ପାରଳାଖେମୁଣ୍ଡି: ଦିନିକିଆ ପାରଳାଖେମୁଣ୍ଡି ଗସ୍ତରେ ବିଜେପିର ବ୍ରହ୍ମପୁର ସାଂସଦ ପ୍ରାର୍ଥୀ ଡ.ପ୍ରଦୀପ ପାଣିଗ୍ରାହୀ । ସେ ପାରଳାଖେମୁଣ୍ଡିରେ ପହଞ୍ଚିବା ପରେ ସ୍ଥାନୀୟ ବିଜେପି କର୍ମୀମାନେ ଏକ ଶୋଭାଯାତ୍ରା ମାଧ୍ୟମରେ ଭବ୍ୟ ସ୍ବାଗତ କରି ଦଳୀୟ କାର୍ଯ୍ୟାଳୟକୁ ପାଛୋଟି ଆଣିଥିଲେ । ସେଠାରେ ଜିଲ୍ଲା ବିଜେପି ସଭାପତି ତଥା ପାରଳାଖେମୁଣ୍ଡି ବିଧାୟକ କେ.ନାରାୟଣ ରାଓଙ୍କ ଅଧ୍ୟକ୍ଷତାରେ ଅନୁଷ୍ଠିତ କର୍ମୀ ସମ୍ମିଳନୀରେ ଯୋଗଦେଇଥିଲେ ପ୍ରଦୀପ । ରାଜ୍ୟରେ ସରକାର ଗଢିବା ନେଇ ଦମ୍ଭୋକ୍ତି ପ୍ରକାଶ କରିବା ସହ ଦଳୀୟ କର୍ମୀଙ୍କୁ ଆହ୍ୱାନ ଦେଇଛନ୍ତି ପ୍ରଦୀପ ।
ପ୍ରଦୀପ କହିଛନ୍ତି, "ରାଜ୍ୟରେ ଶାସନ କରୁଥିବା ବିଜେଡି ନେତୃତ୍ବାଧୀନ ସରକାରକୁ ଲୋକେ ପରିବର୍ତ୍ତନ କରି ବିଜେପି ସରକାର ହେବା ନିଶ୍ଚିତ । ଏଥିପାଇଁ ଲୋକେ ମନସ୍ଥ କରି ସାରିଛନ୍ତି । ରାଜ୍ୟରେ ବହୁଥିବା ପରିବର୍ତ୍ତନର ହାୱାକୁ କେହି ରୋକି ପାରିବେ ନାହିଁ । ଥରେ ଲୋକେ ମନ ବଦଳାଇଲେ ଅବସ୍ଥା କ’ଣ ହୁଏ ତାହା ବିଗତ ଦିନର ସରକାରଙ୍କ କ୍ଷେତ୍ରରେ ସମସ୍ତେ ଦେଖିଛନ୍ତି । ତେଣୁ ସରକାର ଯେତେ ପ୍ରଶାସନିକ କଳ କିମ୍ବା ବାହୁବଳକୁ ବ୍ୟବହାର କଲେ ମଧ୍ୟ କିଛି ଫରକ ପଡିବ ନାହିଁ । ଏଥର ରାଜ୍ୟରେ ସରକାର ପରିବର୍ତ୍ତନ ହେବା ଥୟ ।"
ସେ ଆହୁରି କହିଛନ୍ତି , "ଦିନ ଥିଲା ଦେଶରେ ଇନ୍ଦିରା ଗାନ୍ଧୀ ମଧ୍ୟ ବହୁ ପ୍ରଭାବଶାଳୀ ମହିଳା ପ୍ରଧାନମନ୍ତ୍ରୀ ରହିଥିଲେ । କିନ୍ତୁ ଲୋକେ ଚାହିଁବାରୁ ତାଙ୍କୁ ମଧ୍ୟ ପରିବର୍ତ୍ତନ କରିଦେଇଥିଲେ । ଆଉ ରାଜ୍ୟରେ ସରକାରରେ ଥିବା ବିଜେଡିରେ ତ ଅନେକ ଫାଟ । ସେହି ଦଳ ବର୍ତ୍ତମାନ ବିଭିନ୍ନ ଗୋଷ୍ଠୀରେ ବିଭାଜିତ । ତେଣୁ ସେମାନଙ୍କୁ ପରିବର୍ତ୍ତନ ପାଇଁ ଲୋକେ ଯେଉଁ ନିଷ୍ପତ୍ତି ନେଇଛନ୍ତି ତାହାକୁ ବିଜେଡି କିଭଳି ରୋକି ପାରିବ । ଗଣତନ୍ତ୍ର ମନ୍ଦିରରେ ଭୋଟର ହେଉଛନ୍ତି ସର୍ବେସର୍ବା । ସେମାନଙ୍କ ବିନା ନା କୌଣସି ଦଳ କୌଣସି ପ୍ରାର୍ଥୀ କାହାର କିଛି ସ୍ଥିତି ହିଁ ନାହିଁ ।"
ପ୍ରଦୀପ ପାଣିଗ୍ରାହୀ ବିଜେପିରେ ସାମିଲ ହେବା ଏବଂ ତାଙ୍କୁ ବିଜେପି ବ୍ରହ୍ମପୁର ସଂସଦୀୟ କ୍ଷେତ୍ରର ପ୍ରାର୍ଥୀ କରିବା ପରେ ପ୍ରଥମ ଥର ପାଇଁ ସେ ପାରଳାଖେମୁଣ୍ଡି ଗସ୍ତରେ ଆସିଥିଲେ । ଏହି ଅବସରରେ ବିଜୁ ଯୁବ ଜନତା ଦଳର ରାଜ୍ୟ ଉପସଭାପତି ଦେବୀ ପ୍ରସାଦ ଦାଶ ଏବଂ ପୂର୍ବତନ ଆୟକର ଅଧିକାରୀ ତ୍ରିନାଥ କାର୍ଯୀ ଏବଂ ବରିଷ୍ଠ ଆଇନଜୀବି ଏମ.ପୃଥ୍ବୀରାଜ ଆନୁଷ୍ଠାନିକ ଭାବେ ବିଜେପିରେ ସାମିଲ ହୋଇଛନ୍ତି । ଦେବୀ ଅନେକ ଦିନ ହେଲା ବିଜେଡିରୁ ଇସ୍ତଫା ଦେଇସାରିଥିଲେ । ସେମାନଙ୍କ ଯୋଗଦାନ ଦଳକୁ ଅଧିକ ମଜବୁତ କରିବ ବୋଲି ବିଜେପି ପକ୍ଷରୁ କୁହାଯାଇଛି । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ଲୋକସଭା ନିର୍ବାଚନ ମଣ୍ଡଳୀ ପ୍ରଭାରୀ ଅଶୋକ ମିଶ୍ର, ରାଜ୍ୟ ସାଧାରଣ ସମ୍ପାଦକ ସାରଦା ଶତପଥୀ, ଗଜପତି ଜିଲ୍ଲା ବିଜେପି ପ୍ରଭାରୀ ସରୋଜ ସାବତ ଓ ରାଜ୍ୟ କାର୍ଯ୍ୟକାରିଣୀ ସଦସ୍ୟ ସିଦ୍ଧେଶ୍ବର ମିଶ୍ର ପ୍ରମୁଖ ଉପସ୍ଥିତ ଥିଲେ ।
ଇଟିଭି ଭାରତ, ଗଜପତି
