ହାଇଦ୍ରାବାଦ: ବଲିଉଡ ଲୋକପ୍ରିୟ ନିର୍ମାତା କରଣ ଜୋହର ନିଜ ଆଗାମୀ ଫିଲ୍ମର ଘୋଷଣା କରିଛନ୍ତି । ସୋସିଆଲ ମିଡିଆରେ ଏକ କ୍ରିପ୍ଟିକ ପୋଷ୍ଟ ସେୟାର କରି କରଣ ଜୋହର ନିଜ ଆଗାମୀ ଫିଲ୍ମର ହିଣ୍ଟ ଦେଇଛନ୍ତି । ଏଥିସହ ସେ ଫ୍ୟାନ୍ସଙ୍କୁ ଫିଲ୍ମର ଟାଇଟଲ ଏବଂ ଫିଲ୍ମର ଅନ୍ୟ ବିବରଣୀ ବିଷୟରେ ଅନୁମାନ କରିବାକୁ କହିଛନ୍ତି । ଏଥିସହ ଯିଏ ସଠିକ ଅନୁମାନ କରିବ ତାକୁ ଫିଲ୍ମର ଝଲକ ଦେଖିବାକୁ ଆମନ୍ତ୍ରଣ କରାଯିବ ବୋଲି ନିର୍ମାତା କହିଛନ୍ତି । ତେବେ ଏହି ପୋଷ୍ଟ ସେୟାର ହେବା ମାତ୍ରେ ଫ୍ୟାନ୍ସ କମେଣ୍ଟ ବର୍ଷା କରିଛନ୍ତି ।
ନିଜ ଇନଷ୍ଟାଗ୍ରାମରେ କରଣ ଜୋହର ଏହି ପୋଷ୍ଟ ସେୟାର କରିଛନ୍ତି । ଯେଉଁଥିରେ ସେ ଲେଖିଛନ୍ତି, "ଏହା ଏକ ଫିଲ୍ମର ଘୋଷଣା ନୁହେଁ କିନ୍ତୁ ଆପଣଙ୍କ ସହଯୋଗରେ ଏହା ହୋଇପାରିବ । ଆମେ ଏକ ରୋମାଞ୍ଚକ ଫିଲ୍ମ ଗତ କିଛି ବର୍ଷ ହେଲା ସୁଟ କରିଆସୁଛୁ । ଏହାକୁ ଲୁଚାଇ ରଖିବାର କାରଣ ଏହା ଯେ, ମୁଖ୍ୟ ଦିଗଗୁଡିକୁ ଲୁଚାଇବା ଏକ ଡେବ୍ୟୁ ନିର୍ଦ୍ଦେଶକଙ୍କ ଯୋଜନା ଥିଲା ।" ଫିଲ୍ମ ବିଷୟରେ କିଛି ହିଣ୍ଟ ଦିଆଯାଇଛି । ଏଥିରେ ଏହି ଚଳଚ୍ଚିତ୍ରରେ କାଷ୍ଟଙ୍କ ନାଁ ନ ନେଇ କୁହାଯାଇଛି ଯେ, କାଷ୍ଟ ବିଷୟରେ କହିବାକୁ ଗଲେ ଜଣେ ସାଉଥ ତାରକା ରହିଥିବା ବେଳେ ଜଣେ ଅଭିନେତ୍ରୀ ଏବଂ ଜଣେ ନୂଆ ତାରକା ରହିଛନ୍ତି ଯିଏ ଏହି ଫିଲ୍ମ ସହ ବଲିଉଡରେ ଡେବ୍ୟୁ କରିବାକୁ ଯାଉଛନ୍ତି ।
ଏଥିସହ ସେ ଆହୁରି କହିଛନ୍ତି ଯେ, ଫିଲ୍ମ ରିଲିଜ ହେବାକୁ ପ୍ରସ୍ତୁତ । ଆମେ ଏହାକୁ ଖୁବଶୀଘ୍ର ରିଲିଜ କରିବୁ । କେହି ଅନୁମାନ କରିପାରିବେ କି ଏହି ଫିଲ୍ମର ଟାଇଟଲ ଏବଂ ବାକି ତଥ୍ୟ । ଯେଉଁ ବ୍ୟକ୍ତି ଠିକ ଅନୁମାନ କରିବ ତାକୁ ଆମେ ଫିଲ୍ମର ଝଲକ ଦେଖିବାକୁ ଆମନ୍ତ୍ରଣ କରିବୁ ବୋଲି ନିର୍ମାତା କହିଛନ୍ତି । ଏହି ପୋଷ୍ଟ ସେୟାର ହେବା ମାତ୍ରେ ଫ୍ୟାନ୍ସ ଅନୁମାନ କରି ଅନେକ ପ୍ରତିକ୍ରିୟା ଦେଇଛନ୍ତି । ପୃଥ୍ୱୀରାଜ ସୁକୁମାରନ, କାଜୋଲ ଏବଂ ଇବ୍ରାହିମ ଅଲି ଖାନଙ୍କ ପରି ଅଭିନେତା ଏହି ଫିଲ୍ମରେ ସାମିଲ ନେଇ କଳ୍ପନାଜଳ୍ପନା କରିବା ସହ ଫିଲ୍ମର ଟାଇଟଲ 'ସରଜମିନ' ବୋଲି ଅନୁମାନ କରିଛନ୍ତି । ଅନ୍ୟ କେତେକ 'ଦୋସ୍ତନା ୨' ବୋଲି କହିଛନ୍ତି ।
ଏହା ମଧ୍ୟ ପଢନ୍ତୁ: ବଲିଉଡରେ ଡେବ୍ୟୁ କରିବେ ଇବ୍ରାହିମ ଅଲି ଖାନ, ଭାଇକୁ ଏହି ପରାମର୍ଶ ଦେଲେ ସାରା
ଖବର ଅନୁଯାୟୀ, 'ସରଜମିନ୍' ସହ ସୈଫ ଅଲି ଖାନ ଏବଂ ଅମ୍ରିତା ରାଓଙ୍କ ପୁଅ ଇବ୍ରାହିମ୍ ଅଲି ଖାନ ବଲିଉଡରେ ଡେବ୍ୟୁ କରିବାକୁ ଯାଉଛନ୍ତି । ଗତ ବର୍ଷ, ଏହି ପ୍ରକଳ୍ପର ସବିଶେଷ ତଥ୍ୟ ପ୍ରକାଶ ହୋଇଥିଲା । ଏହି ଫିଲ୍ମରେ ତାଙ୍କ ସହ ସାଉଥ ତାରକା ପୃଥ୍ୱୀରାଜ ସୁକୁମାରନ ଏବଂ ବଲିଉଡ ଅଭିନେତ୍ରୀ କାଜୋଲ ମୁଖ୍ୟ ଭୂମିକାରେ ଅଭିନୟ କରିବେ ବୋଲି ଜଣାପଡିଛି । ଏହି ଫିଲ୍ମକୁ ଅଭିନେତା ବୋମାନ ଇରାନୀଙ୍କ ପୁଅ କାୟୋଜେ ଇରାନୀଙ୍କ ନିର୍ଦ୍ଦେଶନା ଦେବେ । କହିରଖୁଛୁ କି, ସ୍କ୍ରିନ ଡେବ୍ୟୁ କରିବା ପୂର୍ବରୁ ଇବ୍ରାହିମ ନିର୍ଦ୍ଦେଶନା କ୍ଷେତ୍ରରେ କରଣଙ୍କ ସହ ସହଯୋଗ କରିସାରିଛନ୍ତି, ଆଲିଆ ଭଟ୍ଟ ଏବଂ ରଣଭୀର ସିଂଙ୍କ ଫିଲ୍ମ 'ରକି ଔର ରାନୀ କି ପ୍ରେମ କାହାନୀ'ରେ ଇବ୍ରାହିମ ସହକାରୀ ନିର୍ଦ୍ଦେଶକ ଭାବରେ କାର୍ଯ୍ୟ କରିଛନ୍ତି । ତେବେ କରଣ ଇବ୍ରାହିମଙ୍କୁ ଏହି ଫିଲ୍ମ ଜରିଆରେ ଲଞ୍ଜ କରିବେ ବୋଲି କୁହାଯାଉଛି ।
