ରାଉରକେଲା: ଚଳିତ ମାସ ୧୨ ତାରିଖ ଦିନ ବିଜେଡିରୁ ପୂର୍ବତନ ବିଧାୟକ ପ୍ରଫୁଲ ମାଝୀଙ୍କୁ ବହିଷ୍କୃତ କରାଯାଇଥିଲେ । ସେ ଦଳ ବିରୋଧୀ କାର୍ଯ୍ୟ କରିବା ଏବଂ ଦଳୀୟ ପ୍ରାର୍ଥୀଙ୍କ ବିରୋଧରେ ପ୍ରଚାର କରିବା ଅଭିଯୋଗରେ ତାଙ୍କୁ ଦଳରୁ ବିଦା କରାଯାଇଥିଲା । ତେବେ ପ୍ରଫୁଲ୍ଲ ତାଙ୍କର ନିଲମ୍ବନକୁ ପ୍ରତ୍ୟାହାର କରି ନେବାକୁ ଦଳମୁଖ୍ୟ ନବୀନ ପଟ୍ଟନାୟକଙ୍କୁ ଅନୁରୋଧ କରିଛନ୍ତି । ଏ ନେଇ ସେ ଏକ ସାମ୍ବାଦିକ ସମ୍ମିଳନୀ କରି ତାଙ୍କ ମତ ପ୍ରକାଶ କରିବା ସହିତ ଦଳର ସୁପ୍ରିମୋଙ୍କୁ ନିବେଦନ କରିଛନ୍ତି ।
ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ, ଦଳ ଚଳିତ ନିର୍ବାଚନରେ ତାଙ୍କୁ ଟିକଟ ନଦେବା କି ନିର୍ବାଚନରେ କୌଣସି ଦାୟିତ୍ଵ ନଦେବାରୁ ସେ ଦୁଃଖିତ ଥିଲେ । ହେଲେ କୌଣସି ଦଳ ବିରୋଧୀ କାର୍ଯ୍ୟ କରିନଥିବା ସେ କହିଛନ୍ତି । ସେ ଆହୁରି ମଧ୍ୟ କହିଛନ୍ତି "ମୁଁ କୌଣସି ଦଳ ବିରୋଧୀ କାର୍ଯ୍ୟ କରି ନଥିବା ବେଳେ ଦଳମୁଖ୍ୟ ତାଙ୍କୁ ତାଗିଦ କିମ୍ବା କାରଣ ଦର୍ଶାଇ ନୋଟିସ ଜାରି ନକରି ହଠାତ ନିଲମ୍ବିତ କରିଛନ୍ତି । ୩ ଥରର ବିଧାୟକ ଓ ଜଣେ ବରିଷ୍ଠ ସଦସ୍ୟ ହୋଇଥିବାରୁ ଦଳ ଏହାର ପୁନଃ ବିଚାର କରି ନିଲମ୍ବନ ପ୍ରତ୍ୟାହାର କରିବା ନେବ ଆବେଦନ କରୁଛି ।"
ଉଲ୍ଲେଖଯୋଗ୍ୟ ବିନୟ ଟପ୍ପାଙ୍କୁ ତଳସରା ବିଧାନସଭା କ୍ଷେତ୍ରର ପ୍ରାର୍ଥୀ କରିବା ପରେ ଆଶାୟୀ ଥିବା ପ୍ରଫୁଲ୍ଲ ନିରାଶ ହୋଇ ପ୍ରଚାରରୁ ନିଜକୁ ଦୂରେଇ ରଖିଥିଲେ । କିଛିଦିନ ତଳେ ବିନୟଙ୍କୁ ଭୋଟ୍ ନଦେବାକୁ ପ୍ରଫୁଲ୍ଲ ନିଜ ସମର୍ଥକ ମାନଙ୍କୁ ଫୋନ୍ ଯୋଗେ ପରାମର୍ଶ ଦେଉଥିବା ଏବଂ ସହକର୍ମୀଙ୍କୁ ଉସୁକାଉଥିବାର ଏକ ଅଡିଓ ଭାଇରାଲ ହେଉଥିଲା । ଯାହା ଆଧାରରେ ତାଙ୍କୁ ଦଳରୁ ନିଲମ୍ବନ କରାଯାଇଛି ।
ପୂର୍ବତନ ବିଧାୟକ ଡଃ ପ୍ରଫୁଲ୍ଲ ମାଝୀ ସୁନ୍ଦରଗଡ଼ ଜିଲ୍ଲାର ତଳସରା ବିଧାନସଭା ନିର୍ବାଚନ ମଣ୍ଡଳୀରୁ ୩ଥର ବିଧାୟକ ଭାବେ ନିର୍ବାଚିତ ହୋଇଥିଲେ । ୨୦୦୬ ଉପନିର୍ବାଚନରେ ସେ ପ୍ରଥମ ଥର ପାଇଁ ବିଧାୟକ ଭାବେ କଂଗ୍ରେସ ଟିକଟରେ ନିର୍ବାଚିତ ହୋଇଥିଲେ । ଗତ ୨୦୨୧ ମସିହା ଡିସେମ୍ବର ମାସରେ ଦଳ ବିରୋଧୀ କାର୍ଯ୍ୟକଳାପ ପାଇଁ କଂଗ୍ରେସରୁ ବହିଷ୍କୃତ ହୋଇଥିଲେ । ଏହାପରେ ତୁରନ୍ତ ୨୦୨୧ ମସିହା ଡିସେମ୍ବର ୧୦ ତାରିଖରେ ବିଜେଡି ଶିବିରରେ ସାମିଲ ହୋଇଥିଲେ ପ୍ରଫୁଲ୍ଲ ।
ଇଟିଭି ଭାରତ, ରାଉରକେଲା
