ହାଇଦ୍ରାବାଦ: କପିଲ ଶର୍ମାଙ୍କ ଫିଲ୍ମ 'କିସ କିସ କୋ ପ୍ୟାର କରୁଁ' ପ୍ରାୟ ନଅ ବର୍ଷ ପୂର୍ବେ 2015 ରେ ମୁକ୍ତିଲାଭ କରିଥିଲା। କପିଲ ଶର୍ମାଙ୍କ କମେଡି ଏବଂ ଏହି ଚଳଚ୍ଚିତ୍ରରେ ତାଙ୍କର ଅଭିନୟ ଲୋକଙ୍କୁ ମନକୁ ଛୁଇଁଥିଲା । ଏହା କପିଲ ଶର୍ମାଙ୍କ କ୍ୟାରିୟରର ପ୍ରଥମ ଚଳଚ୍ଚିତ୍ର ଥିବା ବେଳେ ମୁଭିଟି ହିଟ୍ ହୋଇଥିଲା । ଏବେ ଖବର ଆସୁଛି ଯେ ଏହି ଚଳଚ୍ଚିତ୍ରର ଏକ ସିକ୍ୱେଲ ତିଆରି ହେବାକୁ ଯାଉଛି । ତେବେ ପୁଣି ଥରେ ପରଦାରେ ଧମାକା କରିବାକୁ ଯାଉଛନ୍ତି କମେଡି କିଙ୍ଗ କପିଲ ଶର୍ମା ।
କପିଲଙ୍କ ଫିଲ୍ମର ସିକ୍ୱେଲ
ବର୍ତ୍ତମାନ 9 ବର୍ଷ ପରେ ଖବର ଆସୁଛି ଯେ ଅଭିନେତା ନିର୍ମାତା ରତନ ଜୈନ ଏବଂ ଅବ୍ବାସ ମସ୍ତାନଙ୍କ ସହ ଫିଲ୍ମର ଦ୍ୱିତୀୟ ଭାଗ ଆଣିବାକୁ ଯାଉଛନ୍ତି । ରିପୋର୍ଟ ଅନୁଯାୟୀ, ଫିଲ୍ମ ଉପରେ ଆଲୋଚନା ଚାଲିଛି ଏବଂ ପରଦାକୁ ପୁଣି ଫେରିବାକୁ କପିଲ ଉତ୍ସାହିତ ଅଛନ୍ତି। ତେବେ କାହାଣୀ କ’ଣ ହେବ ଏବଂ ଫିଲ୍ମ କେବେ ରିଲିଜ୍ ହେବ ତାହା ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ। କିନ୍ତୁ ଯଦି ଏହି ରିପୋର୍ଟକୁ ବିଶ୍ୱାସ କରାଯାଏ ତେବେ ଏହା ନିଶ୍ଚିତ ଯେ ଏହି ଚଳଚ୍ଚିତ୍ରର ଏକ ସିକ୍ୱେଲ ତିଆରି ହେବାକୁ ଯାଉଛି ।
କେବେ ସୁଟିଂ ଆରମ୍ଭ ହେବ ?
ନିର୍ମାତା ରତନ ଜୈନ ଏବଂ ଅବ୍ବାସ ମସ୍ତାନ ପୁନର୍ବାର 'କିସ୍ କିସ କୋ ପ୍ୟାର କରୁଁ ୨' ମାଧ୍ୟମରେ ଏକାଠି ହେବାକୁ ଯାଉଛନ୍ତି। ଅନୁକଲ୍ପ ଗୋସ୍ୱାମୀଙ୍କ ନିର୍ଦ୍ଦେଶନାରେ ନିର୍ମିତ ଏହି ସିକ୍ୱେଲରେ କପିଲ ଶର୍ମା ପୁଣିଥରେ ତାଙ୍କ କମେଡି ମାଧ୍ୟମରେ ସମସ୍ତଙ୍କୁ ହସାଉଥିବା ଦେଖିବାକୁ ମିଳିବ । ରିପୋର୍ଟ ଅନୁସାରେ, ଏହି ଚଳଚ୍ଚିତ୍ରର ସ୍କ୍ରିପ୍ଟ ପ୍ରସ୍ତୁତ ଥିବା ବେଳେ ଫିଲ୍ମର ସୁଟିଂ ଚଳିତ ବର୍ଷ ଶେଷ ସୁଦ୍ଧା ଆରମ୍ଭ ହେବ। ପୁଣି କମେଡି ତଡକା ଲଗାଇବାକୁ କପିଲ ଶର୍ମା ବହୁତ ଖୁସି ଏବଂ ଉତ୍ସାହିତ ଥିବା ବେଳେ ସେ ଏହାର ସ୍କ୍ରିପ୍ଟକୁ ବହୁତ ପସନ୍ଦ କରିଛନ୍ତି । ଫିଲ୍ମର କାଷ୍ଟିଂ କାମ ଏବେବି ଜାରି ରହିଛି ।
ସିକ୍ୱେଲ କେବେ ରିଲିଜ ହେବ?
ଯଦି ରିପୋର୍ଟକୁ ବିଶ୍ୱାସ କରାଯାଏ, ପ୍ରଥମ ଭାଗ ପରି ଅନେକ ଅଭିନେତ୍ରୀ ମଧ୍ୟ ଦ୍ୱିତୀୟ ଭାଗରେ କପିଲ ଶର୍ମାଙ୍କ ସହ ଦେଖିବାକୁ ଯାଉଛନ୍ତି। କାଷ୍ଟିଂ କାଉଚ ଶେଷ ହେବା ପରେ 'କିସ୍ କିସ କୋ ପ୍ୟାର୍ କରୁଁ ୨'ର ସୁଟିଂ ଚଳିତ ବର୍ଷ ଶେଷ ସୁଦ୍ଧା ଆରମ୍ଭ ହେବ ଏବଂ ଫିଲ୍ମ ଆସନ୍ତା ବର୍ଷ ସୁଦ୍ଧା ବକ୍ସ ଅଫିସରେ ମୁକ୍ତିଲାଭ କରିବ। ତଥାପି, ବର୍ତ୍ତମାନ ପର୍ଯ୍ୟନ୍ତ 'କିସ୍ କିସ୍କୋ ପ୍ୟାର କରୁଁ ୨' ସମ୍ବନ୍ଧରେ ନିର୍ମାତାମାନଙ୍କଠାରୁ କୌଣସି ପ୍ରକାରର ସୂଚନା ମିଳିପାରିନାହିଁ।
ଏହା ମଧ୍ୟ ପଢନ୍ତୁ: ୫ ବର୍ଷ ପରେ ଏକାଠି ହେଲେ କପିଲ-ସୁନୀଲ, ନୂଆ ଶୋ'ର ଲଞ୍ଚିଂ ପାର୍ଟିରେ ଆସିଲେ ନଜର
'କିସ କିସ କୋ ପ୍ୟାର କରୁଁ' ବିଷୟରେ କହିବାକୁ ଗଲେ,
'କିସ କିସ କୋ ପ୍ୟାର କରୁଁ' ଫିଲ୍ମ ସହ ବଡ ପରଦାରେ ଡେବ୍ୟୁ କରିଥିଲେ କପିଲ । 2015 ରେ ରିଲିଜ ଏହି ଫିଲ୍ମ ବକ୍ସ ଅଫିସରେ 43 କୋଟି ଟଙ୍କା ରୋଜଗାର କରିଥିଲା । ଏହି ଚଳଚ୍ଚିତ୍ରରେ ଜଣେ ହିରୋ ଏବଂ ଚାରିଜଣ ମହିଳାଙ୍କ ପ୍ରେମ କାହାଣୀ ପ୍ରଦର୍ଶିତ ହୋଇଥିଲା । ଏହି ଚଳଚ୍ଚିତ୍ର ମାଧ୍ୟମରେ ଡେଭିଡ ଧୱନଙ୍କ ଚଳଚ୍ଚିତ୍ରକୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା । ଫିଲ୍ମର ପ୍ରଥମ ଭାଗରେ କପିଲ ଶର୍ମାଙ୍କ ସହ ଅରବାଜ ଖାନ, ଏଲି ଅବରାମ, ସିମରନ କୌର ମୁଣ୍ଡି ଏବଂ ବରୁଣ ଶର୍ମାଙ୍କ ଭଳି ଅଭିନେତା ନଜର ଆସିଥିଲେ। ଏହି ଚଳଚ୍ଚିତ୍ରଟି ବର୍ତ୍ତମାନ ଆମାଜନ ପ୍ରାଇମ ଭିଡିଓ ଏବଂ ୟୁଟ୍ୟୁବରେ ଉପଲବ୍ଧ । ଏହି ଅଭିନେତା ପୂର୍ବରୁ କରୀନା କପୁର, ତବୁ ଏବଂ କ୍ରିତି ସାନନଙ୍କ ସହ କ୍ରୁ ଫିଲ୍ମରେ ନଜର ଆସିଥିଲେ। ଏହା ବ୍ୟତୀତ ସେ ଜ୍ୱିଗାଟୋ, ଫିରାଙ୍ଗି ଏବଂ ଇଟ ମାଇ ଲାଇଫ ଭଳି ଚଳଚ୍ଚିତ୍ରରେ ମଧ୍ୟ କାମ କରିଛନ୍ତି କପିଲ।
ବ୍ୟୁରୋ ରିପୋର୍ଟ, ଇଟିଭି ଭାରତ
