ଭୁବନେଶ୍ବର: ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପି । ବିଜେଡି ବିରୁଦ୍ଧରେ ଆଚରଣ ବିଧି ଉଲ୍ଲଘଂନ ଅଭିଯୋଗ ଆଣିଛି ବିଜେପି । ଏନେଇ ବିଜେପିର ଏକ ପ୍ରତିନିଧି ଦଳ ସିଇଓଙ୍କୁ ଭେଟିଛି । ଏ ସମ୍ପର୍କରେ ବିଜେପି ମୁଖପାତ୍ର ଦିଲ୍ଲୀପ ମଲ୍ଲିକ କହିଛନ୍ତି ଯେ ସରକାରୀ ଅଧିକାରୀ ମାନେ ବିଜେଡ଼ି ପାଇଁ ପ୍ରଚାର କରୁଛନ୍ତି । ଆଠଗଡ଼ ନିର୍ବାଚନ ମଣ୍ଡଳୀରେ ବିଜେଡ଼ି ବ୍ୟାନର ଥିବା ମଞ୍ଚରେ ବସିଥିଲେ ପୋଲିସ କର୍ମଚାରୀ ।
ଇଦୁଲ ଫିତର ନାଁରେ ଚୌଦ୍ଵାର ଥାନା ଆଇଆଇସି ବିଶ୍ଵ ରଞ୍ଜନ ସାହୁ ଏବଂ ଏସଆଇ ସରସ୍ଵତୀ ସାହୁ ଗୋଟିଏ ମଞ୍ଚରେ ବିଜେଡ଼ି ନେତାଙ୍କ ସହ ବସି ଭାଷଣ ମଧ୍ୟ ଦେଉଥିଲେ । ଆଠଗଡ଼ ସରକାରୀ ମେଡିକାଲର କ୍ଲର୍କ ସନ୍ତୋଷ ମିଶ୍ର ମଧ୍ୟ ଆଠଗଡ଼ ବିଜେଡ଼ି ପ୍ରାର୍ଥୀ ରଣେନ୍ଦ୍ର ପ୍ରତାପ ସ୍ଵାଇଁଙ୍କ ସହ ପ୍ରଚାରରେ ସାମିଲ ହୋଇଥିଲେ । ଏଠି ପ୍ରଶ୍ନ ଉଠେ ନିର୍ବାଚନ ଆଚରଣବିଧି ଲାଗୁ ପରେ ଏମାନେ ଏପରି କାର୍ଯ୍ୟ କେମିତି କରୁଛନ୍ତି । ଜଣେ ସରକାରୀ କର୍ମଚାରୀ ଦଳୀୟ ସଭାରେ ଉଦବୋଧନ ଦେବା ଏହା ଆଚରଣବିଧି ଉଲ୍ଲଘଂନ ।
ଏହା ମଧ୍ୟ ପଢନ୍ତୁ... ଆଦର୍ଶ ଆଚରଣ ବିଧି ଉଲ୍ଲଙ୍ଘନ କରିବା ବିଜେପିର ଅଭ୍ୟାସ ହୋଇଗଲାଣି: ବିଜେଡି - BJD MEETS CEO
ସେହିପରି ଚାନ୍ଦବାଲି ବିଜେଡ଼ି ପ୍ରାର୍ଥୀ ବ୍ୟୋମକେଶ ରାୟଙ୍କ ପାଇଁ ପ୍ରଚାର କରୁଥିଲେ ଭଦ୍ରକ ଜିଲ୍ଲା ସାଳନ୍ଦୀ ଡିଭିଜନର ଜଳସେଚନ କାର୍ଯ୍ୟାଳୟର କର୍ମଚାରୀ ପରମେଶ୍ବର ମଲ୍ଲିକ । ଯାହାକି ନିର୍ବାଚନ ଆଦର୍ଶ ଆଚରଣ ବିଧିର ଉଲ୍ଲଘଂନ ବୋଲି ଅଭିଯୋଗ କରିଛି ବିଜେପି । ଏହାସହ ବଲାଙ୍ଗୀର ଜିଲ୍ଲାରେ ମିଶନ ଶକ୍ତି ପ୍ରକଳ୍ପ ମ୍ୟାନେଜର ସୁମନ ଦ୍ବିବେଦୀ ବିଜେଡିର ଭୋଟ ପାଇଁ ଏସଏଚଜି ଗ୍ରୁପ ମହିଳା ମାନଙ୍କୁ ଫୋନ୍ କରି କହୁଛନ୍ତି ବୋଲି ଅଭିଯୋଗ କରିଛି ଦଳ । ସବୁ ଫଟୋ ପ୍ରମାଣ ସହ ମୁଖ୍ୟ ନିର୍ବାଚନରେ ଅଧିକାରୀଙ୍କ ଠାରେ ଅଭିଯୋଗ କରିଛି ବିଜେପି ପ୍ରତିନିଧି ଦଳ । ତେଣୁ ଆଦର୍ଶ ଆଚରଣ ବିଧି ଉଲଙ୍ଘନ କରିଥିବା ଏହି ସରକାରୀ କର୍ମଚାରୀ ମାନଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ସହ ତୁରନ୍ତ ଚାକିରିରୁ ବହିଷ୍କାର କରାଯାଉ ବୋଲି ସିଇଓ ଠାରେ ଦାବି କରିଛି ବିଜେପି ।
ନିର୍ବାଚନ ପରିପ୍ରେକ୍ଷୀରେ ବିଜେପି ଓ ବିଜେଡି ପରସ୍ପର ପ୍ରତି କାଦୁଅ ଫିଙ୍ଗା ଥମିନାହିଁ । ଆଜି ବିଜେଡି କେନ୍ଦୁଝର ବିଧାୟକ ତଥା ବିଜେପି ନେତା ମୋହନ ଚରଣ ମାଝୀ ଆଦର୍ଶ ଆଚରଣ ବିଧି ଉଲ୍ଲଙ୍ଘନ କରିଥିବା ଅଭିଯୋଗ କରିଛି । ମୋହନ ଶିକ୍ଷାନୁଷ୍ଠାନରେ ରାଜନୈତିକ କାର୍ଯ୍ୟକ୍ରମ କରିଥିବା ଅଭିଯୋଗ ଆଣିଛି ବିଜେଡି । କେନ୍ଦୁଝର ମୋହନ ଚରଣ ମାଝୀ ବିଧାୟକ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦଳ ଦାବି କରିଛି ।
ଇଟିଭି ଭାରତ, ଭୁବନେଶ୍ବର
