ନୂଆଦିଲ୍ଲୀ: ନରେନ୍ଦ୍ର ମୋଦି ଓ ବିଜେପି ସରକାର ବିରୋଧୀ ଭାବେ ଜଣାଶୁଣା ଯୁବ ୟୁଟ୍ୟୁବର ଧ୍ରୁବ ରାଠୀଙ୍କୁ କୋର୍ଟରୁ ନୋଟିସ ଜାରି କରାଯାଇଛି । ଜଣେ ବିଜେପି ନେତା କରିଥିବା ମାନହାନୀ ମାମଲାର ଶୁଣାଣି କରି ଦିଲ୍ଲୀର ସାକେତ କୋର୍ଟ ରାଠୀଙ୍କୁ ଏହି ନୋଟିସ ଜାରି କରିଛନ୍ତି । ମାମଲାର ପରବର୍ତ୍ତୀ ଶୁଣାଣି ଆସନ୍ତାମାସ (ଅଗଷ୍ଟ) 2 ତାରିଖରେ ହେବ । ଏହା ପୂର୍ବରୁ କୋର୍ଟରେ ରାଠୀ ତାଙ୍କ ପକ୍ଷ ରଖିବାକୁ ଜାରି ନୋଟିସରେ ନିର୍ଦ୍ଦେଶ ଦେଇଛନ୍ତି ସାକେତ କୋର୍ଟ ।
ମୁମ୍ବାଇ ବିଜେପି ମୁଖପାତ୍ର ସୁରେଶ କରମଶି ନାଖୁଆ ରାଠୀଙ୍କ ବିରୋଧରେ ଏହି ମାନହାନୀ ମାମଲା କରିଥିଲେ । ଧ୍ରୁବ ରାଠୀ ପ୍ରସ୍ତୁତ କରିଥିବା ଏକ ଭିଡିଓରେ ଭାରତୀୟ ଜନତା ପାର୍ଟିକୁ ସମାଲୋଚନା କରିବା ସହ ତାଙ୍କ ପ୍ରତି ମଧ୍ୟ ଧ୍ରୁବ ରାଠୀ ଅପମାନଜନକ ମନ୍ତବ୍ୟ ଦେଇଥିବା ଅଭିଯୋଗ କରିଥିଲେ ସୁରେଶ । ଏପରି ଭିଡିଓ ତାଙ୍କ ରାଜନୈତିକ ଓ ସାମାଜିକ ଜୀବନର ପ୍ରତିଷ୍ଠାରେ ଆଞ୍ଚ ଆଣିଛି । ଏହା ତାଙ୍କୁ ମାନସିକ ଭାବେ ଆଘାତ ଦେଇଥିବା ସେ ମାମଲାରେ ଦର୍ଶାଇଥିଲେ । କୋର୍ଟରେ ମାନହାନୀ ମାମଲା କରିବା ସହ ସେ ରାଠୀଙ୍କଠାରୁ ସେ 20 ଲକ୍ଷ ଟଙ୍କାର କ୍ଷତିପୂରଣ ମଧ୍ୟ ଦାବି କରିଥିଲେ ।
ଆଜି ସାକେତ ଜିଲ୍ଲାକୋର୍ଟରେ ଏହି ମାମଲାର ଶୁଣାଣି ହୋଇଥିଲା । ଜିଲ୍ଲା ଜଜ୍ ଗୁଞ୍ଜନ ଗୁପ୍ତା ଭିଡିଓ ପ୍ରସ୍ତୁତ କରିଥିବା ରାଠୀଙ୍କ ସହ ‘ଗୁଗୁଲ’ ଏବଂ ‘ଏକ୍ସ’ (ଟ୍ୱିଟର)କୁ ମଧ୍ୟ ନୋଟିସ୍ ଜାରି କରିଛନ୍ତି । ଏମାନେ ସମସ୍ତେ ଆସନ୍ତା ଶୁଣାଣି ତାରିଖ ପୂର୍ବରୁ ସେମାନଙ୍କ ପକ୍ଷ ରଖିବେ । ମାମଲାର ପରବର୍ତ୍ତୀ ଶୁଣାଣି ଆସନ୍ତାମାସ (ଅଗଷ୍ଟ) ୨ ତାରିଖରେ ହେବ ।
ଏଠାରେ ସୂଚନାଯୋଗ୍ୟ ଯେ, ଧ୍ରୁବ ନିକଟରେ ଏକାଧିକ ଭିଡିଓରେ ମୋଦି ସରକାରଙ୍କୁ କଡା ସମାଲୋଚନା କରିଛନ୍ତି । ବିରୋଧୀମାନେ ଧ୍ରୁବଙ୍କ ଦ୍ବାରା ଉଠାଇଥିବା ପ୍ରସଙ୍ଗ ଓ ସମାଲୋଚନାକୁ ପ୍ରଶଂସା କରିଥିବା ବେଳେ ବିଜେପି ନେତା ଓ କର୍ମୀମାନେ ଏହାକୁ ରାଜନୈତିକ ପ୍ରୟୋଜିତ ଭିଡିଓ ବୋଲି କହିଛନ୍ତି । ସାଧାରଣ ନିର୍ବାଚନର ଠିକ ପୂର୍ବରୁ ରାଠୀ ମୋଦି ସରକାର ବିରୋଧରେ ଏକ 30 ମିନିଟରୁ ଅଧିକ ଅବଧିର ଭିଡିଓ ଏପିସୋଡ ନିଜ ୟୁଟ୍ୟୁବ ଚାନେଲରେ ପୋଷ୍ଟ କରିଥିଲେ । ଯାହାକୁ ନେଇ ସେତେବେଳେ ବେଶ ଚର୍ଚ୍ଚା ଦେଖାଯାଇଥିଲା । ପରବର୍ତ୍ତୀ ସମୟରେ ମଧ୍ୟ ଏହି ସିରିଜର ଭିଡିଓ ପୋଷ୍ଟ କରିବା ଜାରି ରଖିଥିଲେ ରାଠୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
