ଭୁବନେଶ୍ବର: କଂଗ୍ରେସକୁ ମିଳିବ ନୂଆ ମୁଖିଆ । ସବୁ ଚର୍ଚ୍ଚାର ଘଟିବ ଅନ୍ତ । ଆସନ୍ତା 4 ତାରିଖରେ କଂଗ୍ରେସ ଭବନରେ ବସିବ ବଡ଼ ବୈଠକ । AICC ଦ୍ୱାରା ନିଯୁକ୍ତ ପର୍ଯ୍ୟବେକ୍ଷକ ବରିଷ୍ଠ ନେତାମାନଙ୍କ ସହ କରିବେ ଆଲୋଚନା । ସମୀକ୍ଷା ପରେ AICCକୁ ରିପୋର୍ଟ ଦିଆଯିବ । ଆଉ ସେହି ରିପୋର୍ଟ ଆଧାରରେ ଓଡିଶା ପ୍ରଦେଶ କଂଗ୍ରେସ କମିଟିର ନୂଆ ମୁଖିଆ ଘୋଷଣା ହେବେ। ଖାଲି ସେତିକି ନୁହେଁ, ୨୦୨୪ ସାଧାରଣ ନିର୍ବାଚନରେ ଦଳ କାହିଁକି ସଫଳତା ପାଇଲା ନାହିଁ ? ବିଜେଡି ପ୍ରତି ଓଡିଶାବାସୀଙ୍କ କ୍ଷୋଭର ଫାଇଦା କାହିଁକି କଂଗ୍ରେସ ନେଇ ପାରିଲା ନାହିଁ । କାହିଁକି ଭାରତୀୟ ଜନତା ପାର୍ଟି ସପକ୍ଷରେ ଜନମତ ଗଲା । ଏସବୁର ପୋଷ୍ଟମର୍ଟମ କରିବ ରାଜ୍ୟ କଂଗ୍ରେସ । ଦୁଇ ଜଣ ପର୍ଯ୍ୟବେକ୍ଷକ ସମୀକ୍ଷା କରି AICCକୁ ରିପୋର୍ଟ ପ୍ରଦାନ କରିବେ ।
ଓଡ଼ିଶା ଆସୁଛନ୍ତି ଦୁଇ କଂଗ୍ରେସ ପର୍ଯ୍ୟବେକ୍ଷକ:
ଆସନ୍ତା ୪ ଏବଂ ୫ ତାରିଖରେ କଂଗ୍ରେସ ଭବନରେ ଆଗାମୀ ନେତା ନେଇ ପ୍ରକ୍ରିୟା ଆରମ୍ଭ ହେବ । ଦୁଇ ଦିନିଆ ଓଡିଶା ଗସ୍ତରେ ଆସୁଛନ୍ତି AICC ଦ୍ୱାରା ନିଯୁକ୍ତ ଦୁଇ ଜଣିଆ ପର୍ଯ୍ୟବେକ୍ଷକ ଟିମ । ଛତିଶଗଡ଼ର ବିରୋଧୀ ଦଳ ନେତା ଚରଣ ଦାଶ ମହନ୍ତ ଏବଂ ବରିଷ୍ଠ କଂଗ୍ରେସ ନେତ୍ରୀ ମିନାକ୍ଷୀ ନଟରାଜନଙ୍କୁ ଦାଇତ୍ୱ ଦେଇଛି ଦଳ । ଉଭୟ 4 ତାରିଖରେ ଭୁବନେଶ୍ୱରରେ ପହଞ୍ଚି ରାଜ୍ୟ କଂଗ୍ରେସର ବରିଷ୍ଠ ନେତା , ପୂର୍ବତନ ପଦାଧିକାରୀ, ବ୍ଲକ ଏବଂ ଜିଲ୍ଲା ସଭାପତିଙ୍କ ସହ ବୈଠକ କରି ବିଭିନ୍ନ ପ୍ରସଙ୍ଗରେ ଆଲୋଚନା କରିବେ । କିଏ ହେବ ଆଗାମୀ ପିସିସି ସଭାପତି ? କାହାକୁ ଦାୟିତ୍ୱ ଦେଲେ ଓଡ଼ିଶାରେ କଂଗ୍ରେସ ସଂଗଠନ ଅଧିକ ସୁଦୃଢ ଏବଂ କ୍ରିୟାଶୀଳ ହେବ ? ସେନେଇ ବିଚାରବିମର୍ଷ କରିବେ ।
ଏମିତି କହିଲେ ପୂର୍ବତନ ପିସିସି ସଭାପତି:
ଏନେଇ ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି,"ଗତ ୩ ମାସରୁ ଉର୍ଦ୍ଧ୍ବ ହେବ କଂଗ୍ରେସର ସମସ୍ତ କମିଟି ଏବଂ ପଦାଧିକାରୀ ଦାୟିତ୍ୱରୁ ହଟାଇ ଦିଆଯାଇଛି । ଉଭୟ ନେତା ଆଲୋଚନା କରି କାହାକୁ ପିସିସି ସଭାପତି କଲେ ଠିକ ହେବ ଏବଂ ତୃଣମୂଳ ସ୍ତରରୁ ଉପରସ୍ତର ପର୍ଯ୍ୟନ୍ତ ଦଳ ଅଧିକ ସଂଗଠିତ ହେବ । କାହାକୁ ଦାୟିତ୍ୱ ଦେଲେ ଦଳ ଆଗକୁ ବଢ଼ିପାରିବ ? କିଏ ଦଳକୁ ଚଳଚଞ୍ଚଳ କରି ଆଗକୁ ନେଇପାରିବେ ସେନେଇ ପୁଙ୍ଖାନୁପୁଙ୍ଖ ଆଲୋଚନା କରିବେ ଉଭୟ ନେତା ।"
ଖୁବଶୀଘ୍ର ପିସିସି ସଭାପତି ଘୋଷଣା ହେବ:
ସେ ଆହୁରି ମଧ୍ୟ କହିଛନ୍ତି,"ବିଗତ ଦିନରେ ବିଜେଡି-ବିଜେପି ମିଳିତ ସରକାର ଲୋକ ଦେଖିଲେଣି । ବିଜୁ ଜନତା ଦଳକୁ ଲୋକେ ପ୍ରତ୍ୟାଖ୍ୟାନ କଲେ । ସେହିପରି ବିଜେପି ସରକାରକୁ 3 ମାସ ହେବ ଲୋକେ ଦେଖି ସାରିଲେଣି । ଆଗକୁ କଂଗ୍ରେସ ବିକଳ୍ପ ଭାବେ ଉଭା ହେବ । ଆଗାମୀ ନିର୍ବାଚନରେ କଂଗ୍ରେସ କିଭଳି ଭଲ ପ୍ରଦର୍ଶନ କରିବ ଏବଂ କାହାକୁ ଦାୟିତ୍ୱ ଦେଲେ, ଦଳ ସୁଦୃଢ ହେବ ସେନେଇ ଆଲୋଚନା ହେବ । ମୋର ଲମ୍ବା ଅଭିଜ୍ଞତାରୁ ଆଶା କରୁଛି ଆଉ AICC ବିଳମ୍ବ କରିବ ନାହିଁ । ଖୁବଶୀଘ୍ର ପିସିସି ସଭାପତି ଘୋଷଣା କରିବେ ।"
ଏହା ମଧ୍ୟ ପଢନ୍ତୁ ...ପିସିସି ପୁନଃଗଠନ ପ୍ରକ୍ରିୟା ଆରମ୍ଭ, ଓଡ଼ିଶା ଆସୁଛନ୍ତି ଚରଣ ଦାଶ ମହନ୍ତ ଏବଂ ମିନାକ୍ଷୀ ନଟରାଜନ |
୨୦୨୪ ସାଧାରଣ ନିର୍ବାଚନରେ କଂଗ୍ରେସର ପ୍ରଦର୍ଶନ:
୩୨ ଲକ୍ଷ ଭୋଟ ପାଇ ତୃତୀୟ ସ୍ଥାନରେ ଥିଲା । ସେହିପରି ବିଜୁ ଜନତା ଦଳକୁ ୯୯ ଲକ୍ଷ ଏବଂ ଭାରତୀୟ ଜନତା ପାର୍ଟିକୁ ୮୦ ଲକ୍ଷ ଭୋଟ ମିଳିଥିଲା । ଶାସକ ବିଜେପିର ୭୧ ଜଣ ବିଧାୟକ, ବିଜେଡିର ୫୪ ଜଣ ବିଧାୟକ ଜିତିଥିବାବେଳେ କଂଗ୍ରେସର ୧୪ ଜଣ ବିଧାୟକ ବିଧାନସଭାକୁ ନିର୍ବାଚିତ ହୋଇଛନ୍ତି ।
ଇଟିଭି ଭାରତ, ଭୁବନେଶ୍ବର
