ଭୁବନେଶ୍ବର: ନବୀନ ନିବାସରେ ଆଜି ବିଜେଡିର ସଂସଦୀୟ ଦଳ ବୈଠକ ଅନୁଷ୍ଠିତ ହୋଇଛି । ଦଳର ସୁପ୍ରିମୋ ନବୀନ ପଟ୍ଟନାୟକ ଅଧ୍ୟକ୍ଷତାରେ ବସିଥିବା ବୈଠକରେ ରାଜ୍ୟସଭାରେ ଦଳର ଆଭିମୁଖ୍ୟ ସ୍ପଷ୍ଟ ହୋଇଛି । ଓଡିଶା ଅବହେଳା, ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା, କୋଇଲା ରୟାଲିଟି ବୃଦ୍ଧି, ରେଲୱେରେ ଅବହେଳା ପ୍ରସଙ୍ଗ ଉଠାଇବ ବିଜେଡି । ଏନେଇ ଦଳୀୟ ସାଂସଦଙ୍କୁ ଗୁରୁମନ୍ତ୍ର ଦେଇଛନ୍ତି ନବୀନ । ସେହିପରି ସମସ୍ତ ସାଂସଦଙ୍କ ସର୍ବସମ୍ମତି କ୍ରମେ ନବୀନ ହୋଇଛନ୍ତି ବିଜେଡିର ସଂସଦୀୟ ଦଳ ଅଧ୍ୟକ୍ଷ ।
ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି, "ବିଜେଡି ସଭାପତି ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବିଜେଡିର ସଂସଦୀୟ ଦଳ ବୈଠକ ଅନୁଷ୍ଠିତ ହୋଇଛି । ଆମ ପାଇଁ ଆଜି ଖୁସିର ଦିନ । ଆମେ ସମସ୍ତ ସାଂସଦଙ୍କ ସର୍ବସମ୍ମତି କ୍ରମେ ବିଜେଡି ସଭାପତି ନବୀନ ପଟ୍ଟନାୟକ ବିଜେଡିର ସଂସଦୀୟ ଦଳ ଅଧ୍ୟକ୍ଷ ହୋଇଛନ୍ତି । ଓଡିଶାବାସୀଙ୍କର ଆମେ ସ୍ୱର ହେବୁ । ସବୁ ପ୍ରସଙ୍ଗକୁ ନେଇ ଜୋରଦାର ଉଠାଇବୁ । ଓଡିଶାର ବିକାଶ ଓ ଯୁକ୍ତିଯୁକ୍ତ ପ୍ରସଙ୍ଗ ଉଠାଇବୁ । ଏନେଇ ଆମକୁ ଆମର ନେତା ଗୁରୁମନ୍ତ୍ର ଦେଇଛନ୍ତି । ପ୍ରଧାନମନ୍ତ୍ରୀଙ୍କ ଉଦବୋଧନ ବେଳେ ବିଜେଡି ପ୍ରଥମ ଦଳ ଭାବେ କକ୍ଷତ୍ୟାଗ କରିଥିଲା । ପରେ ଅନ୍ୟ ଦଳ ଗୃହ ଛାଡିଥିଲେ ।"
ସେହିପରି ବିଜେଡି ସାଂସଦ ଦେବାଶିଷ ସାମନ୍ତରାୟ କହିଛନ୍ତି, "ଅଧିବେଶନରେ ଓଡିଶାକୁ ଅବହେଳା, ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା, କୋଇଲା ରୟାଲିଟି, ରେଲୱେରେ ଅବହେଳା, ଆଦିବାସୀଙ୍କୁ ଅବହେଳା ପ୍ରସଙ୍ଗ ଉଠାଇବ ଦଳ । କଟକ - ସମ୍ବଲପୁର ରାସ୍ତା ଖରାପ । ଆମଠୁ ବହୁ ପରିମାଣର ରାଜସ୍ୱ ଯାଉଛି । ମହାନଦୀ ପ୍ରସଙ୍ଗ ରହିଛି । ସେମାନେ ଟ୍ରିପଲ ଇଞ୍ଜିନ ସରକାର ବୋଲି କହୁଛନ୍ତି । ମହାନଦୀ ଜଳ କେମିତି ଓଡିଶାକୁ ଆସିବ ସରକାର ସମାଧାନ କରନ୍ତୁ । ରାଜ୍ୟସଭାରେ ବିଜେପିର 84 ଜଣ ସାଂସଦ ଅଛନ୍ତି । ମ୍ୟାଜିକ ନମ୍ବରରୁ କମ ଅଛନ୍ତି । ଏହା ସେମାନଙ୍କୁ ରାଜ୍ୟସଭାରେ ମହଙ୍ଗା ପଡିବ ।"
ସେପଟେ ରାଜ୍ୟସଭା ସାଂସଦ ସୁଲତା ଦେଓ କହିଛନ୍ତି, "ବିଜେଡି ଓଡ଼ିଶାର ସ୍ୱର । ଅତୀତ ଆମେ ହୋଇଥିଲୁ । ଆଗକୁ ମଧ୍ୟ ହେବୁ । ଓଡିଶାର ଅବହେଳାର ପ୍ରତିବାଦ କରିଛୁ, ଆଗକୁ ମଧ୍ୟ କରିବୁ । ନେଟ, ବ୍ୟାଙ୍କ ଯୋଗାଯୋଗ, ଶିକ୍ଷା, କ୍ଷେତ୍ରରେ ଆମକୁ ପଛରେ ରଖାଯାଇଛି । ମହିଳା ବିଲ ପାରିତ କଲେ ହେବନାହିଁ । ଏହାକୁ ଲାଗୁ କରିବା ଦରକାର । ନବୀନଙ୍କ ନେତୃତ୍ୱରେ ଆମ ଲଢେଇ କରିଛୁ ଓ ଆଗକୁ ଜାରି ରହିବ ।" ତେବେ ବିଜେଡିର ସଂସଦୀୟ ଦଳ ବୈଠକରେ ରାଜ୍ୟସଭା ସାଂସଦ ମାନସ ରଂଜନ ମଙ୍ଗରାଜ, ସସ୍ମିତ ପାତ୍ର, ଶୁଭାଶିଷ ଖୁଣ୍ଟିଆ, ସୁଜିତ କୁମାର, ସୁଲତା ଦେଓ, ମୁନା ଖାଁ, ମମତା ମହନ୍ତ, ଦେବାଶିଷ ସାମନ୍ତରାୟ ଓ ନିରଞ୍ଜନ ବିସି ପ୍ରମୁଖ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
