ଭୁବନେଶ୍ବର: ସାଧାରଣ ନିର୍ବାଚନ ପୂର୍ବରୁ ବିଜେପି ଛାଡ଼ୁଛନ୍ତି ଜଣେ ପରେ ଜଣେ ହେଭିୱେଟ୍ ନେତା । ଭୃଗୁ ବକ୍ସିପାତ୍ର, ସୋନାଲି ସାହୁ, ରଘୁନାଥ ମହାନ୍ତି, ପ୍ରକାଶ ବେହେରା, ବିଧାୟକ ସୁକାନ୍ତ ନାୟକ, ଛୋଟେଲାଲ ମହନ୍ତ, ଇରାନୀ ରାୟ, ସୁଶାନ୍ତ ମିଶ୍ର ଓ ଭାଗିରଥୀ ପ୍ରଧାନଙ୍କ ଭଳି ବରିଷ୍ଠ ନେତା ନିକଟରେ ବିଜେପି ଛାଡ଼ି ଅନ୍ୟ ଦଳକୁ ଯାଇଛନ୍ତି । ଏହି କ୍ରମରେ ଆଜି ବିଜେପିକୁ ଝଟ୍କା ଦେଇ ଦଳ ଛାଡ଼ିଛନ୍ତି ଦଳର ଉପସଭାପତି ଲେଖାଶ୍ରୀ ସାମନ୍ତସିଂହାର । ସେ ଆଜି ସକାଳେ ବିଜେପି ଛାଡିବାର କିଛି ସମୟ ମଧ୍ୟରେ ବିଜେଡିର ସାମିଲ ହୋଇଛନ୍ତି । ଏନେଇ ପ୍ରତିକ୍ରିୟା ରଖିଛନ୍ତି ରାଜ୍ୟ ବିଜେପି ଉପସଭାପତି ଗୋଲକ ମହାପାତ୍ର ।
ଗୋଲୋକ ମହାପାତ୍ର କହିଛନ୍ତି, "ଆଜି କଣ ବିଜେଡି ହଠାତ୍ ଭଲ ହୋଇଗଲା ? ଯେଉଁ ଦଳକୁ କହୁଥିଲୁ ଯେ ସେଠି ଅଣଓଡ଼ିଆ ଶାସନ ଚାଲିଛି, ଲୋକଙ୍କ ପାଖରେ ସେବା ପହଞ୍ଚି ପାରୁନାହିଁ, ତାହେଲେ ସେ କଥା ସବୁ ଆମେ ଠିକ୍ କହୁନଥିଲୁ । କେବଳ ସ୍ବାର୍ଥ କଥା ବୋଧେ ଆମେ ଚିନ୍ତା କରୁଥିଲୁ । ତେଣୁ ଯେଉଁମାନେ ଏ କଥା ଚିନ୍ତା କରୁଛନ୍ତି, ସେମାନେ ନିଜ କଥା ଚିନ୍ତା କରୁଛନ୍ତି । ଦଳ, ଦେଶ ଓ ମାଟି କଥା ସେମାନେ ଚିନ୍ତା କରୁନାହାନ୍ତି । ଏହି ଖଣ୍ଡେ ଟିକେଟ ଆମ ପାଇଁ ବଡ଼ କଥା ନୁହେଁ । ଆମ ପାଇଁ ଓଡ଼ିଶା ବିକାଶ, ଭାରତର ସେବା ବଡ଼ । ବିଜେପି ନେତାଙ୍କ ସତ୍ତା ପ୍ରାପ୍ତିର ଲକ୍ଷ୍ୟ ନାହିଁ । ଲୋକଙ୍କୁ ସୁଶାସନ ଯୋଗାଇବା ଦଳର ଲକ୍ଷ୍ୟ । ତେଣୁ ଯୋଗ୍ୟ ବ୍ୟକ୍ତି ବାହାରୁ ଆସିଲେ, ତାଙ୍କୁ ମଧ୍ୟ ଦଳରେ ଦାୟିତ୍ଵ ଦିଆଯିବ । ଏ ଦଳ ହେଉଛି ଆମର ମାଆ, ଦଳକୁ ଆମେ ଭଲ ପାଉଛୁ । ତେଣୁ କିଛି ଲୋକଙ୍କୁ ଦଳରୁ ଟିକେଟ ମିଳିନପାରେ । ଓଡ଼ିଶାର ସେବା ଓ ଭାରତ ମାତାର ସେବା ବିଜେପି ନେତାଙ୍କ ଲକ୍ଷ୍ୟ । ତେଣୁ ବିଜୁ ଜନତା ଦଳ ବିରୋଧରେ ଲଢେଇ କରୁଛି ବିଜେପି ।"
ସେହିପରି ଦଳରେ ଟିକେଟ ଆଶାୟୀଙ୍କ ବିଦ୍ରୋହ ବଢ଼ିବା ପ୍ରସଙ୍ଗରେ ଗୋଲକ କହିଛନ୍ତି, "ଯେତେବେଳେ ଗୋଟିଏ ଦଳ ଶାସନ କ୍ଷମତାକୁ ଆସିବାକୁ ଯାଉଥାଏ, ସେତେବେଳେ ଅନେକ ଲୋକ ଚାହାଁନ୍ତି ସେ ଦଳରୁ ଟିକେଟ ପାଇବାକୁ । ତେଣୁ ପ୍ରତ୍ୟେକ ଜାଗାରେ ଅନେକ ଆଶାୟୀ ପ୍ରାର୍ଥୀ ଅଛନ୍ତି ।" ପ୍ରକାଶ ଥାଉ, ଆଜି ବିଜେଡିରେ ସାମିଲ ହେବାପରେ ବିଜେପିକୁ ଟାର୍ଗେଟ କରିଥିଲେ ଲେଖାଶ୍ରୀ । ସେ କହିଥିଲେ, "ବର୍ଷ ବର୍ଷ ଧରି ମୁଁ ବିଜେପିକୁ ସର୍ବସ୍ବ ଦେଇଛି । ଓଡ଼ିଶାବାସୀଙ୍କ ସେବା କରିବାର ଇଚ୍ଛା ଥିଲା, ତାହା ବିଜେପି ପୂରଣ କରିବାକୁ ଦେଲାନି । ଏତେ ପରିଶ୍ରମ କରି ବି ଦଳର ନେତୃତ୍ବ ମୋ ଉପରେ ଭରସା କଲେନି । ମୋ ପାଇଁ ବିଜେପିରେ ଏତିକି କାମଥିଲା ବୋଲି ଭାବିଲି ଆଉ ଆଗକୁ ବଢ଼ିବା ପାଇଁ ବିଜେଡିରେ ସାମିଲ ହେଲି ।"
ଇଟିଭି ଭାରତ, ଭୁବନେଶ୍ବର
