ଭୁବନେଶ୍ବର: ନବନିର୍ବାଚିତ ଦଳୀୟ ସାଂସଦମାନଙ୍କୁ ଦିଲ୍ଲୀ ଡାକିଲା ବିଜେପି । ଆଜି ଦିଲ୍ଲୀ ଗଲେ ଓଡ଼ିଶାର 20 ବିଜେପି ସାଂସଦ । ଆସନ୍ତାକାଲି (ଶୁକ୍ରବାର) ଦଳର ସଂସଦୀୟ ପାର୍ଟି ବୈଠକ ବସିବାକୁ ଯାଉଛି । ଦେଶରେ ସାଧାରଣ ନିର୍ବାଚନ ଶେଷ ହେବା ପରେ ଏହା ହେଉଛି ‘ଭାରତୀୟ ଜନତା ପାର୍ଟି’ର ପ୍ରଥମ ସଂସଦୀୟ ପାର୍ଟି ବୈଠକ । ଏଥିରେ ଦେଶର ସମସ୍ତ ନବନିର୍ବାଚିତ ବିଜେପି ବିଧାୟକମାନେ ଅଂଶଗ୍ରହଣ କରିବେ । ନିର୍ବାଚିତ ସାଂସଦଙ୍କ ସହ ଦଳର ଅନେକ ଶୀର୍ଷ ନେତା ମଧ୍ୟ ଦିଲ୍ଲୀ ଗସ୍ତ କରୁଛନ୍ତି । ଆଜି ସଂଧ୍ୟାରେ ସେମାନେ ଦିଲ୍ଲୀରେ ପହଞ୍ଚିବା ପରେ କେନ୍ଦ୍ରୀୟ ନେତାମାନଙ୍କ ସହ ଭେଟଘାଟ ଓ ଆଲୋଚନା କାର୍ଯ୍ୟକ୍ରମ ମଧ୍ୟ ରହିଛି ।
ନିର୍ବାଚନ ଫଳାଫଳ ଆସିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଷ୍ଟ୍ରପତିଙ୍କୁ ଇସ୍ତଫା ପତ୍ର ପ୍ରଦାନ କରିସାରିଛନ୍ତି । ସେ ଏବେ ସାମ୍ବିଧାନିକ ପରମ୍ପରା ଅନୁସାରେ କାମଚଳା ପ୍ରଧାନମନ୍ତ୍ରୀ ଭାବେ ଦାୟିତ୍ବରେ ଅଛନ୍ତି । ଆସନ୍ତାକାଲି ବିଜେପି ସଂସଦୀୟ ବୋର୍ଡ ବୈଠକ ସହ ବିଜେପି ନେତୃତ୍ବାଧୀନ ‘ଏନଡିଏ’ ମେଣ୍ଟ ବୈଠକ ମଧ୍ୟ ବସିବ । ଏହା ପରେ ‘ଏଡିନଏ’ ମେଣ୍ଟ ମୋଦିଙ୍କୁ ନେତା ନିର୍ବାଚିତ କରିବା ସହ ସରକାର ଗଠନ କରିବା ପାଇଁ ରାଷ୍ଟ୍ରପତିଙ୍କ ନିକଟରେ ଔପଚାରିକ ଭାବେ ଦାବି ଜଣାଇବ । ତେବେ ସୂଚନା ଅନୁସାରେ, ପ୍ରଧାନମନ୍ତ୍ରୀ ଚଳିତ 8 ତାରିଖରେ ଶପଥ ନେବାକୁ ସମୟ ସ୍ଥିର ହୋଇଥିଲା । ହେଲେ ଏହା ‘ଏନଡିଏ’ର ବୈଠକ କାରଣରୁ ସାମାନ୍ୟ ବିଳମ୍ବ ମଧ୍ୟ ହେବା ନେଇ ଅନୁମାନ କରାଯାଉଛି ।
