ଭୁବନେଶ୍ବର: ‘‘ପ୍ରଧାନମନ୍ତ୍ରୀ, କେନ୍ଦ୍ର ଗୃହମନ୍ତ୍ରୀ, ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କୁ ପର୍ଯ୍ୟଟକ କୁହାଯାଉଛି । ଏମାନେ କ’ଣ ପର୍ଯ୍ୟଟକ କି ? ଏହା ଓଡ଼ିଶାବାସୀ କେବେ ସହିବେ ନାହିଁ । ଏଇଟା କ’ଣ ତୁମର ଜାଗିର କି ? ଏଠି କ’ଣ ‘ମେରୀ ରାୟ ଶାସନ’ ଚାଲିବ ? ଏଠି କ’ଣ ଏକଛତ୍ରବାଦ ଶାସନ ଚଳାଇଛନ୍ତି କି ? ଦାଦନ, ଜଳସେଚନ, ଶିକ୍ଷା ସମସ୍ୟା ପଚାରିଲେ ଉତ୍ତର ଦେଇ ପାରୁନାହାନ୍ତି । ଏମାନଙ୍କ ପାଖରେ ଉତ୍ତର ନାହିଁ । ସତ ପଚାରିଲେ କଷ୍ଟ ହେଉଛି । ଗୁମାସ୍ତା ବାବୁ କହୁଛନ୍ତି ହାରିଲେ ରାଜନୀତି ଛାଡ଼ିଦେବି ।’’ ଏପରି ଶବ୍ଦ ସହ ବିଜେଡି ସରକାର ଓ ଭିକେ ପାଣ୍ଡିଆନଙ୍କ ଉପରେ ବର୍ଷିଛନ୍ତି କେନ୍ଦ୍ରମନ୍ତ୍ରୀ ତଥା ଚଳିତ ଥରର ଲୋକସଭା ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ । ଗତକାଲି (ଶନିବାର) ଦଳର ରାଜ୍ୟ କାର୍ଯ୍ୟାଳୟରେ ଆୟୋଜିତ କାର୍ଯ୍ୟକର୍ତ୍ତା ସମ୍ମିଳନୀକୁ ସମ୍ବୋଧିତ କରି ଧର୍ମେନ୍ଦ୍ର ବିଜେଡି ସରକାର ଉପରେ ଏପରି ଢଙ୍ଗରେ ବର୍ଷିଛନ୍ତି । ବୈଠକରେ ଦଳର ରାଷ୍ଟ୍ରୀୟ ଉପାଧ୍ୟକ୍ଷ ତଥା କେନ୍ଦ୍ରାପଡା ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା, ସାଂସଦ ଅପରାଜିତା ଷଡଙ୍ଗୀ, ରାଜ୍ୟ ସଭାପତି ମନମୋହନ ସାମଲ ଓ ପ୍ରତାପ ଷଡଙ୍ଗୀ ପ୍ରମୁଖ ଉପସ୍ଥିତ ରହି ବିଭିନ୍ନ ପ୍ରସଙ୍ଗର ନବୀନ ସରକାର ଓ ବିଜେଡିକୁ ଟାର୍ଗେଟ କରିଥିଲେ ।
ପ୍ରତାପ ଷଡ଼ଙ୍ଗୀ କହିଛନ୍ତି ଦୀର୍ଘ ଦିନର ଅତ୍ୟାଚାରର ସମାପ୍ତ ହେବ । ପ୍ରଧାନମନ୍ତ୍ରୀ ମୋଦିଙ୍କ କୂଟନୈତିକ ଦକ୍ଷତା କାରଣରୁ ଋଷ-ୟୁକ୍ରେନ ଯୁଦ୍ଧ ଅଟକାଇ ଭାରତୀୟ ଛାତ୍ରଛାତ୍ରୀଙ୍କୁ ସ୍ବଦେଶ ଫେରାଇ ଆଣାଯାଇ ପାରିଥିଲା । ପ୍ରତି ବୁଥରୁ ଭୋଟ ଆଣିବା ପାଇଁ ଏହି କିଛି ଦିନ କଠିନ ପରିଶ୍ରମ କରିବାକୁ ପଡ଼ିବ । ସେହିପରି ଅପରାଜିତା ଷଡଙ୍ଗୀ କର୍ମୀମାନଙ୍କୁ ଉଦବୋଧନ ଦେଇ କହିଛନ୍ତି, କେନ୍ଦ୍ରରେ ମୋଦି ଆସିବେ ଓ ଓଡ଼ିଶାରେ ସରକାର ପରିବର୍ତ୍ତନ କରି ବିଜେପି ସରକାର କରିବା ପାଇଁ ଆମର ଲକ୍ଷ୍ୟ ରହିଛି । ନିର୍ଣ୍ଣାୟକ ନିଷ୍ପତ୍ତିର ସମୟ ଆସିଯାଇଛି । ଏଥର ବିଜେପିକୁ ଜିତିବାର ଅଛି । 25 ତାରିଖ ସକାଳ 7ଟାରୁ 5ଟା ପର୍ଯ୍ୟନ୍ତ ମତଦାନ ହେବ । ପ୍ରତି ବିଧାନସଭାରେ ବୁଥରେ ବସିବାକୁ ଥିବା କାର୍ଯ୍ୟକର୍ତ୍ତାଙ୍କର ଦୁଇ ଘଣ୍ଟିଆ ଟ୍ରେନିଂ ହେବ ।
ସେହିପରି ଦଳର ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା କହିଛନ୍ତି ଯେ, ଦୁଇ ଜଣ ଲୋକ ହେଲିକପ୍ଟରରେ ବୁଲୁଛନ୍ତି । ଭିଡ଼ିଓ କରୁଛନ୍ତି, ତାକୁ ଲୋକ ମିମ୍ କଲେଣି । ସଭା କରୁଛନ୍ତି, ହେଲେ ଲୋକ ହେଉନାହାନ୍ତି । ଜୁନ 4 ପାଇଁ ପ୍ରଧାନମନ୍ତ୍ରୀ ବାର୍ତ୍ତା ଦେଇ ଯାଇଛନ୍ତି । ଜୁନ 10 ତାରିଖ ପାଇଁ ନିମନ୍ତ୍ରଣ ଦେଇ ଯାଇଛନ୍ତି ପ୍ରଧାନମନ୍ତ୍ରୀ । ଓଡ଼ିଶାରେ ନବୀନ ପଟ୍ଟନାୟକ 25 ବର୍ଷ ରହିଲେଣି । କିନ୍ତୁ ଓଡ଼ିଶାକୁ ତଳ ଆଡୁ ବି 5 ନମ୍ବର ସ୍ଥାନକୁ ଆଣିପାରି ନାହାନ୍ତି ନବୀନ । ଲୋକେ ଗାଁ ଗାଁରେ କହିଲେଣି, ଓଡ଼ିଶାରେ ପରିବର୍ତ୍ତନ ଆସିବ ।
ଇଟିଭି ଭାରତ, ଭୁବନେଶ୍ବର
