ମୁମ୍ବାଇ: ଆରମ୍ଭ ହୋଇଯାଇଛି ଆଇପିଏଲ ୨୦୨୪ । ୧୦ଟି ଟିମ୍ ମଧ୍ୟରେ ଚାଲିଛି ଘମାସାନ ଫାଇଟ୍ । ହେଲେ ଏହି ସିଜିନରେ ଚମ୍ପିୟାନ ଟିମ୍ ମୁମ୍ବାଇ ପାଞ୍ଚ ପାଞ୍ଚ ଥର ପରାସ୍ତ ହେଲାଣି । ଯାହାକୁ ନେଇ କ୍ୟାପଟେନଙ୍କୁ ଦାୟୀ କରୁଛନ୍ତି ଦର୍ଶକ । ଏଥିପାଇଁ ଦଳର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କୁ ସୋସିଆଲ ମିଡିଆରେ ବହୁ ମାତ୍ରାରେ ଟ୍ରୋଲ ମଧ୍ୟ କରାଯାଉଛି । ହାର୍ଦ୍ଦିକଙ୍କୁ ଏଭଳି ଟ୍ରୋଲ କରାଯିବା ଘଟଣାକୁ ନାପସନ୍ଦ କରିଛନ୍ତି ଅଭିନେତା ସୋନୁ ସୁଦ୍ । ସେ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଏପରି କିଛି ପୋଷ୍ଟ କରିଛନ୍ତି ୟାହା ହାର୍ଦ୍ଦିକ ପାଣ୍ଡ୍ୟାଙ୍କ ସହ ଜଡ଼ିତ ଥିବା ଭଳି ମନେ ହେଉଛି ।
ସେ ଲେଖିଛନ୍ତି, "ଆମେ ଆମ ଖେଳାଳିଙ୍କୁ ସମ୍ମାନ ଦେବା ଆବଶ୍ୟକ । କାରଣ ସେମାନେ ଦେଶ ପାଇଁ ଗୌରବ ଆଣିଥାନ୍ତି । କେତେବେଳେ ଆପଣ ତାଙ୍କର ଭଲ ପ୍ରଦର୍ଶନ ପାଇଁ ଖୁସି ମନାଉଛନ୍ତି ତ ଆଉ କେତେବେଳେ ଅପମାନିତ କରୁଛନ୍ତି । ଏହି ହାର୍ କେବଳ ସେମାନଙ୍କର ନୁହେଁ । ଆମର ମଧ୍ୟ। ମୁଁ କ୍ରିକେଟକୁ ଭଲ ପାଏ । ଏହାସହ ମୁଁ ପ୍ରତିଟି କ୍ରିକେଟରଙ୍କୁ ସମ୍ମାନ ଦିଏ । ସେ ଦଳର ଅଧିନାୟକ ହୁଏନ୍ତୁ ବା ଅନ୍ୟ କେହି ସମସ୍ତଙ୍କୁ ମୁଁ ସମ୍ମାନ କରେ । ସେମାନେ ହେଉଛନ୍ତି ଆମର ହିରୋ ।"
ସୋନୁଙ୍କ ଇନଷ୍ଟା ଷ୍ଟୋରୀରେ ଏଭଳି ଲେଖା ଏବେ ଚର୍ଚ୍ଚାର ବିଷୟ ପାଲଟିଛି । ସୂଚନା ଅନୁସାରେ, ମୁମ୍ବାଇ ଇଣ୍ଡିଆନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟିକତ୍ବରେ ଦଳର ପ୍ରଦର୍ଶନ ସେତେଟା ଭଲ ହୋଇପାରିନାହିଁ । ଏହି ନୈରାଶ୍ୟଜନକ ପ୍ରଦର୍ଶନ କାରଣରୁ ହାର୍ଦ୍ଦିକ ଏବେ ସୋସିଆଲ ମିଡିଆରେ ଟ୍ରୋଲ ମଧ୍ୟ ହେଉଛନ୍ତି । ପ୍ରଥମ ଦୁଇଟି ମ୍ୟାଚରେ ଦଳ ଅତ୍ୟନ୍ତ ନୈରାଶ୍ୟଜନକ ପ୍ରଦର୍ଶନ କରିଥିଲା । ସେପଟେ ଆଗକୁ ଟି-୨୦ ବିଶ୍ବକପ ଥିବାବେଳେ ପାଣ୍ଡ୍ୟା ବାଦ୍ ପଡ଼ିପାରନ୍ତି ବୋଲି କେହି କେହି ଚର୍ଚ୍ଚା କରିବା ମଧ୍ୟ ଆରମ୍ଭ କଲେଣି ।
ଏହା ମଧ୍ୟ ପଢନ୍ତୁ...ଆଇପିଏଲ ସିଜିନ 17: ପାଣ୍ଡ୍ୟା ବାହିନୀକୁ ଧୂଳି ଚଟାଇଲା ଗିଲ୍ଙ୍କ ଟିମ - IPL 2024
ଏଭଳି ଘଟଣା ପରେ ବର୍ତ୍ତମାନ ଚର୍ଚ୍ଚାକୁ ଆସିଛି ସୋନୁଙ୍କ ପୋଷ୍ଟ । ସେ ପରୋକ୍ଷରେ ହାର୍ଦ୍ଦିକଙ୍କୁ ସମର୍ଥନ ଜଣାଇଥିବା ଅନୁମାନ କରାଯାଉଛି । ସୂଚନା ଯୋଗ୍ୟ, ସୋନୁ ଜଣେ ଅଭିନେତା ସହ ଜଣେ କ୍ରିକେଟର ମଧ୍ୟ । ସେଲିବ୍ରିଟି କ୍ରିକେଟ୍ ଲିଗରେ ସେନୁ 'ପଞ୍ଜାବ ଦେ ଶେର' ଟିମର କ୍ୟାପଟେନ ରହିଥିଲେ । ଏହି ଟିମରେ ସେ ଅଧିନାୟକ ମଧ୍ୟ ରହିଥିଲେ । ତେବେ ସୋନୁଙ୍କ ୱାର୍କ ଫ୍ରଣ୍ଟ ବିଷୟରେ କହିବାକୁ ଗଲେ ସେ ମାସ୍ ଆକ୍ସନ ଫିଲ୍ମ 'ଫତେହ'କୁ ନେଇ ଚର୍ଚ୍ଚାରେ ଅଛନ୍ତି । ଯାହାର ଟିଜର ଦର୍ଶକଙ୍କୁ ଖୁବ ପସନ୍ଦ ଆସିଥିବାବେଳେ ରିଲିଜ ଅପେକ୍ଷାରେ ରହିଛନ୍ତି ଫ୍ୟାନ୍ସ ।
