ଭୁବନେଶ୍ବର: ଆସୁଛି ସାଧାରଣ ନିର୍ବାଚନ । ଯାହା ପାଇଁ ବାଜି ସାରିଛି ବିଗୁଲ । ନିଜର ହାତ ମୁଠା ଟାଣ କରିବାରେ ଲାଗିଛନ୍ତି ରାଜନୈତିକ ଦଳ । ତେବେ ବିଜେପି ବିଧାୟକ ସୂର୍ଯ୍ୟବଂଶୀ ସୁରଜ ଆଜି ଏକ ସାମ୍ମାଦିକ ସମ୍ମିଳନୀର ଆୟୋଜନ କରିଥିଲେ । ଯେଉଁଥିରେ ସେ 10 ବର୍ଷରେ ଟେଲିକମ ସେକ୍ଟରରେ ମୋଦି ସରକାର ଆଣିଥିବା ବୈପ୍ଲବିକ ପରିବର୍ତ୍ତନ ବିଷୟରେ କହିଛନ୍ତି । ମୋଦି ଦେଶରେ ଡିଜିଟାଲ କ୍ରାନ୍ତି ଆଣିଥିବା ସେ କହିଛନ୍ତି ।
ଏ ନେଇ ସେ କହିଛନ୍ତି, "ଭାରତରେ ଏବେ ସର୍ବନିମ୍ନ ମୂଲ୍ୟରେ ଇଣ୍ଟରନେଟ ଡାଟା ମିଳୁଛି । ଭାରତରେ 75 ହଜାର ଷ୍ଟାର୍ଟଅପ୍ କାର୍ଯ୍ୟକ୍ଷମ ହୋଇପାରିଛି । ଯୁବକମାନେ ଏବେ ନିଜେ ସ୍ବାବଲମ୍ବୀ ହେବା ସହ ଅନ୍ୟମାନଙ୍କୁ ରୋଜଗାର ଯୋଗାଇ ପାରୁଛନ୍ତି । ନମୋ ଡ୍ରୋନ ଦିଦି ଯୋଜନାରେ ମହିଳାମାନେ କୃଷି କ୍ଷେତ୍ରରେ ଡ୍ରୋନ ବ୍ୟବହାର କରିପାରୁଛନ୍ତି । ସି-ଭିଜିଲ ଆପ ମାଧ୍ୟମରେ ନିର୍ବାଚନ ପରିଚାଳନା ନେଇ ନିଜର ମତ ରଖିପାରିବେ ସାଧାରଣ ଭୋଟର । ଉପାନ୍ତ ତଥା ଆଦିବାସୀ ଗାଁରେ ମୋବାଇଲ ଟାୱାର ବସାଇଛନ୍ତି ମୋଦି ସରକାର । ଏ ଦିଗରେ ଆହୁରି ବିକାଶ ହୋଇପାରିଥାନ୍ତା, କିନ୍ତୁ ରାଜ୍ୟ ସରକାରଙ୍କ ରାଜନୈତିକ ପ୍ରତିବଦ୍ଧତା ଅଭାବରୁ ମନ୍ଥର ଗତିରେ ଚାଲିଛି । ନରେନ୍ଦ୍ର ମୋଦି ୨୦୧୪ରେ ଶାସନକୁ ଆସିବା ପରେ ଆଇଟି ତଥା ପ୍ରଯୁକ୍ତି ବିଜ୍ଞାନ କ୍ଷେତ୍ରରେ ଭାରତବର୍ଷରେ ଏକ ବୈପ୍ଳବିକ ପରିବର୍ତ୍ତନ ଆସିଛି । ଓଡିଶାରେ ମଧ୍ୟ ଏହାର ପ୍ରଭାବ ସ୍ପଷ୍ଟ ପରିଲକ୍ଷିତ ହେଉଛି । ୨୦୧୪ ମସିହାରେ ୭୫୬୨ଟି ମୋବାଇଲ ଟାୱାର ଓଡ଼ିଶାରେ ଥିବାବେଳେ ଏବେ ପାଖାପାଖି ୪ ଗୁଣ ଅଧିକ ଟାୱାର ଯଥା ୨୭ହଜାର ୫୧୩ ବସିଛି ।
ସେ ଆହୁରି ମଧ୍ୟ କହିଛନ୍ତି, "ଦେଶରେ ବ୍ରଡବ୍ୟାଣ୍ଡ ସଂଯୋଗ ମାତ୍ର ୬ ଲକ୍ଷରୁ କମ୍ ଥିବାବେଳେ ଆଜି ୨କୋଟି ୩୬ଲକ୍ଷ ଲୋକଙ୍କ ପାଖରେ ବ୍ରଡବ୍ୟାଣ୍ଡ ସଂଯୋଗ ପହଞ୍ଚି ପାରିଛି । ଓଡ଼ିଶାର ୫୧ହଜାର ୧୭୬ଟି ଗାଁରୁ ୪୬ହଜାର ୮୦୧ଟି ଗାଁକୁ ଇଣ୍ଟରନେଟ୍ଯୋ ସଂଯୋଗ କରାଯାଇଛି । ଗତ ୧୦ ବର୍ଷ ଭିତରେ ଓଡିଶାର ୩ ହଜାର ଆଦିବାସୀ ଗାଁରେ ଟାୱାର ସ୍ଥାପନା ହୋଇଛି । ୟୁପିଏ ଶାସନ କାଳ ୨୦୧୨ରେ ୪-ଜି ଲଞ୍ଚ ହେଲା, କିନ୍ତୁ ଓଡ଼ିଶାକୁ ପହଞ୍ଚିବାକୁ ୩ବର୍ଷ ଲାଗିଥିଲା । ଅନ୍ୟପଟେ ମୋଦି ସରକାର ଶାସନରେ ୨୦୨୨ରେ ୫-ଜି ଲଞ୍ଚ ହେଲା ଏବଂ ଓଡ଼ିଶାକୁ ମାତ୍ର ୩ମାସ ମଧ୍ୟରେ ପହଞ୍ଚିଗଲା । ଏଥିରୁ ମୋଦି ସରକାରଙ୍କ ଓଡିଶା ପ୍ରତି ଥିବା ସକରାତ୍ମକ ଆଭିମୁଖ୍ୟ ସ୍ପଷ୍ଟ ହେଇଛି । ଆଜି ଦେଶ ତଥା ଓଡିଶାର ପ୍ରତ୍ୟେକ ପଞ୍ଚାୟତରେ ବ୍ୟାଙ୍କ ଖୋଲିଛି । ‘ଡିଜିଟାଲ କ୍ରାନ୍ତି’ କାରଣରୁ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ଏମଏସପି, ବାର୍ଧକ୍ୟ ଭତା, ବିଧବା ଭତା ସମେତ ବିଭିନ୍ନ ଯୋଜନାରେ ଆସୁଥିବା ଟଙ୍କା ସିଧାସଳଖ ଆସୁଛି ଏବଂ ବାଟମାରଣା ସଂପୂର୍ଣ୍ଣ ଶେଷ ହୋଇଛି ।"
ଇଟିଭି ଭାରତ, ଭୁବନେଶ୍ବର
