ହାଇଦ୍ରାବାଦ: ଲୋକପ୍ରିୟ ତାମିଲ ଏବଂ ମାଲାୟାଲମ ଅଭିନେତ୍ରୀ ଅରୁନ୍ଧତୀ ନାୟରଙ୍କ ସ୍ୱାସ୍ଥ୍ୟବସ୍ଥା ଗୁରୁତର । ସଡ଼କ ଦୁର୍ଘଟଣାର ଶିକାର ହୋଇ ସେ ବର୍ତ୍ତମାନ ହସ୍ପିଟାଲରେ ଚିକିତ୍ସାଧୀନ ଅଛନ୍ତି । ଅବସ୍ଥା ଅଧିକ ସଂକଟାପନ୍ନ ହେବାରୁ ଅଭିନେତ୍ରୀଙ୍କୁ ବର୍ତ୍ତମାନ ଭେଣ୍ଟିଲେଟରେ ରଖାଯାଇଥିବା ଜଣାପଡିଛି । ତାଙ୍କର ସ୍ୱାସ୍ଥ୍ୟବସ୍ଥା ନେଇ ଭଉଣୀ ଆରତୀ ନାୟର ସୋସିଆଲ ମିଡିଆରେ ସୂଚନା ଦେଇଛନ୍ତି । ଏହି ଖବର ଶୁଣି ଫ୍ୟାନ୍ସ ଆଶ୍ଚର୍ଯ୍ୟ ହେବା ସହ ଅଭିନେତ୍ରୀଙ୍କ ଆଶୁ ଆରୋଗ୍ୟ କାମନା କରିଛନ୍ତି ।
ମାର୍ଚ୍ଚ ୧୮ରେ ଅରୁନ୍ଧତୀ ନାୟରଙ୍କ ଭଉଣୀ ଆରତୀ ନାୟର ଇନଷ୍ଟାଗ୍ରାମରେ ଏକ ବିବୃତ୍ତି ସେୟାର କରିଥିଲେ । ଯେଉଁଥିରେ ଲେଖାଅଛି, "ତାମିଲନାଡୁର ଖବରକାଗଜ ଏବଂ ଟେଲିଭିଜନ ଚ୍ୟାନେଲରେ ପ୍ରକାଶିତ ଖବର ଉପରେ ସ୍ପଷ୍ଟୀକରଣ ଦେବା ଉଚିତ ବୋଲି ଆମେ ମନେ କଲୁ । ଏହା ସତ୍ୟ ଯେ ମୋ ଭଉଣୀ ଅରୁନ୍ଧତୀ ନାୟର ତିନି ଦିନ ପୂର୍ବରୁ ଏକ ଦୁର୍ଘଟଣାର ସମ୍ମୁଖୀନ ହୋଇଥିଲେ । ସେ ଗୁରୁତର ଆହତ ହୋଇଛନ୍ତି । ସେ ଥିରୁଅନନ୍ତପୁରମର ଅନନ୍ତପୁରୀ ଡାକ୍ତରଖାନାରେ ଭେଣ୍ଟିଲେଟର ରହିଥିବା ବେଳେ ଜୀବନ ମରଣ ସହ ସଂଗ୍ରାମ କରୁଛନ୍ତି ।"
ସୂଚନା ଅନୁସାରେ, ଅଭିନେତ୍ରୀ ଅରୁନ୍ଧତୀ ମାର୍ଚ୍ଚ ୧୪ରେ ଏକ ବାଇକ୍ ଦୁର୍ଘଟଣାର ଶିକାର ହୋଇଥିଲେ । କୋଭାଲାମ ବାଇପାସରେ ଏହି ଦୁର୍ଘଟଣା ଘଟିଥିଲା । ସେ ଏକ ୟୁଟ୍ୟୁବ ଚ୍ୟାନେଲକୁ ସାକ୍ଷାତକାର ଦେବା ପରେ ନିଜ ଭାଇଙ୍କ ସହ ବାଇକରେ ଘରକୁ ଫେରୁଥିଲେ । ଏହି ସମୟରେ ସେ ଦୁର୍ଘଣାର ଶିକାର ହେବା ଫଳରେ ଅରୁନ୍ଧତୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ଜଣାପଡିଛି । ଏହି ଖବର ଜାଣିବା ପରେ ଫ୍ୟାନ୍ସ ଏବଂ ସେଲିବ୍ରିଟି ଚିନ୍ତା ପ୍ରକଟ କରିବା ସହ ଅଭିନେତ୍ରୀଙ୍କ ଆଶୁ ଆରୋଗ୍ୟ ପାଇଁ ପ୍ରାର୍ଥନା କରୁଛନ୍ତି ।
ଏହା ମଧ୍ୟ ପଢନ୍ତୁ: 'ଉ ଆଣ୍ଟଭା' କଣ୍ଠଶିଳ୍ପୀ ମଙ୍ଗଲିଙ୍କ କାର୍ ଦୁର୍ଘଟଣାଗ୍ରସ୍ତ, ମାମଲା ରୁଜୁ
ଅଭିନେତ୍ରୀଙ୍କ ଚଳଚ୍ଚିତ୍ର କ୍ୟାରିୟର ବିଷୟରେ କହିବାକୁ ଗଲେ, ଅରୁନ୍ଧତୀ ତାମିଲରେ ୨୦୧୪ ମସିହାରେ 'ପୋଙ୍ଗୀ ଏଜୁ ମନୋହରା' ସହ ଡେବ୍ୟୁ କରିଥିଲେ । ସେ ଅଭିନେତା ବିଜୟ ଆନ୍ଥୋନିଙ୍କ 'ସୈଥନ'ରେ ନଜର ଆସିଥିବା ବେଳେ ଏହି ଫିଲ୍ମ ତାଙ୍କୁ ସ୍ୱତନ୍ତ୍ର ପରିଚୟ ଦେଇଥିଲା । ଏହାପରେ ସେ ୨୦୧୮ରେ 'ଅଟାକୋରୁ କାମୁକାନ୍' ସହ ମାଲାୟାଲମ୍ ସିନେମାରେ ଡେବ୍ୟୁ କରିଥିଲେ । ତାଙ୍କୁ ଶେଷ ଥର ପାଇଁ ୨୦୨୩ ତାମିଲ ଚଳଚ୍ଚିତ୍ର 'ଆୟିରାମ ପୋରାକାସୁକାଲ'ରେ ଦେଖିବାକୁ ମିଳିଥିଲା ।
