ଭୁବନେଶ୍ୱର: ରାଜ୍ୟରେ ବିଜେପି-ବିଜେଡି ମେଣ୍ଟ ନେଇ ଲାଗି ରହିଛି ଦ୍ବନ୍ଦ୍ବ । ମେଣ୍ଟ ନେଇ ଖୁବଶୀଘ୍ର ସ୍ପଷ୍ଟ ହୋଇପାରେ ଚିତ୍ର । ଆଜି ବସିବ ବିଜେଡିର ଗୁରୁତ୍ୱପୂର୍ଣ୍ଣ ବୈଠକ । ଅପରାହ୍ନରେ ନବୀନ ନିବାସରେ ବିଜେଡି ସୁପ୍ରିମୋ ନବୀନଙ୍କ ଅଧ୍ୟକ୍ଷତାରେ ବସିବ ଏହି ବୈଠକ । ଦଳର ବରିଷ୍ଠ ନେତା ଓ ଜିଲ୍ଲା ପର୍ଯ୍ୟବେକ୍ଷକ ବୈଠକରେ ସାମିଲ ହେବେ । ରାଜ୍ୟ ବିଜେପି ସଭାପତି ମନମୋହନ ସାମଲ ଦିଲ୍ଲୀରେ ଶୀର୍ଷ ନେତୃତ୍ବଙ୍କ ସହ ବୈଠକ ସାରି ଫେରିବା ପରେ, ଆଜି ବିଜେଡିର ବୈଠକ ବସୁଛି । ଯାହା ମେଣ୍ଟ ସସପେନ୍ସ ଉପରୁ ପରଦା ହଟାଇବା ସହ କିଛି ବଡ଼ ନିଷ୍ପତ୍ତି ନେଇ ପାରନ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ ।
ଏହା ମଧ୍ୟ ପଢନ୍ତୁ-ବିଜେଡି-ବିଜେପି ମେଣ୍ଟ ଚର୍ଚ୍ଚାକୁ ନେଇ ମୁହଁ ଖେଲିଲେ ମନମୋହନ, ' ସବୁ ଠିକ୍ ଠାକ୍ ଚାଲିଛି'
ବୈଠକରେ ମେଣ୍ଟ ନେଇ ଚୂଡାନ୍ତ ନିଷ୍ପତ୍ତି ଆସିପାରେ ବୋଲି ଚର୍ଚ୍ଚା ହେଉଛି । ବିଶେଷକରି ଆସନ ବୁଝାମଣାକୁ ନେଇ ଲାଗି ରହିଥିବା ଦ୍ଵନ୍ଦ୍ବର ପରି ସମାପ୍ତୀ ଘଟିପାରେ । ସେପଟେ ଆଜି ଦିଲ୍ଲୀରେ ବୈଠକ ସାରି ଭୁବନେଶ୍ୱର ଫେରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ସେ ଖୋଲା ଖୋଲି ଭାବେ ମେଣ୍ଟ ନେଇ କୌଣସି ସଠିକ ସଂକେତ ଦେଇନଥିଲେ ମଧ୍ୟ ଇସାରା ଦେଇଛନ୍ତି ଯେ, ସବୁକିଛି ଠିକଠାକ୍ ଚାଲିଛି । ଆମର ଯାହା ପ୍ରକ୍ରିୟା ତାହା କରାଯାଉଛି, ସବୁ ବିଷୟରେ ଆଲୋଚନା ହେଉଛି ବୋଲି କହିଥିଲେ ମନମୋହନ । ତାଙ୍କର ଏପରି ବୟାନ ସ୍ପଷ୍ଟ କରୁଛି ଯେ, ଦିଲ୍ଲୀରେ ମେଣ୍ଟ ନେଇ ଆଲୋଚନା ଚାଲିଛି । ରାଜନୈତିକ ମହଲରେ ଆଲୋଚନା ହେଉଥିବା ଚର୍ଚ୍ଚା ଅନୁସାରେ ଆସନ ଭାଗବଣ୍ଟା ଚିଣ୍ଡୁ ନଥିବା କାରଣରୁ ମେଣ୍ଟ ଘୋଷଣାରେ ବିଳମ୍ବ ହେଉଛି ।
ବିଜେଡି-ବିଜେପି ମେଣ୍ଟ ଚର୍ଚ୍ଚାରେ ନେଇ ସରଗରମ ରହିଛି ରାଜ୍ୟ ରାଜନୀତି । ବସୁଛି ଘନ ଘନ ବୈଠକ, ଛିଡ଼ୁନି ଅଙ୍କ । ଏପଟେ ବିଜେପି-ବିଜେଡି ମଧ୍ୟରେ ମେଣ୍ଟକୁ ନେଇ ରାଜନୈତିକ ବୟାନବାଜି ମଧ୍ୟ ଜୋର ଧରିଛି । ଗତ ସପ୍ତାହେ ଧରି ରାଜନୈତିକ ଦଳ ଗୁଡିକ ତୁହାକୁ ତୁହା ବୈଠକ କରୁଛନ୍ତି । ବିଜେପି ରାଜ୍ୟ ନେତୃତ୍ବ ବାରମ୍ବାର ମେଣ୍ଟ ହେବ ନାହିଁ ବୋଲି କହୁଥିବା ବେଳେ ଦିଲ୍ଲୀରୁ ଡାକରା ଆସୁଛି ରାଜ୍ୟ ସଭାପତିଙ୍କୁ । ତେଣୁ କେଉଁଠି ନା କେଉଁଠି ମେଣ୍ଟ ସମ୍ଭାବନାକୁ ଏଡାଇ ଦିଆଯାଇ ପାରୁନାହିଁ ।
ଇଟିଭି ଭାରତ, ଭୁବନେଶ୍ୱର
