ଭୁବନେଶ୍ବର: ରାଜ୍ୟରେ ଅନ୍ତିମ ପର୍ଯ୍ୟାୟ ମତଦାନର ଠିକ ଦୁଇ ଦିନ ପୂର୍ବରୁ ମୁଖ୍ୟମନ୍ତ୍ରୀ କାର୍ଯ୍ୟାଳୟ (CMO)ରେ କାର୍ଯ୍ୟରତ ଦୁଇ ବରିଷ୍ଠ ପୋଲିସ ଅଧିକାରୀଙ୍କ ବିରୋଧରେ ନିର୍ବାଚନ ଆୟୋଗ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ‘ସିଏମଓ’ର ସ୍ବତନ୍ତ୍ର ସଚିବ ତଥା ବରିଷ୍ଠ ଆଇପିଏସ ଡି.ଏସ କୁଟ୍ଟେଙ୍କୁ ନିଲମ୍ବିତ କରିବା ସହ ଅନ୍ୟ ଜଣେ ଆଇଜି ପାହ୍ୟାର ଅଧିକାରୀ ଆଶିଷ ସିଂଙ୍କର ସ୍ବାସ୍ଥ୍ୟବସ୍ଥା ଯାଞ୍ଚ କରିବାକୁ ଆୟୋଗ ନିର୍ଦ୍ଦେଶ ଦେଇଛନ୍ତି । ଏହାକୁ କାଉଣ୍ଟର କରିଛନ୍ତି ବିଜେଡିର ଚର୍ଚ୍ଚିତ ନେତା ତଥା 5-ଟି ଅଧ୍ୟକ୍ଷ ଭି.କେ ପାଣ୍ଡିଆନ । ଏହା ଅତି ଦୁର୍ଭାଗ୍ୟଜନକ କାର୍ଯ୍ୟାନୁଷ୍ଠାନ ଓ ବିଜେପି ପ୍ରରୋଚନାରେ ହୋଇଛି ବୋଲି ପାଣ୍ଡିଆନ କହିଛନ୍ତି ।
ଆଜି ପ୍ରେସମିଟରେ ପାଣ୍ଡିଆନ କହିଛନ୍ତି, ଉଭୟ ଅଧିକାରୀ ଦକ୍ଷ ପୋଲିସ ଅଧିକାରୀ ଭାବେ କାର୍ଯ୍ୟ କରିବାର ଅଭିଜ୍ଞତା ରଖିଛନ୍ତି । ସେମାନେ ମାଓ ଅଞ୍ଚଳରେ ଉଲ୍ଲେଖନୀୟ ଦକ୍ଷତାର ସହ କାମ କରି କର୍ତ୍ତବ୍ୟନିଷ୍ଠତାର ପରିଚୟ ଦେଇଛନ୍ତି । ଗଜପତି, ମାଲକାନଗିରି ପରି ମାଓପ୍ରବଣ ଜିଲ୍ଲାରେ କାମ କରିବା ବେଳେ ସେମାନଙ୍କର ଜୀବନକୁ ମଧ୍ୟ ବାଜିରେ ଲଗାଇଛନ୍ତି । ସେମାନେ ଜାତୀୟସ୍ତରରେ ମଧ୍ୟ ପୁରସ୍କୃତ ହୋଇସାରିଛନ୍ତି । ତଥାପି ତାଙ୍କ ବିରୋଧରେ ନିର୍ବାଚନ କମିଶନଙ୍କ ଏପରି କାର୍ଯ୍ୟାନୁଷ୍ଠାନ ଅତି ଦୁର୍ଭାଗ୍ୟଜନକ । କେବଳ ବିଜେପି ପ୍ରରୋଚନାରେ ଏପରି କରାଯାଇଛି । ସେମାନେ (ବିଜେପି) ବିଜେଡିର ଲୋକପ୍ରିୟତାକୁ ହଜମ କରିପାରୁନାହାନ୍ତି । ସେମାନେ ନବୀନ ପଟ୍ଟନାୟକଙ୍କ ଲୋକପ୍ରିୟତା ସାମ୍ନାରେ ଛିଡା ହୋଇ ପାରିବେନାହିଁ । ତେଣୁ ବିଜେପି ଏପରି କରିବାରେ ଲାଗିଛନ୍ତି ।
9 ତାରିଖ ସାଢେ 11ରୁ 1ଟା ମଧ୍ୟରେ ଶପଥ ନେବେ ଭୁମିପୁତ୍ର :-
ନବୀନଙ୍କୁ ଭୂମିପୁତ୍ର ଭାବେ ଚିତ୍ରଣ କରି ପାଣ୍ଡିଆନ କହିଛନ୍ତି, 9 ଜୁନରେ ଭୂମିପୁତ୍ର ଶପଥ ଗ୍ରହଣ କରିବେ । ପୂର୍ବାହ୍ନ ସାଢେ 11ରୁ ଅପରାହ୍ନ ଗୋଟାଏ ମଧ୍ୟରେ ଶପଥଗ୍ରହଣ ସମାରୋହ ଶେଷ ହେବ । ସେ କେବଳ ଓଡିଆ କୁହନ୍ତି ନାହିଁ ବରଂ ଓଡିଶାବାସୀଙ୍କ ହୃଦୟରେ ଅଛନ୍ତି । ସେ ହିଁ ପୁଣି ଥରେ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ।
ଏଠାରେ ସୂଚନାଯୋଗ୍ୟ ଯେ, ନିର୍ବାଚନ ପ୍ରକ୍ରିୟାକୁ ପ୍ରଭାବିତ କରିବା ଅଭିଯୋଗରେ ଗତକାଲି ବିଳମ୍ବିତ ସନ୍ଧ୍ୟାରେ ନିର୍ବାଚନ ଆୟୋଗଙ୍କ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (CMO)ର ସ୍ବତନ୍ତ୍ର ସଚିବ ତଥା ବରିଷ୍ଠ ଆଇପିଏସ୍ ଅଧିକାରୀ ଧୀରେନ୍ଦ୍ର ଶମ୍ଭାଜୀ କୁଟ୍ଟେ ଓରଫ ଡିଏସ୍ କୁଟ୍ଟେ ନିଲମ୍ବିତ କରିଥିଲେ । ମେଡିକାଲ ଗ୍ରାଉଣ୍ଡରେ ଛୁଟିରେ ଥିବା ଆଇପିଏସ୍ ଅଧିକାରୀ ଆଶିଷ ସିଂହଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରିବା ଲାଗି ମଧ୍ୟ ନିର୍ଦ୍ଦେଶ ଦେଇଥିଲେ ନିର୍ବାଚନ ଆୟୋଗ । ଏହାକୁ ନେଇ ଏବେ ରାଜନୀତି ଆରମ୍ଭ ହୋଇଛି । ବିଜେପି ପ୍ରେସମିଟ ଏହି ଦୁଇ ଅଧିକାରୀଙ୍କ ଭୂମିକାକୁ ସମାଲୋଚନା କରିଛି । ବିଜେଡି ମଧ୍ୟ ନିଜକୁ ଡିଫେଣ୍ଡ କରିବାରେ ପଛରେ ନାହିଁ ।
ଇଟିଭି ଭାରତ, ଭୁବନେଶ୍ବର
