ଭୁବନେଶ୍ବର: ଓଡ଼ିଶା ରାଜନୀତି ଇତିହାସରେ ପ୍ରଥମ । ଆଜି ରାଜ୍ୟରେ ଉଭୟ ଲୋକସଭା ଓ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇଛି । ତେବେ ଲୋକସଭା ଆସନରେ ଚିତ୍ପଟାଙ୍ଗ ମାରିଛି ରାଜ୍ୟରେ 24 ବର୍ଷ ଧରି ଶାସନ କରିଥିବା ବିଜେଡି । ଦଳକୁ ସମ୍ପୂର୍ଣ୍ଣ ଭାବରେ ନିରାଶ ହେବାକୁ ପଡ଼ିଛି । ଗୋଟିଏ ଆସନରେ ବି ଖାତା ଖୋଲି ପାରିନାହିଁ ବିଜେଡି ।
ଓଡ଼ିଶା ରାଜନୀତିରେ ବିରାଟ ପରିବର୍ତ୍ତନ । ନିର୍ବାଚନ 2024 ଫଳାଫଳ ପ୍ରକାଶ ପାଇବା ପରେ ସାମ୍ନାକୁ ଆସିଛି ବଡ଼ ଚିତ୍ର । ରାଜ୍ୟରେ ମୋଟ 21ଟି ଲୋକସଭା ଆସନ ଥିବାବେଳେ ଗୋଟିଏ ବି ଆସନ ବିଜେଡି ଭାଗକୁ ଯାଇନାହିଁ । ଗତ 2019 ନିର୍ବାଚନରେ ବିଜେଡି 12ଟି ଲୋକସଭା ଆସନରେ ବିଜୟୀ ହୋଇଥିଲା । କିନ୍ତୁ ଚଳିତ 2024 ନିର୍ବାଚନରେ ସମସ୍ତ 12ଟି ଯାକ ଆସନକୁ ବିଜେଡି ହାତରୁ ଛଡାଇ ଆଣିଛି ବିଜେପି । ମୋଟ 20ଟି ଲୋକସଭା ଆସନରେ ବିଜୟୀ ହୋଇ ବଡ଼ ବିଜୟର ସ୍ବାଦ ଚାଖିଛି ଭାରତୀୟ ଜନତା ପାର୍ଟି । ସେପଟେ ଗତଥର ପରି ଚଳିତ ନିର୍ବାଚନରେ ମଧ୍ୟ କଂଗ୍ରେସ ଗୋଟିଏ ଆସନରେ ବିଜୟୀ ହେବା ସହ ଦଳ ତାର ପୂରୁଣା ଆସନ କୋରାପୁଟକୁ ବଜାୟ ରଖିଛି ।
ତେବେ 2014 ନିର୍ବାଚନରେ ବିଜେଡି 21ଟି ଲୋକସଭା ଆସନରୁ 20ଟିରେ ବିଜୟୀ ହୋଇଥିଲା । ହେଲେ 2024ରେ ମୋଦି ମ୍ୟାଜିକ୍ ଆଗରେ ଫେଲ ମାରିଛି ନବୀନ ଗ୍ୟାରେଣ୍ଟି । ଓଡ଼ିଶାରେ କାମ ଦେଇଛି ମୋଦି ମ୍ୟାଜିକ୍ । ବିଜେପି ରାଜ୍ୟରେ ପ୍ରଥମ ଥର ପାଇଁ ସରକାର ଗଢ଼ିବାକୁ ଯାଉଥିବା ବେଳେ 20ଟି ଆସନରେ ଜିତି କେନ୍ଦ୍ରରେ ପୁଣିଥରେ ମୋଦି ସରକାର ପାଇଁ ନିର୍ଣ୍ଣାୟକ ଭୂମିକା ଗ୍ରହଣ କରିଛି । ମତଦାନ ପୂର୍ବରୁ ସମ୍ବଲପୁର, ଭୁବନେଶ୍ବର, କଟକ, କେନ୍ଦ୍ରାପଡ଼ା ଓ ପୁରୀ ଭଳି ହାଇପ୍ରୋଫାଇଲ ଲୋକସଭା ଆସନରେ କଡା ଟକ୍କର ହେବା ନେଇ ଚର୍ଚ୍ଚା ହେଉଥିବା ବେଳେ ସମସ୍ତ ଆସନରେ ବାଜିମାତ କରିଛି ବିଜେପି ।
ଲୋକସଭା ଆସନରେ ବିଜୟୀ ହୋଇଥିବା ବିଜେପି ପ୍ରାର୍ଥୀ:
ଭୁବନେଶ୍ବର: ଅପରାଜିତା ଷଡଙ୍ଗୀ
ସମ୍ବଲପୁର: ଧର୍ମେନ୍ଦ୍ର ପ୍ରଧାନ
କଟକ: ଭର୍ତ୍ତୃହରି ମହତାବ
ପୁରୀ: ସମ୍ବିତ ପାତ୍ର
କେନ୍ଦ୍ରାପଡ଼ା: ବୈଜୟନ୍ତ ପଣ୍ଡା
ବଲାଙ୍ଗୀର: ସଂଗୀତା ସିଂହଦେଓ
କଳାହାଣ୍ଡି: ମାଳବିକା ଦେବୀ
ଢେଙ୍କାନାଳ: ରୁଦ୍ରନାରାୟଣ ପାଣି
ଭଦ୍ରକ: ଅଭିମନ୍ୟୁ ସେଠୀ
ସୁନ୍ଦରଗଡ଼: ଜୁଏଲ ଓରାମ
ବରଗଡ଼: ପ୍ରଦୀପ ପୁରୋହିତ
ଆସିକା: ଅନିତା ଶୁଭଦର୍ଶିନୀ
ବ୍ରହ୍ମପୁର: ଡ଼ ପ୍ରଦୀପ ପାଣିଗ୍ରାହୀ
ନବରଙ୍ଗପୁର: ବଳଭଦ୍ର ମାଝୀ
ମୟୂରଭଞ୍ଜ: ନବଚରଣ ମାଝୀ
ବାଲେଶ୍ବର: ପ୍ରତାପ ଚନ୍ଦ୍ର ଷଡଙ୍ଗୀ
ଜଗତସିଂହପୁର: ବିଭୂପ୍ରସାଦ ତରାଇ
କନ୍ଧମାଳ: ସୁକାନ୍ତ କୁମାର ପାଣିଗ୍ରାହୀ
କେନ୍ଦୁଝର: ଅନନ୍ତ ନାୟକ
ଯାଜପୁର: ରବିନ୍ଦ୍ର ନାରାୟଣ ବେହେରା
ଇଟିଭି ଭାରତ, ଭୁବନେଶ୍ବର
