ପୁରୀ: ପ୍ରାର୍ଥୀ ପରିବର୍ତ୍ତନ ପରେ ଜୋରଦାର ହଙ୍ଗାମା । ପୁରୀ ସଦର ବିଧାନସଭା ଆସନ ପାଇଁ ପ୍ରାର୍ଥୀ ପରିବର୍ତ୍ତନ ପରେ କଂଗ୍ରେସ ଶିବିରରେ ବିରୋଧାଭାସ ତେଜିଛି । ଏନେଇ ଅସନ୍ତୁଷ୍ଟ କର୍ମୀମାନେ ପୁରୀ ଜିଲ୍ଲା କଂଗ୍ରେସ ଅଫିସରେ ବ୍ୟାପକ ଭଙ୍ଗାରୁଜା କରିଛନ୍ତି । ସୂଚନା ଅନୁସାର, ପୁରୀ ସଦର ବିଧାନସଭା ଆସନ ପାଇଁ ପ୍ରାର୍ଥୀ ହୋଇଥିବା ସୁଜିତ ମହାପାତ୍ରଙ୍କ ଟିକଟ କଟାଯାଇ ଉମାବଲ୍ଲଭ ରଥଙ୍କୁ ଟିକଟ ପ୍ରଦାନ କରାଯାଇଛି । କଂଗ୍ରେସର କିଛି ଶୀର୍ଷ ନେତା ଚଞ୍ଚକତା କରି ଯୁବନେତା ସୁଜିତ ମହାପାତ୍ରଙ୍କ ଟିକଟ କାଟି ଦେଇଥିବା ଅଭିଯୋଗ ଆଣି ହୋହଲ୍ଲା ଓ ନାରାବାଜି କରିଛନ୍ତି ସୁଜିତଙ୍କ ସମର୍ଥକ ।
ଏହାକୁ ନେଇ ଅସନ୍ତୋଷ ଥିବା କଂଗ୍ରେସ କର୍ମୀମାନେ ଜିଲ୍ଲା କଂଗ୍ରେସ ଭବନରେ ପଶି ବ୍ୟାପକ ଭଙ୍ଗାରୁଜା କରିଥିବା ଦେଖିବାକୁ ମିଳିଛି । ସମର୍ଥକଙ୍କ ଅଭିଯୋଗ ଅନୁସାରେ, "କଂଗ୍ରେସର କିଛି ଶୀର୍ଷ ନେତା ଚଞ୍ଚକତା କରି ଯୁବନେତା ସୁଜିତ ମହାପାତ୍ରଙ୍କ ଟିକଟ କାଟି ଦେଇଛନ୍ତି। ଏହାଦ୍ବାରା ଯୁବ କଂଗ୍ରେସ କର୍ମୀ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ସୁଜିତ ମହାପାତ୍ର ପ୍ରାର୍ଥୀ ହେବା ପୁରୀରେ କଂଗ୍ରେସ କର୍ମୀଙ୍କ ମଧ୍ୟରେ ବ୍ୟାପକ ଉତ୍ସାହ ଦେଖାଯାଇଥିଲା । ଆଗାମୀ ନିର୍ବାଚନରେ ଜୋରଦାର ଲଢେଇ ପାଇଁ ସବୁ ନେତା ଓ କର୍ମୀ ପ୍ରସ୍ତୁତ ରହିଥିଲେ । ସୁଜିତ ମଧ୍ୟ ଜୋରଦାର ପ୍ରସ୍ତୁତି ଆରମ୍ଭ କରି ଦେଇଥିଲେ । ହେଲେ କଂଗ୍ରେସର କିଛି ସ୍ବାର୍ଥବାଦୀ ନେତା ସୁଜିତଙ୍କ ଟିକଟ କାଟି ଜନସମର୍ଥନ ନଥିବା ଏବଂ କଂଗ୍ରେସ କର୍ମକର୍ତ୍ତାଙ୍କ ସହ କୌଣସି ସମ୍ପର୍କ ନଥିବା ଉମାବଲ୍ଲଭ ରଥଙ୍କୁ ଟିକଟ ଦେଇଛନ୍ତି ।"
"ଏହାଦ୍ବାରା ପୁରୀରେ କଂଗ୍ରେସ ଦଳର ବ୍ୟାପକ କ୍ଷତି ହେବା ସହ ନିର୍ବାଚନରେ ଦଳ ଶୋଚନୀୟ ପରାଜୟ କରିବ" ବୋଲି ସୁଜିତଙ୍କ ସମର୍ଥକ କହିଛନ୍ତି । ତେବେ ଏହି ଘଟଣାକୁ ପ୍ରତିବାଦ କରି କଂଗ୍ରେସ ଭବନରେ ବ୍ୟାପକ ଭଙ୍ଗାରୁଜା କରିଛନ୍ତି ସୁଜିତଙ୍କ ସମର୍ଥକ । ସେପଟେ ଗତକାଲି (ଶନିବାର) ସୁଜିତ ମହାପାତ୍ର ପୁରୀ ବିଧାନସଭା ପ୍ରାର୍ଥୀ ଭାବେ ନାମାଙ୍କନପତ୍ର ଦାଖଲ କରିଥିଲେ । ୨୪ ଘଣ୍ଟା ନପୁରୁଣୁ ତାଙ୍କ ଟିକଟ କଟାଯାଇ ଉମାବଲ୍ଲଭ ରଥଙ୍କୁ ଟିକେଟ ଦିଆଯିବା ଦୁର୍ଭାଗ୍ୟଜନକ ବୋଲି ସୁଜିତଙ୍କ ସମର୍ଥକ କହିଛନ୍ତି ।
ଇଟିଭି ଭାରତ, ପୁରୀ
