ବୋଲର ମହମ୍ମଦ ଶାମି ଉପଲବ୍ଧ ହେବେ । ଅଷ୍ଟ୍ରେଲିଆ ଗସ୍ତ ପାଇଁ ଦଳର ପ୍ରସ୍ତୁତି ବିଷୟରେ ଜୟ ଶାହା ଟାଇମ୍ସ ଅଫ୍ ଇଣ୍ଡିଆକୁ ପ୍ରତିକ୍ରିୟା ଦେଇ କହିଛନ୍ତି, "ଆମ ଦଳ ପୂର୍ବରୁ ଭଲ ଭାବରେ ପ୍ରସ୍ତୁତ ହୋଇସାରିଛି । ଆମେ ଯସପ୍ରୀତ ବୁମରାଙ୍କୁ କିଛି ସମୟ ପାଇଁ ବିଶ୍ରାମ ଦେଇଛୁ । ମହମ୍ମଦ ଶାମି ମଧ୍ୟ ଶୀଘ୍ର ଫିଟ୍ ହେବେ ବୋଲି ଆଶା କରାଯାଉଛି । ଏହା ବର୍ତ୍ତମାନ ଏକ ଅଭିଜ୍ଞ ଭାରତୀୟ ଦଳ । ରୋହିତ ଏବଂ କୋହଲିଙ୍କ ପରି ବରିଷ୍ଠ ଖେଳାଳିମାନେ ଫିଟ୍ ଅଛନ୍ତି । ତେବେ ଶାମି ଅଷ୍ଟ୍ରେଲିଆରେ ରହିବେ । କାରଣ ସେ ଅଭିଜ୍ଞ ଏବଂ ଅଷ୍ଟ୍ରେଲିଆରେ ତାଙ୍କର ଆବଶ୍ୟକତା ଆମେ ଆବଶ୍ୟକ କରିବୁ ।"
ଏମିତି କହିଲେ ଅଗରକର :-
ବିସିସିଆଇର ମୁଖ୍ୟ ଚୟନକର୍ତ୍ତା ଅଜିତ ଅଗରକର ଏହା ପୂର୍ବରୁ କହିଥିଲେ, "33 ବର୍ଷୀୟ ଶାମି ବାଂଲାଦେଶ ବିପକ୍ଷ ଟେଷ୍ଟ ସିରିଜକୁ ଫେରିପାରନ୍ତି । କିନ୍ତୁ ବର୍ତ୍ତମାନ ଖବର ହେଉଛି ଯେ ସେ ରଣଜୀ ଟ୍ରଫି ମାଧ୍ୟମରେ ମ୍ୟାଚ୍ ମୋଡ୍କୁ ପ୍ରବେଶ କରିବେ ।"
CAB ଅଧ୍ୟକ୍ଷ ଶାମିଙ୍କ ପ୍ରତ୍ଯାବର୍ତ୍ତନ ନେଇ ଏମିତି କହିଲେ :-
ଏହାପୂର୍ବରୁ କ୍ରିକେଟ୍ ଆସୋସିଏସନ୍ ଅଫ୍ ବେଙ୍ଗଲ (CAB) ସଭାପତି ସ୍ନେହାଶିଶ ଗାଙ୍ଗୁଲି ଶାମିଙ୍କ ମୈଦାନକୁ ପ୍ରତ୍ୟାବର୍ତ୍ତନ ନେଇ ପ୍ରତିକ୍ରିୟା ରଖିଥିଲେ । ସେ କହିଥିଲେ ଯେ ଯଦି ଶାମିଙ୍କୁ ଅଷ୍ଟ୍ରେଲିଆ ସିରିଜ୍ ପାଇଁ ଟିମ୍ ଇଣ୍ଡିଆରେ ଯୋଗଦେବାକୁ ପଡେ, ତେବେ ତାଙ୍କୁ ରଣଜୀ ଟ୍ରଫି ମାଧ୍ୟମରେ ନିଜର ଫିଟନେସ୍ ପ୍ରମାଣ କରିବାକୁ ପଡିବ । ଗାଙ୍ଗୁଲି କହିଥିଲେ, "ସେ (ଶାମି) ଦଳ ସହିତ ଅଷ୍ଟ୍ରେଲିଆ ଯାତ୍ରା କରିବାକୁ ଚାହୁଁଛନ୍ତି । କିନ୍ତୁ ନିଜକୁ ପ୍ରମାଣ କରିବାକୁ ତାଙ୍କୁ ରଣଜୀ ଟ୍ରଫି ଖେଳିବାକୁ ପଡ଼ିବ ।"
ଏବେ ଦେଖିବାକୁ ବାକି ରହିଲା ଯେ, ଶାମିଙ୍କ ପ୍ରଶଂସକମାନେ ତାଙ୍କୁ ପୁଣିଥରେ ପଡ଼ିଆରେ ବୋଲିଂ କରୁଥିବାର କେବେ ଦେଖିପାରିବେ । ଟିମ୍ ଇଣ୍ଡିଆକୁ ପ୍ରତ୍ୟାବର୍ତ୍ତନ କରିବାକୁ ଶାମି ମଧ୍ୟ ବହୁତ ଉତ୍ସାହର ସହ ଅପେକ୍ଷା କରିଛନ୍ତି ଏବଂ ଏନସିଏରେ କଠିନ ପରିଶ୍ରମ କରୁଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
