ଭୁବନେଶ୍ବର: ଆଜି ପୁଣିଥରେ ସାମ୍ବାଦିକ ସମ୍ମିଳନୀ କରି ବିଜେପି ଉପରେ ବର୍ଷିଛନ୍ତି ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର । ଓଡିଶା ବିଜେପିର ୱାସିଂ ମେସିନରେ ଗୁଣ୍ଡା, ଠକ ଓ ଜମି ଜବରଦଖଲକାରୀମାନେ ସ୍ୱଚ୍ଛ ହେଉଥିବା କହିଛନ୍ତି ସସ୍ମିତ । ବୈଜୟନ୍ତ ପଣ୍ଡା, ପ୍ରଶାନ୍ତ ଜଗଦ୍ଦେବ ଓ ପ୍ରଦୀପ ପାଣିଗ୍ରାହୀଙ୍କ ଉଦାହରଣ ରଖି ବିଜେପିକୁ ଶାଣିତ ଆକ୍ରମଣ କରିଛନ୍ତି ।
ବିଜେଡିର ରାଷ୍ଟ୍ରୀୟ ମୁଖପାତ୍ର ପାତ୍ର କହିଛନ୍ତି, "ଓଡ଼ିଶାରେ ଅନେକ ପ୍ରକାରର ୱାସିଂ ମେସିନ ଅଛି । କିନ୍ତୁ ଓଡ଼ିଶା ବିଜେପି ପାଖରେ ଯାହା ଅଛି ତାହା ବାସ୍ତବରେ ଅନନ୍ୟ । ସେମାନେ ବିଜେଡି ନେତାଙ୍କ ବିରୋଧରେ ଆନ୍ଦୋଳନ କରିବେ । ତାଙ୍କୁ ଗୁଣ୍ଡା, କଳାଧନ କାରବାରୀ ଏବଂ ଜମି ଜବରଦଖଲକାରୀ ଓ ଚୋର କହିବେ । କିନ୍ତୁ ଏହି ବିଜେଡି ନେତା ଓଡ଼ିଶା ବିଜେପିକୁ ଯିବା ମାତ୍ରେ ତାଙ୍କୁ ଫୁଲମାଳ ପକାଇ ସ୍ୱାଗତ କରିବେ । ଏହା ସହ ଓଡ଼ିଶା ବିଜେପିର ୱାସିଂ ମେସିନରେ ପକାଇ ତାଙ୍କୁ ସ୍ୱଚ୍ଛ ବୋଲି କହିବେ । କେନ୍ଦ୍ରାପଡାର ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ କଥା ନିଆଯାଉ । ଖୋର୍ଦ୍ଧା ସାରୁଅରେ ନିଜ କମ୍ପାନୀ ଜରିଆରେ ଅନୁସୂଚିତ ଜାତିଙ୍କ ଠାରୁ ବେଆଇନ ଭାବେ ଜମି ହଡ଼ପ କରି ବିରାଟ ଷ୍ଟୁଡିଓ କରିଛନ୍ତି । କୋଟି କୋଟି ଟଙ୍କା ରୋଜଗାର କରୁଛନ୍ତି । ଅନୁସୂଚିତ ଜାତିର ଲୋକେ ଆନ୍ଦୋଳନ କରିବା ସତ୍ତ୍ୱେ ଜମି ଫେରାଇବାକୁ ସେ ମନା କରିଦେଇଛନ୍ତି । କାରଣ ଅନୁସୂଚିତ ଜାତିର ଲୋକ ନୁହଁନ୍ତି, ତାଙ୍କ ଷ୍ଟୁଡିଓ ଦ୍ୱାରା କରାଯାଇଥିବା କୋଟି କୋଟି ଟଙ୍କା ଗୁରୁତ୍ୱପୂର୍ଣ୍ଣ । କିନ୍ତୁ ସେ ଓଡ଼ିଶା ବିଜେପିର ପୋଷ୍ଟର ବଏ । ବୈଜୟନ୍ତଙ୍କୁ ଦଳରୁ ହଟାଇ ଦେଇଥିଲା ବିଜେଡି । କିନ୍ତୁ ବିଜେପି ତାଙ୍କୁ ସାମିଲ କରିଛି । ନିଜ ଦଳର ନେତାଙ୍କୁ ଅବହେଳା କରି ଓଡ଼ିଶା ବିଜେପି ଏହି ଜମି ଜବରଦଖଲକାରୀଙ୍କୁ ଟିକେଟ ଦେଇଛି ।"
ସସ୍ମିତ ଆହୁରି ମଧ୍ୟ କହିଛନ୍ତି, "ବାହାମାସ ଦ୍ୱୀପର ତିନୋଟି କମ୍ପାନୀ ଫିନଲେ, ମେସିନା ଏବଂ ପିକିକା ୧୬-୧୭ କୋଟି ଟଙ୍କା ବୈଜୟନ୍ତ ପଣ୍ଡାଙ୍କ କମ୍ପାନୀରେ ନିବେଶ କରିଛନ୍ତି । ମନି ଲଣ୍ଡରିଂ ଜରିଆରେ କଳାଧନ ଚାଲାଣ ଘଟଣାରେ ଦିଲ୍ଲୀ ହାଇକୋର୍ଟ କଠୋର ତଦନ୍ତ ନିର୍ଦ୍ଦେଶ ଦେଇଥିଲେ ମଧ୍ୟ ଏପର୍ଯ୍ୟନ୍ତ କିଛି ହୋଇନାହିଁ । କିନ୍ତୁ ବୈଜୟନ୍ତଙ୍କୁ ଓଡ଼ିଶା ବିଜେପିର ୱାସିଂ ମେସିନରେ ସ୍ୱଚ୍ଛ ଭାବେ ଉପସ୍ଥାପିତ କରାଯାଇ ଟିକେଟ ଦିଆଯାଇଛି । ବୈଜୟନ୍ତ ବିଜୁଳି କଥା କହୁଛନ୍ତି । କିନ୍ତୁ ତାଙ୍କ କମ୍ପାନୀ ଓଡ଼ିଶାକୁ ୪୮୦ କୋଟି ଟଙ୍କା ବିଜୁଳି ବକେୟା ଦେବାକଥା, କିନ୍ତୁ ସେ ମନା କରିଦେଇଛନ୍ତି । ଏପରିକି ଟଙ୍କା ନଦେବା ପାଇଁ ସେମାନେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ହଜାର ହଜାର କୋଟି ଟଙ୍କାର ବ୍ୟକ୍ତି ନିଜ କମ୍ପାନୀର ୪୮୦ କୋଟି ଟଙ୍କାର ବିଜୁଳି ବକେୟା ଓଡ଼ିଶାବାସୀଙ୍କୁ ଦେବାକୁ ମନା କରିଦେଇଛନ୍ତି । କିନ୍ତୁ ଆଜି ସେ ଓଡ଼ିଶାବାସୀଙ୍କ ଆଗରେ ଶସ୍ତା ବିଜୁଳି କଥା କହୁଛନ୍ତି ।"
"ଦେଶର ୧୦ଟି ବ୍ୟାଙ୍କ ଏକାଥରକେ ତାଙ୍କ କମ୍ପାନୀକୁ ୨୩୦୦ କୋଟି ଟଙ୍କାର ଋଣ ଛାଡ଼ କରିଛନ୍ତି । ଭାରତୀୟ ଶିଳ୍ପ ବିକାଶ ବ୍ୟାଙ୍କ ୧୫୦୦ କୋଟି, ଇଣ୍ଡଷ୍ଟ୍ରିଆଲ ଫାଇନାନ୍ସ କର୍ପୋରେସନ ଅଫ ଇଣ୍ଡିଆ ୧୪୦ କୋଟି, ଆଇସିଆଇସିଆଇ ବ୍ୟାଙ୍କ ୧୩୬ କୋଟି, ଇଣ୍ଡିଆନ ଓଭରସିଜ ବ୍ୟାଙ୍କ ୯୦ କୋଟି, ପଞ୍ଜାବ ନ୍ୟାସନାଲ ବ୍ୟାଙ୍କ ୮୩ କୋଟି, ବିଜୟା ବ୍ୟାଙ୍କ ୧୦୩ କୋଟି, କାନାରା ବ୍ୟାଙ୍କ ପ୍ରାୟ ୧୦୦ କୋଟି, ଆନ୍ଧ୍ର ବ୍ୟାଙ୍କ ୫୦ କୋଟି, ସେଣ୍ଟ୍ରାଲ ବ୍ୟାଙ୍କ ୫୯ କୋଟି ଏବଂ ୟୁନିୟନ ବ୍ୟାଙ୍କ ୫୨ କୋଟି ଟଙ୍କା ଛାଡ଼ କରିଛି । ଯଦି ସେ ସେହି ୨୩୦୦ କୋଟି ଟଙ୍କା ବ୍ୟାଙ୍କକୁ ଦେଇଥାନ୍ତେ, ତେବେ ଆଜି ଯୁବବର୍ଗଙ୍କ ପାଇଁ ଆଉ କେତେ ପୁଞ୍ଜିନିବେଶ, ଶିଳ୍ପ, ଚାକିରି ହୋଇଥାନ୍ତା । ସେ କେବଳ ନିଜ ବିଷୟରେ ଚିନ୍ତା କରନ୍ତି, ଯୁବ ବର୍ଗ କିମ୍ବା ସେମାନଙ୍କ ଚାକିରି ପାଇଁ ନୁହେଁ ।"
ସସ୍ମିତ ପାତ୍ର ଆହୁରି କହିଛନ୍ତି, "ପ୍ରଶାନ୍ତ ଜଗଦ୍ଦେବ ଜଣେ ମଦ୍ୟପ ବ୍ୟକ୍ତି, ଯିଏବିଜେପି କର୍ମୀଙ୍କ ଉପରକୁ କାର ଚଢାଇ ଦେଇଥିଲେ । ଏହା ସହିତ ବିଜେପି ବାଲୁଗାଁ ନଗର ସଭାପତିଙ୍କୁ ମାଡ଼ ମାରିଥିଲେ । ଓଡ଼ିଶା ବିଜେପିର ୱାସିଂ ମେସିନରେ ନୂଆ ପୋଷ୍ଟର ବଏ ପାଲଟିଯାଇଛନ୍ତି । ଓଡ଼ିଶା ବିଜେପି ନେତା ପୋଲିଂ ବୁଥରେ ସେ କରିଥିବା ହିଂସାକୁ ସୁରକ୍ଷା ଦେବା ପାଇଁ ପ୍ରତିଦ୍ୱନ୍ଦ୍ୱିତା କରିବାରେ ବ୍ୟସ୍ତ ଅଛନ୍ତି । ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ କହିଥିଲେ ଯେ, ତାଙ୍କ ଭଳି ଲୋକ ବାହାରେ ରହିବା ଉଚିତ ନୁହେଁ । ସେମାନଙ୍କ ସ୍ଥାନ ଜେଲରେ ଅଛି । ଏବେ ସେ କର୍ମଠ ଓ କର୍ମବୀର ବୋଲି କହୁଛନ୍ତି ।"
"ଓଡ଼ିଶା ବିଜେପିର ୱାସିଂ ମେସିନରେ ସଫା ହୋଇଥିବା ଆଉ ଜଣେ ନେତା ହେଉଛନ୍ତି ପ୍ରଦୀପ ପାଣିଗ୍ରାହୀ । ଚାକିରି ଦେବାର ପ୍ରତିଶ୍ରୁତି ଦେଇ ଟଙ୍କା ନେଇ ଠକେଇ କରିବା ଅଭିଯୋଗରେ ଜେଲ ଯାଇଥିଲେ । ତାଙ୍କୁ ଫୁଲମାଳ ପକାଇ ଦଳୀୟ ଟିକେଟ ଦିଆଯାଇଛି । ଏବେ ସେ ଓଡ଼ିଶା ବିଜେପି ପାଇଁ ଠକେଇର ପୋଷ୍ଟର ବଏ । ସେହି ଓଡ଼ିଶା ବିଜେପି ନେତାମାନେ ତାଙ୍କୁ ଚିଟଫଣ୍ଡ ଚୋର ବୋଲି କହୁଥିଲେ ଏବଂ ଆଜି ସେ ସେମାନଙ୍କ ପୋଷ୍ଟର ବଏ ପାଲଟି ଯାଇଛନ୍ତି । ଏହା ହେଉଛି ଓଡ଼ିଶା ବିଜେପିର ଅସଲ ଚେହେରା । ଯେଉଁ ଦଳ ଗୁଣ୍ଡା, ଜମି ଜବରଦଖଲକାରୀ, ଠକ ଓ କଳାଧନ କାରବାରକାରୀଙ୍କୁ ଖୋଲା ହୃଦୟରେ ସ୍ୱାଗତ କରି ଦଳୀୟ ଟିକେଟ ଦେଇଥାଏ । ଏଭଳି ଅପରାଧୀଙ୍କୁ ଯେତେ ଅଧିକ ପ୍ରୋତ୍ସାହନ ଓ ସୁରକ୍ଷା ଦେଉଛନ୍ତି, ବିଜେପି ଲୋକଙ୍କ ଆଖିରେ ସେତିକି ତଳକୁ ଖସୁଛନ୍ତି । ସେଥିପାଇଁ ଓଡ଼ିଶା ବିଜେପି ନିର୍ବାଚନ ପରେ ନିର୍ବାଚନ ହାରୁଛନ୍ତି ।"
ଇଟିଭି ଭାରତ, ଭୁବନେଶ୍ବର
