ଢେଙ୍କାନାଳ: ନିର୍ବାଚନ ଯେତିକି ପାଖେଇ ଆସୁଛି ରାଜନୈତିକ ଉଷ୍ମତା ସେତିକି ବଢୁଛି । ରାଜନୈତିକ ଦଳମାନେ ନିଜ ନିଜ ଦଳକୁ ସୃଦୃଢ଼ କରିବାକୁ ମୈଦାନକୁ ଓହ୍ଲାଇ ସାରିଛନ୍ତି । ଗାଁ ଗାଁରେ ପହଞ୍ଚି ଭୋଟରମାନଙ୍କୁ ଆକୃଷ୍ଠ କରିବାକୁ ସବୁ ଦଳ ଗୋଟି ଚଳାଇଲେଣି । ବିଭିନ୍ନ ନିର୍ବାଚନ ମଣ୍ଡଳୀ ବୁଲି ନିଜ ଦଳର କର୍ମୀମାନଙ୍କୁ ସୃଦୃଢ଼ କରିବାକୁ ଜୋନ ସ୍ତରୀୟ କର୍ମୀ ସମ୍ମିଳନୀ ଆରମ୍ଭ କରିଛି । ଏହି ପରିପ୍ରେକ୍ଷୀରେ ଆଜି (ଶନିବାର) କାମାକ୍ଷାନଗର ନିର୍ବାଚନ ମଣ୍ଡଳୀର ଭୁବନ ବ୍ଲକ 1 ଓ2 ନମ୍ବର ଜୋନ ସହ ଭୁବନ ଏନଏସିରେ ବିଜେଡିର କର୍ମୀ ସମ୍ମିଳନୀ କରି ଦଳର ଶକ୍ତି ପ୍ରଦର୍ଶନ କରିଛି । ଏହି ଅବସରରେ କଂଗ୍ରେସ ଓ ବିଜେପିର ଅନେକ କର୍ମୀ ଆସି ବିଜେଡିରେ ସାମିଲ ହୋଇଛନ୍ତି ।
ଆଜି ଭୁବନ ବ୍ଲକର ଦୁଇଟି ଜୋନର ଟିପିଲେଇ ଗ୍ରାମ ହାଟ ପଡିଆରେ ଓ ଭୁବନ ବିଜ୍ଞାପିତ ଅଞ୍ଚଳ 1 ଯାତ୍ରା ପଡିଆରେ ବିଜେଡି ଦଳ ତରଫରୁ କର୍ମୀ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଭୁବନ ବ୍ଲକର 1ନମ୍ବର ଜୋନ ଓ 2ନମ୍ବର ଜୋନରୁ ହଜାର ହଜାର ନେତା ଓ ସମର୍ଥକମାନେ ସମ୍ମିଳନୀରେ ଯୋଗ ଦେଇଥିଲେ । କର୍ମୀ ସମ୍ମିଳନୀରେ କାମାକ୍ଷାନଗର ନିର୍ବାଚନ ମଣ୍ଡଳୀର ବିଜେଡି ବିଧାୟକ ପ୍ରାର୍ଥୀ ତଥା ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଓ ଢେଙ୍କାନାଳ ଲୋକସଭା ପ୍ରାର୍ଥୀ ଅବିନାଶ ସାମଲ ଯୋଗଦେଇ କର୍ମୀମାନଙ୍କୁ ଭୋଟ ଭିକ୍ଷା କରିଛନ୍ତି । ଏହି କାର୍ଯ୍ୟକ୍ରମରେ ସମସ୍ତ ବିଜେଡି ସରପଞ୍ଚ ଓ ସମିତି ସଭ୍ୟମାନେ ଯୋଗ ଦେଇଥିଲେ । ଏହି କର୍ମୀ ସମ୍ମିଳନୀକୁ ବିଜେଡି ବ୍ଲକ ସଭାପତି ରମେଶ ଚନ୍ଦ୍ର ସାହୁ ପରିଚାଳନା କରିଥିଲେ ।
ସେହିପରି ଭୁବନ ବିଜ୍ଞାପିତ ଅଞ୍ଚଳ ପରିଷଦରେ ଆୟୋଜିତ କର୍ମୀ ସମ୍ମିଳନୀରେ ଯୋଗଦେଇ ହଜାର ହଜାର ମହିଳା ଓ ପୁରୁଷ କର୍ମୀଙ୍କୁ ଭୋଟ ଭିକ୍ଷା କରିଥିଲେ ପ୍ରଫୁଲ୍ଲ ଓ ଅବିନାଶ । ଭୁବନ ଏନଏସିରେ ହୋଇଥିବା କର୍ମୀ ସମ୍ମିଳନୀକୁ ଅଧ୍ୟକ୍ଷ ଶୁଭେନ୍ଦୁ କୁମାର ସାହୁ ପରିଚାଳନା କରିଥିଲେ । ଭୁବନ ଏନଏସି କର୍ମୀ ସମ୍ମିଳନୀରେ କୁନିନ୍ଦା ପଞ୍ଚାୟତ, ଭୁଷଳ ପଞ୍ଚାୟତ, ଭୁବନ NACର ବିଭିନ୍ନ ୱାର୍ଡରୁ ଶହଶହ କଂଗ୍ରେସ ଓ ବିଜେପି କର୍ମୀ ବିଜେଡିରେ ଯୋଗଦେଲେ । ଉଭୟ ପ୍ରାର୍ଥୀ ଦଳୀୟ ଉତ୍ତରୀୟ ଦେଇ ସେମାନଙ୍କୁ ନିଜଦଳରେ ସାମିଲ କରିଥିଲେ l
ଏହା ମଧ୍ୟ ପଢ଼ନ୍ତୁ...ଭୁବନ 3 ନମ୍ବର ଜୋନରେ କର୍ମୀ ସମ୍ମିଳନୀ କରି ଶକ୍ତି ପ୍ରଦର୍ଶନ କଲା ବିଜେଡି - Dhenkanal BJD
ଏହି ଅବସରରେ ଢେଙ୍କାନାଳ ଲୋକସଭା ଆସନ ବିଜେଡି ସାଂସଦ ପ୍ରାର୍ଥୀ ଅବିନାଶ ସାମଲ କହିଛନ୍ତି, "କାମାକ୍ଷାନଗର ନିର୍ବାଚବ ମଣ୍ଡଳୀରେ ମୁଖ୍ୟମନ୍ତ୍ରୀଙ୍କ ଉନ୍ନୟନ ମୂଳକ କାର୍ଯ୍ୟକୁ ନେଇ ଲୋକପ୍ରିୟତା ରହିଛି l ଏହି ଅଞ୍ଚଳରେ ଅନେକ ପ୍ରଗତି ହୋଇଛି । ବିଜେଡି ପ୍ରତି ଲୋକଙ୍କ ଭଲପାଇବା ଓ ସମର୍ଥନ ରହିଛି । ନିଶ୍ଚିନ୍ତ ଭାବରେ ବିଧାୟକ ପ୍ରଫୁଲ ମଲ୍ଲିକ ଓ ମୋର ବିଜୟ ହେବ ।"
ଇଟିଭି ଭାରତ, ଢେଙ୍କାନାଳ
