କଟକ: ବିଜେପିର ଲୋକସଭା ସାଂସଦ ବନାମ ବିଜେଡିର ରାଜ୍ୟସଭା ସାଂସଦ । ଭର୍ତ୍ତୃହରି ଓ ଦେବାଶିଷଙ୍କ କଳିକୁ ନେଇ ଚର୍ଚ୍ଚା । ଦିନକୁ ଦିନ ଉଷ୍ମ ହେବାରେ ଲାଗିଛି କଟକ ରାଜନୀତି । ଗତକାଲି (ଗୁରୁବାର) ମାହାଙ୍ଗାରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ 'ଅଳିଆ ହଟିବ ଏବଂ ବହୁତ ଲୋକ ଜେଲ ଯିବେ' ବୋଲି କହିଥିଲେ ଭର୍ତ୍ତୃହରି ମହତାବ । ତେବେ ଭର୍ତ୍ତୃହରିଙ୍କ ମନ୍ତବ୍ୟ ଉପରେ ଆଜି ପ୍ରତିକ୍ରିୟା ରଖିଛନ୍ତି ବିଜେଡିର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ସେ ଭର୍ତ୍ତୃହରିଙ୍କୁ କଡ଼ା ସମାଲୋଚନା ମଧ୍ୟ କରିଛନ୍ତି ।
ରାଜ୍ୟସଭା ସାଂସଦ ତଥା କଟକ ଜିଲ୍ଲା ବିଜେଡି ସଭାପତି ଦେବାଶିଷ ସାମନ୍ତରାୟ କହିଛନ୍ତି, "ଭର୍ତ୍ତୃହରି ସ୍ପଷ୍ଟ କରନ୍ତୁ ଯେ ଅଳିଆ କିଏ ଏବଂ ତାଙ୍କ ଦଳରେ ଅଳିଆ ଅଛନ୍ତି ନା ଆମ ଦଳରେ ଅଳିଆ ଅଛନ୍ତି । ସେ ଅଳିଆ କିଏ ସ୍ପଷ୍ଟ କରି କହିଥିଲେ ଭଲ ହୋଇଥାନ୍ତା । କାହାକୁ ସେ ଇଙ୍ଗିତ କରି କହିଛନ୍ତି ସେ ଜାଣିଥିବେ । ଯଦି ଆମ ଦଳ କଥା କହୁଥିବେ, ସେ ଏତେ ବର୍ଷ ଧରି ଦଳରେ ଥିଲେ, ସେତେବେଳେ ଅଳିଆ କଥା କହିଥିଲେ ଭଲ ହୋଇଥାନ୍ତା । ଏବେ ସେ ଦଳ ପରିବର୍ତ୍ତନ କରିଛନ୍ତି, ସେଥିପାଇଁ ଏଭଳି ଅଳିଆ କଥା କହୁଛନ୍ତି । ଯଦି ଅଳିଆ ଆଳରେ କୌଣସି ଦୁର୍ନୀତି ନେଇ ସେ ଅଭିଯୋଗ କରୁଥିବେ, ତେବେ କେନ୍ଦ୍ରରେ ଓ ରାଜ୍ୟରେ ତାଙ୍କ ସରକାର ଅଛି, ତଦନ୍ତକାରୀ ସଂସ୍ଥାକୁ ଲଗେଇ ଅଳିଆକୁ ଜେଲରେ ପୁରାନ୍ତୁ । ଭର୍ତ୍ତୃହରି ପୂର୍ବରୁ ବିଜେଡିରୁ ସାଂସଦ ହୋଇଥିଲେ, ଏବେ ବିଜେପିରୁ ସାଂସଦ ହୋଇଛନ୍ତି । ରାଜ୍ୟର ସ୍ବାର୍ଥ କଥା ଚିନ୍ତା କରି ମହାନଦୀ ପ୍ରସଙ୍ଗ ସଂସଦରେ ଉଠାନ୍ତୁ । ଏବେ ଟ୍ରିପଲ ଇଞ୍ଜିନ ସରକାର ଅଛି । ଛତିଶଗଡରେ, ଓଡିଶାରେ ଏବଂ କେନ୍ଦ୍ରରେ ବିଜେପି ସରକାର ଅଛି । ଆଶା କରୁଛି, ଏହାର ସମାଧାନ ସେ କରିବେ ।" ଅଯଥା ପ୍ରସଙ୍ଗ ନଉଠାନ୍ତୁ ବୋଲି କହି କଡ଼ା ସମାଲୋଚନା କରିଛନ୍ତି ଦେବାଶିଷ ।
ପ୍ରକାଶ ଥାଉ, ଗତକାଲି (ଗୁରୁବାର) ମାହାଙ୍ଗାରେ ଆୟୋଜିତ ଏକ ସଭାରେ କଟକ ସାଂସଦ ଭର୍ତ୍ତୃହରି ମହତାବ ଜେଲରେ କୋଠରୀ ସଂଖ୍ୟା ବଢ଼ାନ୍ତୁ ଓ ଏଥିପାଇଁ ବଜେଟରେ ବ୍ୟୟବରାଦ କରନ୍ତୁ ବୋଲି ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଅନୁରୋଧ କରିଥିଲେ । ଏପରିକି ଅଳିଆଙ୍କୁ ଜେଲ ପଠାଯିବ ବୋଲି କହି ବିରୋଧୀଙ୍କୁ ସିଧା ଟାର୍ଗେଟ କରିଥିଲେ । ପୂର୍ବରୁ 2024 ସାଧାରଣ ନିର୍ବାଚନ ପ୍ରଚାର ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବିଜେପିର ଶୀର୍ଷ ନେତୃତ୍ବ ଖଣି ଚୋର, ଚିଟ୍ଫଣ୍ଡ ଚୋର ଓ ରତ୍ନଭଣ୍ଡାର ଚାବି ଚୋରଙ୍କୁ ଜେଲ ପଠାଯିବ ବୋଲି କହିଥିଲେ । ଏବେ ତାଙ୍କରି ଦଳର ଜଣେ ଅଭିଜ୍ଞ ସାଂସଦଙ୍କ ଏପରି ବୟାନ ଏବେ ରାଜ୍ୟ ରାଜନୀତିରେ ହଇଚଇ ସୃଷ୍ଟି କରିଛି । ଯାହାକୁ ନେଇ ତୀବ୍ର ପ୍ରତିକ୍ରିୟା ରଖିଛନ୍ତି ଦେବାଶିଷ ।
ଇଟିଭି ଭାରତ, କଟକ
