ଭୁବନେଶ୍ବର: ଭାରତୀୟ ଜନତା ପାର୍ଟୀ ପକ୍ଷରୁ 112ଟି ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା ପରେ ଟିକେଟକୁ ନେଇ କେଁ ଦେଖାଦେଇଛି । ବିଜେପି ରାଜ୍ୟ କାର୍ଯ୍ୟାଳୟ ସମ୍ମୁଖରେ ହଙ୍ଗାମା କରିଛନ୍ତି ଅସନ୍ତୁଷ୍ଟ ନେତା ଓ କର୍ମୀ । ଟିକଟ ବଣ୍ଟାକୁ ନେଇ ବିଜେପି ରାଜ୍ୟ ସଭାପତିଙ୍କୁ ବିରୋଧ କରି ମହାକାଳପଡାର ଆଶାୟୀ ପ୍ରାର୍ଥୀ ସୌଭାଗ୍ୟ ପରିଡାଙ୍କ ସମର୍ଥକମାନେ ପ୍ରତିବାଦ କରିଛନ୍ତି । ସେହିପରି ଧର୍ମଶାଳାରୁ ଟିକେଟ୍ ଆଶାୟୀ ହିମାଂଶୁ ସାହୁଙ୍କ ସମର୍ଥକମାନେ ମଧ୍ୟ ପାର୍ଟୀ ଅଫିସରେ ପାତିତୁଣ୍ଡ କରୁଥିବା ଦେଖିବାକୁ ମିଳିଛି ।
ତେବେ ମହାକାଳପଡ଼ା ବିଧାନସଭା ଆସନ ପାଇଁ ଦୂର୍ଗା ପ୍ରସନ୍ନ ନାୟକଙ୍କୁ ପ୍ରାର୍ଥୀ କରିଛି ବିଜେପି । ଦୂର୍ଗା ପ୍ରସନ୍ନଙ୍କ ପ୍ରାର୍ଥୀତ୍ବକୁ ବିରୋଧ କରି ମହାକାଳପଡ଼ା ଅଞ୍ଚଳର ଶତାଧିକ ବିଜେପି କର୍ମୀ ଆସି ବିଜେପି ରାଜ୍ୟ କାର୍ଯ୍ୟାଳୟ ସମ୍ମୁଖରେ ବସିଛନ୍ତି । ସେମାନଙ୍କ କହିବା ଅନୁସାରେ, ବିଜେପି ଯାହାକୁ ଟିକେଟ ଦେଇଛି (ଦୂର୍ଗା ପ୍ରସନ୍ନ ନାୟକ) ତାଙ୍କ ଟିକେଟକୁ ପ୍ରତ୍ୟାହାର କରୁ । ପ୍ରକୃତରେ ସୌଭାଗ୍ୟ ପରିଡ଼ା ଟିକେଟର ଦାବିଦାର ଥିଲେ । ମହାକାଳପଡ଼ାବାସୀଙ୍କ ସହ ସେ ସବୁବେଳେ ଅଛନ୍ତି । ହେଲେ ବିଜେପି ଯାହାକୁ ଟିକେଟ ଦେଇଛି ତାଙ୍କୁ ସେମାନେ ଜାଣିନାହାନ୍ତି । ତୁରନ୍ତ ବିଜେପି ଦୂର୍ଗା ପ୍ରସନ୍ନଙ୍କୁ ପରିବର୍ତ୍ତନ ନକଲେ ସେମାନେ ପ୍ରତିବାଦ ଜାରି ରଖିବେ ।
ସେପଟେ ଧର୍ମଶାଳା ବିଧାନସଭା ଆସନ ପାଇଁ ବିଜେପି ସ୍ମୃତିରେଖା ପହିଙ୍କୁ ପ୍ରାର୍ଥୀ କରିଛି । ଧର୍ମଶାଳାରୁ ବିଜେପି ଟିକେଟ ଆଶାୟୀ ଥିବା ହିମାଂଶୁ ସାହୁଙ୍କ ସମର୍ଥକମାନେ ଏହାକୁ ଗ୍ରହଣ କରିପାରୁନାହାନ୍ତି । ଧର୍ମଶାଳା ବିଧାନସଭା ଆସନରୁ ବିଜେପି ପ୍ରାର୍ଥୀ ସ୍ମୃତିରେଖା ପହିଙ୍କୁ ପରିବର୍ତ୍ତନ କରି ହିମାଂଶୁ ସାହୁଙ୍କ ପ୍ରାର୍ଥୀ କରିବା ପାଇଁ ଦାବି କରି ହିମାଂଶୁ ସମର୍ଥକମାନେ ଗତକାଲିଠାରୁ ବିଜେପି ରାଜ୍ୟ କାର୍ଯ୍ୟାଳୟରେ ଧାରଣାରେ ଦେଇଛନ୍ତି । ସେପଟେ ବିଜେପି ରାଜ୍ୟ ସଭାପତି ମନମୋହନ ସାମଲ ଗତକାଲି ରାତିରେ ଆଶ୍ୱସନା ଦେବା ପରେ ମଧ୍ୟ ହିମାଂଶୁଙ୍କ ସମର୍ଥକମାନେ ନିଜ ଜିଦରେ ଅଟଳ ଅଛନ୍ତି । ଯଦି ହିମାଂଶୁଙ୍କୁ ଟିକେଟ ନମିଳେ ତାହାଲେ ରାଜ୍ୟ କାର୍ଯ୍ୟାଳୟରେ ବିରୋଧ ଜାରି ରହିବା ସହ ପାର୍ଟୀ ଅଫିସ ଅଚଳ କରିବାକୁ ଉଦ୍ୟମ କରିବେ ବୋଲି କହିଛନ୍ତି । ଏହାସହ ଯଦି ହିମାଂଶୁ ଟିକେଟ୍ ନମିଳେ ତେବେ ତାଙ୍କର ହଜାର ହଜାର ସମର୍ଥକ ଇସ୍ତଫା ଦେବେ ବୋଲି ମଧ୍ୟ ଧମକ ଦେଇଛନ୍ତି ।
ସେପଟେ ବିଜେପି ରାଜ୍ୟ କାର୍ଯ୍ୟାଳୟରେ ଅସନ୍ତୋଷ ଆଶାୟୀ ସମର୍ଥକଙ୍କ ଭିଡ଼କୁ ନେଇ ପ୍ରତିକ୍ରିୟା ରଖି ରାଜ୍ୟ ବିଜେପି ଉପସଭାପତି ଗୋଲୋକ ମହାପାତ୍ର କହିଛନ୍ତି, "କ୍ରିକେଟ ଖେଳରେ ଜଣେ ଭଲ ଷ୍ଟାର ଆସିଲେ ଲୋକଙ୍କ ମଧ୍ୟରେ ପାଟିତୁଣ୍ଡ ହୁଏ, କିଏ ଟିକେଟ ନେବ । ସେଠାରେ ବ୍ୟାରିକେଡ଼ ଭାଙ୍ଗେ, ପୋଲିସକୁ ଲାଠି ଚାଳନା କରିବାକୁ ପଡିଥାଏ । ଏହାର ଅର୍ଥ ଖେଳାଳିମାନଙ୍କୁ ଲୋକ କେତେ ଭଲ ପାଉଛନ୍ତି ତାହା ଜଣାପଡ଼ିଥାଏ । ଅନୂରୁପ ଭାବରେ ବିଜେପି ରାଜ୍ୟ କାର୍ଯ୍ୟାଳୟ ସମ୍ମୁଖରେ ଯେଉଁମାନେ ବିକ୍ଷୋଭ ପ୍ରଦର୍ଶନ କରୁଛନ୍ତି, ସେମାନେ ସମସ୍ତେ ଭାରତୀୟ ଜନତା ପାର୍ଟୀକୁ ଭଲ ପାଉଥିବାରୁ ସେମାନେ ଏଠାକୁ ଆସି ବିକ୍ଷୋଭ କରୁଛନ୍ତି । କ୍ରିକେଟ ଖେଳାଳି ପ୍ରତି ଯେମିତି ଆଗ୍ରହ ରହିଥାଏ ସେହିଭଳି ଏଠି ବିଜେପି ପ୍ରତି ଲୋକଙ୍କର ଆଗ୍ରହ ରହିଛି, ନଚେତ ସେମାନେ ପଳେଇଥାନ୍ତେ । ଭାରତୀୟ ଜନତା ପାର୍ଟୀ ପ୍ରତି ଓଡିଶାରେ ଆଗ୍ରହ ବଢୁଛି, ଏହା ସ୍ୱାଗତ ଯୋଗ୍ୟ ପଦକ୍ଷେପ । ଏଥିରୁ ସ୍ପଷ୍ଟ ଓଡିଶାରେ ଭାରତୀୟ ଜନତା ପାର୍ଟୀ ଓଡି଼ଶାରେ ସରକାର କରିବ ।"
ଇଟିଭି ଭାରତ, ଭୁବନେଶ୍ବର
