ହାଇଦ୍ରାବାଦ: ପୁଣି ମଧ୍ୟପ୍ରାଚ୍ୟରେ ବଡ ଆକ୍ରମଣ । ଇରାନ ଆକ୍ରମଣର ପ୍ରାୟ ମାସେ ପରେ ପ୍ରତିଜବାବ ଦେଲା ଇସ୍ରାଏଲ । ଗତକାଲି (ଶୁକ୍ରବାର) ମଧ୍ୟରାତ୍ରି ଓ ଆଜି ଭୋର ମଧ୍ୟରେ ଇରାନ ରାଜଧାନୀ ତେହେରାନରେ ଇସ୍ରାଏଲ ପକ୍ଷରୁ ରକେଟ୍ ମାଡ କରାଯାଇଛି । ଏଥିରେ ଏକାଧିକ କୋଠା କ୍ଷତିଗ୍ରସ୍ତ ହୋଇଛି । କିଛି ବିଲ୍ଡିଂରେ ଅଗ୍ନିକାଣ୍ଡ ମଧ୍ୟ ଘଟିଛି, ମାତ୍ର କ୍ଷୟକ୍ଷତି କିମ୍ବା ମୃତାହତ ନେଇ ଇରାନ ପକ୍ଷରୁ ଏପର୍ଯ୍ୟନ୍ତ କୌଣସି ଘୋଷଣା କରାଯାଇନି ।
ଇସ୍ରାଏଲ ସେନା ‘ଆଇଡିଏଫ’ ନିଜେ ଏହି ଆକ୍ରମଣକୁ ସ୍ବୀକାର କରିବା ସହ ଏଥିରେ କେବଳ ଇରାନର ସାମରିକ ପ୍ରତିଷ୍ଠାନକୁ ଟାର୍ଗେଟ କରାଯାଇଛି ବୋଲି କହିଛି । ଏନେଇ ଇସ୍ରାଏଲ ସେନାର ମୁଖପାତ୍ର ଏକ ଭିଡିଓ ଜାରି କରି ଏହି ଆକ୍ରମଣ ସମ୍ପର୍କରେ ସୂଚନା ଦେଇଛନ୍ତି । ଇରାନ ଚଳିତମାସ (ଅକ୍ଟୋବର) ପହିଲାରେ ଇସ୍ରାଏଲ ଉପରେ କରିଥିବା ଆକ୍ରମଣର ଏହା ଜବାବ ବୋଲି ‘ଆଇଡିଏଫ’ କହିଛି ।
Israel Defence Forces tweets, " in response to months of continuous attacks from the regime in iran against the state of israel—right now the israel defense forces is conducting precise strikes on military targets in iran. the regime in iran and its proxies in the region have been… pic.twitter.com/hMCYS5mlKo
— ANI (@ANI) October 25, 2024
- ଅକ୍ଟୋବର ପହିଲାରେ ଆକ୍ରମଣ କରିଥିଲା ଇରାନ:-
ଗାଜା ଆକ୍ରମଣ ସମୟରୁ ଇସ୍ରାଏଲ-ଇରାନ ମଧ୍ୟରେ ତିକ୍ତତା ରହିଛି । ଗତମାସରେ ଇରାନ ସମର୍ଥିତ ଲେବନନର ଆତଙ୍କୀ ସଂଗଠନ ‘ହିଜବୁଲ୍ଲା’ ମୁଖ୍ୟ ହାସନ ନସରଲ୍ଲାକୁ ବେରୁତରେ ଇସ୍ରାଏଲ ଫୋର୍ସ ଏୟାର ଷ୍ଟ୍ରାଇକ କରି ହତ୍ୟା କରିବା ପରେ ଏହି ତିକ୍ତତା ଚରମ ସୀମାରେ ପହଞ୍ଚିଥିଲା । ଇରାନ ଇସ୍ରାଏଲ ଉପରେ ଚଳିତମାସ ପହିଲାରେ ପ୍ରାୟ ୨ଶହ ରକେଟ ମାଡ କରିଥିଲା । ଏଥିରେ ଉତ୍ତର-ଇସ୍ରାଏଲରେ ବ୍ୟାପକ କ୍ଷୟକ୍ଷତି ହୋଇଥିଲା । ଏହାକୁ ସିଧାସଳଖ ଇରାନ ସ୍ବୀକାର ମଧ୍ୟ କରିଥିଲା । ଇରାନ ସର୍ବୋଚ୍ଚ ନେତା ଅହେତୁଲ୍ଲା ଖାମନେଇ ସାର୍ବଜନୀନ ନମାଜରେ ସାମିଲ ହୋଇ ଦେଶକୁ ସମ୍ବୋଧିତ କରିଥିଲେ । ଇସ୍ରାଏଲ ବିରୋଧରେ ଏହି ଆକ୍ରମଣକୁ ସେ ଆଇନସମ୍ମତ ବୋଲି କହିଥିଲେ । ଏହା ପରେ ଇସ୍ରାଏଲ ମଧ୍ୟ କଡା ଚେତବାନୀ ଦେଇଥିଲା । ଏହାର ପରିଣାମ ଭୋଗିବାକୁ ପଡିବ ବୋଲି ଇସ୍ରାଏଲ ଚରମ ଚେତାବନୀ ମଧ୍ୟ ଦେଇଥିଲା । କିଛି ଦିନ ଶାନ୍ତ ରହିଥିବା ଇସ୍ରାଏଲ ଆକ୍ରମଣର ପ୍ରାୟ ଏକମାସ ପରେ ପ୍ରତିଆକ୍ରମଣ କରିଛି ।
ମଧ୍ୟପ୍ରାଚ୍ୟରେ ଇରାନ ସମର୍ଥନରେ ଏକାଧିକ ଆତଙ୍କୀ ଗୋଷ୍ଠୀ ଇସ୍ରାଏଲ ବିରୋଧରେ ଅଭିଯାନ ଜାରି ରଖିଛନ୍ତି । ଇସ୍ରାଏଲର ଉତ୍ତର ସୀମାକୁ ଲାଗିଥିବା ଲେବନନରୁ ସଂଞ୍ଚାଳିତ ହେଉଥିବା ‘ହିଜବୁଲ୍ଲା’ ଓ ୟେମନରୁ ସଞ୍ଚାଳିତ ହେଉଥିବା ‘ହୁତି’ ସଂଗଠନ ଏମାନଙ୍କ ମଧ୍ୟରେ ପ୍ରମୁଖ । ଏବେ ହିଜବୁଲ୍ଲା ପ୍ରାୟତଃ ନିଶ୍ଚିହ୍ନ ହୋଇସାରିଲାଣି । ମାତ୍ର ନିଜ ସମର୍ଥିତ ଗୋଷ୍ଠୀଙ୍କ ବିରୋଧରେ ଆକ୍ରମଣ ପରେ ଇରାନ ସିଧାସଳଖ ଇସ୍ରାଏଲ ଉପରେ ରକେଟ ମାଡ କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
