ରାଉରକେଲା: ନିକଟରେ ସୁନ୍ଦରଗଡ଼ ବିଧାନସଭା ଆସନ ପାଇଁ ବିଜେପି ଓ କଂଗ୍ରେସ ପ୍ରାର୍ଥୀ ଘୋଷଣା କରିଛନ୍ତି । ବର୍ତ୍ତମାନର ବିଧାୟିକା କୁସୁମ ଟେଟେଙ୍କୁ ବିଜେପି ପୁଣି ଭରସା କରି ପ୍ରାର୍ଥୀ କରିଥିବା ବେଳେ କଂଗ୍ରେସ ପକ୍ଷରୁ ସୁଧାରାଣୀ ରାଉଡିଆଙ୍କ ନାମ ଘୋଷଣା କରାଯାଇଛି । ତେବେ ବିଜୁ ଜନତା ଦଳ (ବିଜେଡି) ଏଯାଏଁ ନିଜର ପ୍ରାର୍ଥୀ ଘୋଷଣା କରିନାହିଁ । ବିଜେପି ବିଧାୟିକା କୁସୁମ ଟେଟେ ଟିକେଟ ପାଇବା ପରେ ଶୀର୍ଷ ନେତୃତ୍ବଙ୍କୁ ଧନ୍ୟବାଦ କରିବା ସହ ଚଳିତ ନିର୍ବାଚନରେ କେନ୍ଦ୍ର ସରକାରଙ୍କ ଉନ୍ନତି ଓ ବିକାଶ ମୂଳକ ପଦକ୍ଷେପ ଉପରେ ଗୁରୁତ୍ବ ଦେବାକୁ ସଙ୍କଳ୍ପ ନେଇଛନ୍ତି । ଏଥର ମଧ୍ୟ ଗତଥର ଭଳି ସୁନ୍ଦରଗଡ଼ ଆସନକୁ ବିଜେପି ହିଁ ଜିତିବ ବୋଲି ସେ ପ୍ରତିକ୍ରିୟା ଦେଇଛନ୍ତି ।
ଅନ୍ୟପକ୍ଷରେ ସୁଧାରାଣୀ ରାଉଡିଆ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଭିତରେ ଥିବା ଜନ ଅବହେଳା ଓ ଦୁର୍ନୀତି ବିରୋଧରେ ନିଜକୁ ଏକ ବିରୋଧୀ ନେତା ଭାବେ ସ୍ଥାନିତ କରି ଏଥର ବିପୁଳ ମାତ୍ରାରେ କଂଗ୍ରେସ ସୁନ୍ଦରଗଡ଼ ଆସନରେ ବିଜୟ ହେବ ବୋଲି ସେ କହିଛନ୍ତି । ସବୁଠାରୁ ରୋଚକ କଥା ହେଉଛି ଏହି ଆସନରେ ଆଜି ପର୍ଯ୍ୟନ୍ତ କେବେ ଶଙ୍ଖ ଦଳ ବିଜୟୀ ହୋଇପାରିନାହିଁ । ତେବେ ଏହି ନିର୍ବାଚନ ମଣ୍ଡଳୀରେ ଏଯାବତ କେବଳ କଂଗ୍ରେସ ଏବଂ ବିଜେପି ହିଁ ବିଜୟ ହୋଇଛନ୍ତି । ତେବେ ବର୍ତ୍ତମାନ ଯାଏ ଦୁଇ ମହିଳାଙ୍କ ନାଁ ରେ ଉଭୟ ବିଜେପି ଏବଂ କଂଗ୍ରେସ ମୋହର ମାରିଥିବା ବେଳେ ବିଜେଡି କାହାକୁ ଟିକେଟ ଦେଉଛି ତାହା ଉପରେ ରହିଛି ନଜର ।
ଏହା ମଧ୍ୟ ପଢନ୍ତୁ...ଖଡ଼ିଆଳ ବିଧାନସଭା ଆସନରେ ବିଜେପି ପ୍ରାର୍ଥୀ ହେଲେ ହିତେଶ କୁମାର ବଗର୍ତ୍ତି - Khariar Assembly Constituency
କୁସୁମ ଟେଟେ ତାଙ୍କ ବିଧାୟକତ୍ବ କାଳରେ ପ୍ରଦର୍ଶନର ନିରନ୍ତରତା ଓ ସମର୍ଥନ ପ୍ରତି ଥିବା ପ୍ରତିବଦ୍ଧତାକୁ ନେଇ ଲଢ଼ିବେ । କେନ୍ଦ୍ର ସରକାରଙ୍କ ବିକାଶ ଏଜେଣ୍ଡା ସହ ମୋଦି ଗ୍ୟାରେଣ୍ଟିର ତାଳ ଦେଇ କୁସୁମ ଟେଟେ ଯେଉଁ ଗୁରୁତ୍ବ ଦେଉଛନ୍ତି, ତାହା ସ୍ଥାନୀୟ ସ୍ତରରେ ନିଜର ନିର୍ବାଚନୀ ସମ୍ଭାବନାକୁ ସୁଦୃଢ଼ କରିବା ପାଇଁ ଜାତୀୟ ସ୍ତରର ସଫଳତାର ଲାଭ ଉଠାଇବା ପାଇଁ ବିଜେପିର ରଣନୀତିକୁ ପ୍ରତିଫଳିତ କରୁଛି । ସେପଟେ କଂଗ୍ରେସ ପାଇଁ ସୁଧାରାଣୀ ରାଉଡିଆଙ୍କ ପ୍ରାର୍ଥୀ ହେବା ବର୍ତ୍ତମାନର ବିଜେପି ବିଧାୟକଙ୍କୁ ଚ୍ୟାଲେଞ୍ଜ କରିବା ସହ ଶାସନ ପାଇଁ ବିକଳ୍ପ ଦୃଷ୍ଟିଭଙ୍ଗୀ ଉପସ୍ଥାପନ କରିବା ଦଳର ଦୃଢ ମନୋବଳକୁ ସୂଚାଉଛି । ଜନ ଅବହେଳା ଓ ଦୁର୍ନୀତି ଅଭିୟୋଗର ପ୍ରସଙ୍ଗକୁ ଗୁରୁତ୍ବ ଦେଇ ରାଉଡିଆ ଶାସକ ଦଳର ଟ୍ରାକ୍ ରେକର୍ଡକୁ ନେଇ ଅସନ୍ତୁଷ୍ଟ ଭୋଟରଙ୍କ ସହ ସ୍ବର ମିଳାଇବାକୁ ଲକ୍ଷ୍ୟ ରଖିଛନ୍ତି ।
ଇଟିଭି ଭାରତ, ରାଉରକେଲା
