ହାଇଦ୍ରାବାଦ: ଚଳଚ୍ଚିତ୍ର ଇଣ୍ଡଷ୍ଟ୍ରିକୁ ଝଟକା । ୱେବ ସିରିଜ 'ଦ ଟ୍ରାଏଲ୍'ରେ ବଲିଉଡ ଅଭିନେତ୍ରୀ କାଜୋଲଙ୍କ ସହ କାମ କରିଥିବା ସହ-ଅଭିନେତ୍ରୀ ନୁର ମାଲବିକା ଦାସଙ୍କ ଦେହାନ୍ତ ହୋଇଛି । ମୁମ୍ବାଇ ଘରୁ ତାଙ୍କ ମୃତଦେହ ଉଦ୍ଧାର କରାଯାଇଛି । ମୃତ୍ୟୁ ବେଳକୁ ତାଙ୍କୁ ମାତ୍ର ୩୨ ବର୍ଷ ହୋଇଥିଲା । ରିପୋର୍ଟ ଅନୁସାରେ, ଅଭିନେତ୍ରୀ ଜୀବନ ହାରିଥିବା ଜଣାପଡିଥିବା ବେଳେ ତାଙ୍କ ଆକସ୍ମିକ ମୃତ୍ୟୁ ଖବର ଶୁଣି ଇଣ୍ଡଷ୍ଟ୍ରି ଏବଂ ଫ୍ୟାନ୍ସଙ୍କ ମଧ୍ୟରେ ଶୋକର ଛାୟା ଖେଳିଯାଇଛି ।
ଜୁନ ୬ରେ ଜୀବନ ହାରିଥିଲେ ନୁର ମାଲବିକା ଦାସ
ରିପୋର୍ଟ ଅନୁସାରେ, ଜୁନ ୬ ତାରିଖରେ ପୋଲିସ ମୁମ୍ୱାଇ ସ୍ଥିତ ଲୋକାଣ୍ଡୱାଲା ଘରୁ ନୁର ମାଲବିକା ଦାସଙ୍କ ମୃତଦେହ ଉଦ୍ଧାର କରିଥିଲା । ପଡୋଶୀମାନେ ଘରୁ ଦୁର୍ଗନ୍ଧ ଆସୁଥିବା ଦେଖି ଓଶିୱାରା ପୋଲିସକୁ ଖବର ଦେଇଥିଲେ । ଯାହା ପରେ ପୋଲିସ ଅଭିନେତ୍ରୀଙ୍କ ଘେର ପହଞ୍ଚି ମୃତଦେହ ଉଦ୍ଧାର କରିଥିଲା । ସେ ନିଜ ଘରେ ଜୀବନ ହାରିଥିବା ଜଣାପଡିଛି । ତେବେ ସେ କାହିଁକି ଏପରି ଚରମ ନିଷ୍ପତ୍ତି ନେଇଛନ୍ତି ତାହାର କାରଣ ଜଣାପଡିନଥିବା ବେଳେ ପୋଲିସ ତଦନ୍ତ ଜାରି ରଖିଛି ।
ଆସିଲେନି ପରିବାର; ଏନଜିଓ ସହାୟତାରେ ଅଭିନେତ୍ରୀଙ୍କ କରାଗଲା ଅନ୍ତିମ ସଂସ୍କାର
ପୋଲିସ ସୂତ୍ରରୁ ପ୍ରକାଶ ଯେ ଅଧିକାରୀମାନେ ଫ୍ଲାଟର କବାଟ ଭାଙ୍ଗି ଘରକୁ ପସିଥିଲେ ଏବଂ ଅଭିନେତ୍ରୀଙ୍କ ମୃତଦେହ ଉଦ୍ଧାର କରିଥିଲେ । ପରେ ମୃତଦେହକୁ ଗୋରେଗାଓଁର ସିଦ୍ଧାର୍ଥ ଡାକ୍ତରଖାନାକୁ ପୋଷ୍ଟମର୍ଟମ ପାଇଁ ନିଆଯାଇଥିଲା । ଏଥିସହ ପୋଲିସ ଅଭିନେତ୍ରୀଙ୍କ ଘର ଲୋକଙ୍କୁ ସମ୍ପର୍କ କରିଥିଲେ ହେଲେ କେହି ମଧ୍ୟ ଆସିନଥିଲେ । ଯାହା ପରେ ଏକ ଏନଜିଓ ସହାୟତାରେ ରବିବାର ଦିନ ପୋଲିସ ତାଙ୍କର ଅନ୍ତିମ ସଂସ୍କାର କରିଥିଲା। ତେବେ ମୃତ୍ୟୁର କାରଣ ଏପର୍ଯ୍ୟନ୍ତ ଜଣାପଡିନଥିବା ବେଳେ ପୋଲିସ ଘଟଣାର ତଦନ୍ତ ଜାରି କରିଛି ।
ନୁର ମାଲବିକା ଦାସ କିଏ?
ନୁର ମାଲବିକା ଦାସଙ୍କୁ ୩୨ ବର୍ଷ ବୟସ ହୋଇଥିଲା । ସେ ଆସାମର ବାସିନ୍ଦା ଥିଲେ। ସେ ଅନେକ ହିନ୍ଦୀ ଚଳଚ୍ଚିତ୍ର ଏବଂ ୱେବ୍ ସିରିଜରେ କାମ କରିଛନ୍ତି । ଏଥିମଧ୍ୟରେ ସିସାକିଆଁ, ୱାକମ୍ୟାନ୍, ତିଖି ଚଟନି, ଚରମସୁଖ, ଦେଖି ଅନଦେଖି ଏବଂ ବ୍ୟାକଡ୍ରଡ୍ ହଷ୍ଟଲ୍ ଇତ୍ୟାଦି ଫିଲ୍ମରେ କାମ କରିଛନ୍ତି । ତାଙ୍କ ମୃତ୍ୟୁ ଖବର ଶୁଣି ଫ୍ୟାନ୍ସ ସମେତ ସେଲିବ୍ରିଟି ଦୁଃଖପ୍ରକାଶ କରୁଛନ୍ତି ।
ଏହା ମଧ୍ୟ ପଢନ୍ତୁ: ସଡ଼କ ଦୁର୍ଘଟଣା ହେଲା କାଳ, ଆଖି ବୁଜିଲେ ଅଭିନେତ୍ରୀ ପବିତ୍ରା ଜୟରାମ
ବ୍ୟୁରୋ ରିପୋର୍ଟ, ଇଟିଭି ଭାରତ
