ବୌଦ୍ଧ: ଆଗାମୀ ସାଧାରଣ ନିର୍ବାଚନ ପାଇଁ ବିଭିନ୍ନ ରାଜନୈତିକ ଦଳର ଶିବିର ଚଳଚଞ୍ଚଳ ହୋଇ ଉଠିଛି। ସେପଟେ ବୌଦ୍ଧ ଜିଲ୍ଲାର ଉଭୟ ନିର୍ବାଚନ ମଣ୍ଡଳୀରେ ସରଗରମ ହେବାରେ ଲାଗିଛି ରାଜନୀତି । ବୌଦ୍ଧ ଜିଲ୍ଲାର ଉଭୟ ନିର୍ବାଚନ ମଣ୍ଡଳୀରେ ଶାସକ ବିଜେଡ଼ି ଦଳ ସହିତ ବିଜେପି ଦଳ ଓ କଂଗ୍ରେସ ପକ୍ଷରୁ ବିଧାୟକ ପ୍ରାର୍ଥୀ ଘୋଷଣା ସରିଛି । ବୌଦ୍ଧ ଜିଲ୍ଲାର କଣ୍ଟାମାଳ ନିର୍ବାଚନ ମଣ୍ଡଳୀରେ ଲଗାତାର ତିନିଥର ବିଜେଡି ନିଜର ଆଧିପତ୍ୟ ବଜାୟ ରଖିଥିବା ବେଳେ ଏବେ ଆଗାମୀ ନିର୍ବାଚନରେ କଣ ହେବ ସେକଥା ତ ସମୟ କହିବ।
କଣ୍ଟାମାଳ ନିର୍ବାଚନ ମଣ୍ଡଳୀରେ ପ୍ରଥମେ ଭଗବାନ କହଁର ବିଧାୟକ ଓ ପରେ ଲଗାତାର ଦୁଇ ଥର ମହୀଧର ରଣା ବିଧାୟକ ରୂପେ କଣ୍ଟାମାଳରୁ ନିର୍ବାଚିତ ହୋଇଛନ୍ତି । ଚଳିତ ସାଧାରଣ ନିର୍ବାଚନରେ ମହୀଧରଙ୍କ ଉପରେ ବିଜେଡି ଦଳ ଆସ୍ଥା ପ୍ରକଟ କରିଥିବା ବେଳେ ଏଥର କିନ୍ତୁ ରାଜନୈତିକ ଚିତ୍ର ସମ୍ପୂର୍ଣ୍ଣ ଅଲଗା ରହିଛି । ମହୀଧରଙ୍କ ପାରମ୍ପରିକ ପ୍ରତିଦ୍ବନ୍ଦି ବରିଷ୍ଠ ବିଜେପି ନେତା କହ୍ନେଇ ଚରଣ ଡାଙ୍ଗଙ୍କ ଶିବିରରେ ଗତ ନିର୍ବାଚନର ବିଧାୟକ ପ୍ରାର୍ଥୀ ଶେଷଦେବ ମେହେର ଓ ଆହୁରି ଅନେକ ତୁଙ୍ଗ ନେତାମାନଙ୍କୁ ଦେଖିବାକୁ ମିଳୁଛି ।ଏହାଛଡା କଣ୍ଟାମାଳ ବିଜେଡିର ଅନ୍ୟ ଏକ ଗୋଷ୍ଠୀ ମହୀଧରଙ୍କୁ ଖୋଲାଖୋଲି ବିରୋଧ କରୁଥିବା ଦେଖାଯାଉଛି । ସେପଟେ ଗତ ସୋମବାର କଣ୍ଟାମାଳ ନିର୍ବାଚନ ମଣ୍ଡଳୀର କେତେକ ଯୁବ ନେତା ଭୁବନେଶ୍ୱରରେ ବିଜେଡି ଦଳରେ ସାମିଲ ହୋଇ ମହୀଧରଙ୍କୁ ଶକ୍ତିଶାଳୀ କରିବାକୁ ଚେଷ୍ଟା କରିଛନ୍ତି ।
ସେହିପରି ବୌଦ୍ଧ ନିର୍ବାଚନ ମଣ୍ଡଳୀରେ ପାଞ୍ଚ ଥର ବିଧାୟକ ଥିବା ବରିଷ୍ଠ ବିଜେଡି ନେତା ପ୍ରଦୀପ କୁମାର ଅମାତ ଷଷ୍ଠ ଥର ପାଇଁ ଦଳୀୟ ଟିକେଟ ପାଇଥିବା ବେଳେ ତାଙ୍କ ପିତୃ ବିୟୋଗ ଯୋଗୁଁ ତାଙ୍କ ପ୍ରଚାର ଅଭିଯାନ ଶିଥିଳ ପଡ଼ିଛି । ଅନ୍ୟପଟରେ ବୌଦ୍ଧ ନିର୍ବାଚନ ମଣ୍ଡଳୀରେ ବିଜେପି ପକ୍ଷରୁ ସରୋଜ କୁମାର ପ୍ରଧାନ ଓ କଂଗ୍ରେସ ପକ୍ଷରୁ ନବ କୁମାର ମିଶ୍ର ବିକାଶକୁ ମୁଦ୍ଦା କରି ପ୍ରଚାର ଅଭିଯାନକୁ ଜୋରଦାର କରିଛନ୍ତି । ଘରକୁ ଘର ବୁଲି ଭୋଟରମାନଙ୍କୁ ଉଭୟ ବିଜେଡି, ବିଜେପି ଓ କଂଗ୍ରେସର ନେତାମାନେ ଆଶିର୍ବାଦ ଲୋଡୁଛନ୍ତି । ସୋମବାର କନ୍ଧମାଳ ସାଂସଦ ପ୍ରାର୍ଥୀ ସୁକାନ୍ତ ପାଣିଗ୍ରାହୀ ଜିଲ୍ଲାର ଉଭୟ କଣ୍ଟାମାଳ ଓ ବୌଦ୍ଧ ନିର୍ବାଚନ ମଣ୍ଡଳୀ ଗସ୍ତ କରିଥିବା ବେଳେ ବିଜେଡି କିମ୍ବା କଂଗ୍ରେସ ସାଂସଦ ପ୍ରାର୍ଥୀଙ୍କୁ ଏଯାବତ ଦେଖିବାକୁ ମିଳିନାହିଁ । ସେପଟେ ଚଳିତ ସାଧାରଣ ନିର୍ବାଚନ ରୋଚକ ହେବା ସହିତ କଂଗ୍ରେସ ନିର୍ଣ୍ଣାୟକ ଭୂମିକା ଗ୍ରହଣ କରିବ ବୋଲି ସଚେତନ ଭୋଟର ମତ ପ୍ରକାଶ କରିଛନ୍ତି ।
ଇଟିଭି ଭାରତ, ବୌଦ୍ଧ
