ନୂଆଦିଲ୍ଲୀ: ଗତକାଲି କଂଗ୍ରେସ ହାଇକମାଣ୍ଡ ମଲ୍ଲିକାର୍ଜୁନ ଖଡଗେ ଦେଇଥିବା କାଶ୍ମୀରରୁ ଧାରା-370 ଉଚ୍ଛେଦ ପ୍ରସଙ୍ଗର ପ୍ରାସଙ୍ଗିକତା ଟିପ୍ପଣୀରେ ଆଜି ପ୍ରଧାନମନ୍ତ୍ରୀ କଡା ଟାର୍ଗେଟ କରିଛନ୍ତି । ଏହି ଭାଷା କେବଳ ଟୁକଡେ ଟୁକଡେ ଗ୍ୟାଙ୍ଗର ବୋଲି ପ୍ରଧାନମନ୍ତ୍ରୀ କହିଛନ୍ତି । କାଶ୍ମୀର ଅଖଣ୍ଡତା ପ୍ରସଙ୍ଗ କ’ଣ ଦେଶ ଅନ୍ୟ ରାଜ୍ୟ ପାଇଁ ଅପ୍ରାସଙ୍ଗିକ ବୋଲି ସେ ଖଡଗେଙ୍କୁ ପ୍ରଶ୍ନ ମଧ୍ୟ କରିଛନ୍ତି । ରାଜସ୍ଥାନର ଏକ ଜନସଭାକୁ ସମ୍ବୋଧିତ କରିବା ବେଳେ ଗତକାଲି ଖଡଗେ ଏହି ପ୍ରସଙ୍ଗରେ ବିଜେପିକୁ ଟାର୍ଗେଟ କରିଥିଲେ । ରାଜସ୍ଥାନରେ ଆସି କାଶ୍ମୀରୁ ଧାରା-370 ଉଚ୍ଛେଦ ପ୍ରସଙ୍ଗ ଉପରେ କହିବାର କ’ଣ ଆବଶ୍ୟକତା ରହିଛି । ଏହା ଏଠାକାର ସ୍ଥାନୀୟ ଲୋକଙ୍କ ପାଇଁ କ’ଣ ପ୍ରାସଙ୍ଗିକତା ରଖେ ବୋଲି ଖଡଗେ ବିଜେପିକୁ ପ୍ରଶ୍ନ କରିଥିଲେ ।
ଆଜି ବିହାରରେ ଏକ ନିର୍ବାଚନୀ ସଭାମଞ୍ଚରେ ଏହି ପ୍ରସଙ୍ଗରେ କଂଗ୍ରେସ ଓ ଏହାର ମୁଖ୍ୟ ଖଡଗେଙ୍କୁ ଶାଣିତ ଟାର୍ଗେଟ କରିଛନ୍ତି ପ୍ରଧାନମନ୍ତ୍ରୀ ମୋଦିି । କହିଛନ୍ତି, "କଂଗ୍ରେସ ଧ୍ୟାନର ସହ ଶୁଣିବା ଉଚିତ, ବିହାରର ଅନେକ ଯୁବକ ଦେଶ ଓ ମାତୃଭୂମି ପାଇଁ ବଳିଦାନ ଦେଇଛନ୍ତି । ଜମ୍ମୁ କାଶ୍ମୀରକୁ ବଞ୍ଚାଇବା ପାଇଁ ଦେଶର ଅନେକ ଯୁବକ ଶହୀଦ ହୋଇଛନ୍ତି । ରାଜସ୍ଥାନରେ ମଧ୍ୟ ଅନେକ ଯୁବକ ଜାମ୍ମୁ କାଶ୍ମୀରର ଅଖଣ୍ଡତା ପାଇଁ ସର୍ବୋଚ୍ଚ ବଳିଦାନ ଦେଇଛନ୍ତି । ଏହା ସତ୍ତ୍ବେ ମଧ୍ୟ କଂଗ୍ରେସ ପଚାରୁଛି ଦେଶର ଅନ୍ୟ ଭାଗରେ କାଶ୍ମୀର ପ୍ରସଙ୍ଗର କ’ଣ ପ୍ରାସଙ୍ଗିକତା ରହିଛି । ଏହା ହେଉଛି ଟୁକଡେ-ଟୁକେ ଗ୍ୟାଙ୍ଗର ଭାଷା । ଆପଣ ଏପରି ଲୋକଙ୍କୁ କ୍ଷମା କରି ପାରିବେ କି ?"
ଏହା ମଧ୍ୟ ପଢନ୍ତୁ :- ମୁଖତାର ଅନସାରୀ ପରିବାର ସଦସ୍ୟଙ୍କୁ ଭେଟିଲେ ଅଖିଳେଶ - Akhilesh Visits Mukhtar Family
ଗତକାଲି ଖଡଗେଙ୍କ ଏହି ବୟାନ ଆସିବା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମଧ୍ୟ କଡା ସମାଲୋଚନା କରିଥିଲେ । ଖଡଗେଙ୍କ ଭାଷଣର ଏକ କ୍ଲିପକୁ ‘ଏକ୍ସ’ରେ ସେୟାର କରି ଶାହ କହିଥିଲେ, କାଶ୍ମୀର ଦେଶର ଅବିଚ୍ଛେଦ୍ୟ ଅଂଶ । କାଶ୍ମୀର ଉପରେ ସମଗ୍ର ଦେଶବାସୀଙ୍କ ଅଧିକାର ରହିଛି । ଦେଶର ଅନ୍ୟ ଭାଗରେ ମଧ୍ୟ କାଶ୍ମୀରବାସୀଙ୍କ ଅଧିକାର ଅନୁରୂପ ଭାବେ ରହିଛି । କଂଗ୍ରେସ ମୁଖ୍ୟଙ୍କ ଏପରି ଟିପ୍ପଣୀ ଲଜ୍ଜାଜନକ । ଏହା ଦେଶରେ ଅଖଣ୍ଡତା ପ୍ରତି ପ୍ରଶ୍ନ ବୋଲି ଶାହ କହିଥିଲେ । ଆଜି ପ୍ରଧାନମନ୍ତ୍ରୀ ମଧ୍ୟ ଏହି ପ୍ରସଙ୍ଗରେ ନିର୍ବାଚନୀ ସଭାମଞ୍ଚରୁ କଂଗ୍ରେସକୁ ଟାର୍ଗେଟ କରିବାର କୌଣସି ଅବସର ଛାଡିନାହାନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
