ମୁମ୍ବାଇ: ବଲିଉଡର ପ୍ରସିଦ୍ଧ ଗାୟକ ଉଦିତ ନାରାୟଣଙ୍କ ପୁଅ, ଗାୟକ ତଥା ଅଭିନେତା ଆଦିତ୍ୟ ନାରାୟଣ ଇଣ୍ଡଷ୍ଟ୍ରିର ଏକ ଜଣାଶୁଣା ନାମ । ଛୋଟ ପରଦାରୁ ନେଇ ବଡ ପରଦା ପର୍ଯ୍ୟନ୍ତ ଆଦିତ୍ୟ ତାଙ୍କ ଦକ୍ଷତାର ଯାଦୁ ଦେଖାଇଛନ୍ତି । ଏହାରି ମଧ୍ୟରେ ଆଦିତ୍ୟ ତାଙ୍କର ଆପତ୍ତିଜନକ ଆଚରଣ ପାଇଁ ପୁଣିଥରେ ଚର୍ଚ୍ଚାକୁ ଆସିଛନ୍ତି । ଛତିଶଗଡର ଏକ କଲେଜରେ ଆୟୋଜିତ ହୋଇଥିବା ଏକ କନସର୍ଟରୁ ଆଦିତ୍ୟ ନାରାୟଣଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ଆଦିତ୍ୟ ପ୍ରଥମେ ଜଣେ ଫ୍ୟାନଙ୍କ ଫୋନ୍ ଛଡ଼ାଇ ନେଉଛନ୍ତି ଏହା ପରେ ତାକୁ ଫିଙ୍ଗି ଦେଇଥିବା ଭିଡିଓରେ ଦେଖିବାକୁ ମିଳିଛି । ଏନେଇ ବର୍ତ୍ତମାନ କଣ୍ଠଶିଳ୍ପୀଙ୍କୁ ସୋସିଆଲ ମିଡିଆରେ ଟ୍ରୋଲ କରାଯାଉଛି ।
ଏହି ଘଟଣାଟି ସେତେବେଳେ ଘଟିଥିଲା ଯେତେବେଳେ ଆଦିତ୍ୟ ବଲିଉଡର ସୁପରଷ୍ଟାର ଶାହାରୁଖ ଖାନଙ୍କ ଫିଲ୍ମ ଡନ୍ର ଏକ ଗୀତ ଗାଉଥିଲେ । କନସର୍ଟ ଷ୍ଟେଜର ଚାରିପଟେ ଫ୍ୟାନ ରହିଥିବା ବେଳେ ଆଦିତ୍ୟଙ୍କ ଭିଡିଓ ଫୋନରେ ଉତ୍ତୋଳନ କରୁଥିଲେ । ତେଣୁ ଆଦିତ୍ୟ ରାଗି ଯାଇ ଫ୍ୟାନଙ୍କ ହାତରୁ ଫୋନ ଛଡାଇ ଦୂରକୁ ଫୋପାଡି ଦେଇଥିଲେ । କିନ୍ତୁ ଏହି ଘଟଣାକୁ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।
କନସର୍ଟର ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ମାତ୍ରେ ଲୋକେ ଆଦିତ୍ୟଙ୍କୁ ସମାଲୋଚନା କରୁଥିବା ଦେଖିବାକୁ ମିଳିଛି । ତେବେ ପୁରା ଘଟଣା କ’ଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଏହା ସତ୍ତ୍ବେ ସୋସିଆଲ ମିଡିଆ ୟୁଜର୍ସ କଣ୍ଠଶିଳ୍ପୀଙ୍କୁ ଟ୍ରୋଲ କରିବା ଆରମ୍ଭ କରିଦେଇଛନ୍ତି । ଜଣେ ଉପଭୋକ୍ତା ଲେଖିଛନ୍ତି, "ଆଦିତ୍ୟଙ୍କ ସମସ୍ୟା କ’ଣ, ସେ ଏତେ ଅହଂକାରୀ କାହିଁକି ?" ଆଉ ଜଣେ ଲେଖିଛନ୍ତି, "ଏହା ଅପମାନଜନକ ।"
ଏହା ମଧ୍ୟ ପଢନ୍ତୁ- ନୀତେଶ ତିୱାରୀଙ୍କ 'ରାମାୟଣ'ରେ ବିଗ ବିଙ୍କ ଏଣ୍ଟ୍ରି, ଦଶରଥ ଭୂମିକାରେ ଆସିବେ ନଜର !
ପ୍ରକାଶ ଥାଉକି, ଶିଶୁ କଳାକାର ଭାବରେ ଆଦିତ୍ୟ ନାରାୟଣ 100ରୁ ଅଧିକ ଗୀତରେ ସ୍ୱର ଦେଇଛନ୍ତି । କେବଳ ଏତିକି ନୁହେଁ ତାଙ୍କ ନାମରେ ଏକ ଆଲବମ୍ ମଧ୍ୟ ରିଲିଜ୍ ହୋଇଥିଲା । ଆଦିତ୍ୟଙ୍କ ସ୍ୱରରେ ତାଙ୍କର ପ୍ରସିଦ୍ଧ ଗୀତ ହେଉଛି, 1996 ଚଳଚ୍ଚିତ୍ର ମାସୁମ୍ର ଗୀତ ଛୋଟା ବଚ୍ଚା ଜାନ କେ...ଏହା ଆଜି ବି ବହୁତ ଲୋକପ୍ରିୟ ଅଟେ । ଏହି ଗୀତ ପାଇଁ ଅଭିନେତା ଶ୍ରେଷ୍ଠ ଶିଶୁ ଗାୟକ ପାଇଁ ସମାଲୋଚକ ପୁରସ୍କାର ଗ୍ରହଣ କରିଥିଲେ । ଏହା ବ୍ୟତୀତ ଆଦିତ୍ୟ ନାରାୟଣ 16ଟି ଭାଷାରେ ଗୀତ ଗାଇଛନ୍ତି ।
