ହାଇଦ୍ରାବାଦ: ଲୋକସଭା ନିର୍ବାଚନ ୨୦୨୪ ପରେ ଆସନ୍ତାକାଲି ଚଳିତବର୍ଷର ପ୍ରଥମ ବିଧାନସଭା ନିର୍ବାଚନ ଜନାଦେଶ ପ୍ରକାଶ ପାଇବାକୁ ଯାଉଛି । ହରିୟାଣା ଓ ଜାମ୍ମୁ କାଶ୍ମୀରରେ କି’ଏ ଗଢିବ ସରକାର । ଉଭୟ ରାଜ୍ୟରେ ପ୍ରଦର୍ଶନ ଭାରତୀୟ ଜନତା ପାର୍ଟି ପାଇଁ ସମ୍ମାନର ପ୍ରସଙ୍ଗ । କାରଣ ଫଳାଫଳ ପୂର୍ବରୁ ଗଣମାଧ୍ୟମ ସଂସ୍ଥାର ବୁଥ ବାହୁଡା ଜନମତ ସର୍ଭେ ବା ‘ଏକଜିଟ ପୋଲ’ରେ ବିଜେପିକୁ ଲାଗିଛି ଶକ୍ତ ଝଟକା । ଉଭୟ ରାଜ୍ୟରେ କଂଗ୍ରେସକୁ ବହୁମତ ମିଳିବା ସହ ବିଜେପି ପଛରେ ରହିବା ନେଇ ଏକାଧିକ ସଂସ୍ଥା ପୂର୍ବାକଳନ କରିଛନ୍ତି ।
EXIT POLL VS EXACT POLL:
‘ଏକଜିଟ ପୋଲ’ ହେବ କି ‘ଏକଜାକ୍ଟ ପୋଲ’ ? ହରିୟାଣା ଗତ ଦଶନ୍ଧି ଧରି ବିଜେପି ଦଖଲରେ ରହି ଆସିଛି । ସେହିପରି କାଶ୍ମୀରରେ ଧାରା-370 ଉଚ୍ଛେଦ ପରେ ଏହା ପ୍ରଥମ ବିଧାନସଭା ନିର୍ବାଚନ । ଘାଟିରେ ସରକାର ଗଠନ କରିବା ଭାରତୀୟ ଜନତା ପାର୍ଟିର କେବଳ ରଣନୀତି ନୁହେଁ ବରଂ ଜନସଂଘ ଅମଳରୁ ଆଦ୍ୟ ରାଜନୈତିକ ସଙ୍କଳ୍ପ ମଧ୍ୟ । ଯଦି ଏକଜିଟ୍ ପୋଲ୍ ସତ୍ୟ ପ୍ରମାଣିତ ହୁଏ, ତେବେ କଂଗ୍ରେସକୁ କ୍ଷମତାର ରାସ୍ତା ଛାଡି ବିଜେପି ବିରୋଧୀ ଆସନ ଗ୍ରହଣ କରିବାକୁ ବାଧ୍ୟ ହୋଇପାରେ ।
- ୧୦ ବର୍ଷ ପରେ ଉପତ୍ୟକାରେ ନିର୍ବାଚନ:-
2014ରେ ଶେଷ ଥର ପାଇଁ ଜମ୍ମୁ କାଶ୍ମୀରରେ ବିଧାନସଭା ନିର୍ବାଚନ ହୋଇଥିଲା । ସେତେବେଳେ ପ୍ରଥମ ଥର ବିଜେପି ମେଣ୍ଟରେ ଘାଟିରେ କ୍ଷମତାର ଅଂଶୀଦାର ହୋଇଥିଲା । ଆଶ୍ଚର୍ଯ୍ୟଜନକ ଭାବେ ସୟଦ ମୁଫତିଙ୍କ ପିଡିପି ଓ ବିଜେପି ମେଣ୍ଟରେ ସରକାର ଗଠନ କରିଥିଲା । ବିପରିତ ରାଜନୈତିକ ବିଚାରଧାରା ରଖୁଥିବା ଉଭୟ ପାର୍ଟି କ୍ଷମତା ପାଇଁ ମେଣ୍ଟ କରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ମାତ୍ର ଏହା ଭାରତୀୟ ଜନତା ପାର୍ଟିର ଏକ ଚତୁରତା ବୋଲି ମଧ୍ୟ ରାଜନୈତିକ ପଣ୍ଡିତମାନେ କହିଥିଲେ । ଧାରା 370 ଓ ଅନୁଚ୍ଛେଦ 35 (କ) ପ୍ରତ୍ୟାହାର କରିବା ପରେ ବିଜେପି ଘାଟିରେ ସରକାର ଗଠନ କରିବା ପାଇଁ ଆପ୍ରାଣ ଉଦ୍ୟମ କରିଛି ।
- କାଶ୍ମୀର ସଂଖ୍ୟା ଗଣିତ ଓ ଏକଜିଟ୍ ପୋଲ ପୂର୍ବାକଳନ
କାଶ୍ମୀରରେ ଧାରା 370 ଉଚ୍ଛେଦ ଓ ସୀମା ପୁନଃନିର୍ଦ୍ଧାରଣ ପରେ ଏଥର ମୋଟ 90 ନିର୍ବାଚିତ ଆସନରେ ଭୋଟ ହୋଇଛି । ସେହିପରି ଆଉ 5 ଜଣ ସଦସ୍ୟ ଉପରାଜ୍ୟପାଳଙ୍କ ଦ୍ବାରା ସଦନକୁ ମନୋନୀତ ହେବାର ବ୍ୟବସ୍ଥା ରହିଛି । ସେହି ଅନୁପାତରେ ସଂଖ୍ୟା ଗରିଷ୍ଠତା ପାଇଁ 48 ଆସନ ଆବଶ୍ୟକ । ଏକାଧିକ ଏକଜିଟ ପୋଲର ପୂର୍ବାନୁମାନ ଅନୁସାରେ, କଂଗ୍ରେସ-ଏନସି ମେଣ୍ଟ ସଂଖ୍ୟା ଗରିଷ୍ଠତାର ନିକବରର୍ତ୍ତୀ ହୋଇପାରନ୍ତି । ଏକାକୀ କଂଗ୍ରେସ 35 ରୁ 40 ଆସନ ଜିତିପାରେ ବୋଲି ଏକାଧିକ ପୋଲ ଓ୍ବାଚ ସଂସ୍ଥା ପୂର୍ବାକଳନ କରିଛନ୍ତି ।
- କଂଗ୍ରେସ-ଏନସି ମେଣ୍ଟକୁ ଲମ୍ଫ ଦେବେ କି ମୁଫତି ? :-
ଅନ୍ୟପଟେ ମେହେବୁବା ମୁଫତିଙ୍କ ‘ପିଡିପି’ ଏତେ ଭଲ ପ୍ରଦର୍ଶନ କରିନପାରିଲେ ମଧ୍ୟ ‘କଂଗ୍ରେସ-ଏନସି’ ମେଣ୍ଟରେ ସାମିଲ ହେବାର ସମ୍ଭାବନା ରହିଛି । ବିଜେପିକୁ କ୍ଷମତାରୁ ଦୂରରେ ରଖିବା ପାଇଁ କଂଗ୍ରେସ-ଏନସି ଓ ପିଡିପି ଜନାଦେଶ ପରବର୍ତ୍ତୀ ମେଣ୍ଟ (ପୋଷ୍ଟ ପୋଲ ଆଲିଆନ୍ସ) ଭାବେ ଗୋଟିଏ ବ୍ୟାନରକୁ ଆସିପାରନ୍ତି । ଯଦି ସଂଖ୍ୟା ବହୁମତରେ ସମସ୍ତ ଦଳ ପଛରେ ରହନ୍ତି, ତାହାଲେ 5 ମନୋନୀତ ବିଧାୟକଙ୍କ ଭୂମିକା ନିର୍ଣ୍ଣୟ ହେବ । ମାତ୍ର ଉପରାଜ୍ୟପାଳଙ୍କ ଦ୍ବାରା ମନୋନୀତ ଏହି ବିଧାୟକମାନେ ବିଜେପକୁ ସମର୍ଥନ ଘୋଷଣା କରିବା ମଧ୍ୟ ଏକପ୍ରକାର ସ୍ପଷ୍ଟ । କିନ୍ତୁ ସଂଖ୍ୟା ହିଁ ସବୁ ପରବର୍ତ୍ତୀ ସମୀକରଣ ସ୍ଥିର କରିବ ।
- ହରିୟାଣା ଗଣିତ ଓ ଏକଜିଟ ପୋଲ ପୂର୍ବାନୁମାନ
ଉତ୍ତର-ଭାରତୀୟ ରାଜ୍ୟ ହରିୟାଣାରେ ଗତ 10 ବର୍ଷ ତଳେ କ୍ଷମତା ପରିବର୍ତ୍ତନ ହୋଇଥିଲା । ଭୁପେନ୍ଦ୍ର ହୁଡ୍ଡା ନେତୃତ୍ବାଧୀନ କଂଗ୍ରେସକୁ କ୍ଷମତାକୁ ବେଦଖଲ କରି ଭାରତୀୟ ଜନତା ପାର୍ଟି 2014 ରେ ସରକାର ଗଠନ କରିଥିଲା । ମନୋହର ଲାଲ ଖଟ୍ଟର ମୁଖ୍ୟମନ୍ତ୍ରୀ ହୋଇଥିଲେ । 2019ରେ ମଧ୍ୟ ବିଜୟଧାରା ବଜାୟ ରଖି ଦଳ ମନୋହର ଲାଲ ଖଟ୍ଟରଙ୍କୁ ପୁଣି ମୁଖ୍ୟମନ୍ତ୍ରୀ କରିଥିଲା ବିଜେପି । 2024 ଆରମ୍ଭରେ ଦଳ ମୁଖ୍ୟମନ୍ତ୍ରୀ ପରିବର୍ତ୍ତନ କରିଥିଲା । ମନୋହରଲାଲ ଖଟ୍ଟରଙ୍କୁ ମୁଖ୍ୟମନ୍ତ୍ରୀ ପଦରୁ ଅବ୍ୟାହତି ଦେଇ ନାଏବ ସିଂହ ସୈନୀଙ୍କୁ ଦଳ ମୁଖ୍ୟମନ୍ତ୍ରୀ କରିଥିଲା । ପରେ ଖଟ୍ଟର ଲୋକସଭା ନିର୍ବାଚନ ଲଢି କେନ୍ଦ୍ରରେ ମନ୍ତ୍ରୀ ହୋଇଥିଲେ ।
ଏଥର ହରିୟାଣା ଆକଳନ :-
ଏଥର ବିଜେପି କ୍ଷମତା ବିରୋଧୀ ହାଓ୍ବାର ସମ୍ମୁଖୀନ ହେବା ନେଇ ଏକାଧିକ ଆକଳନ କହୁଛି । 90 ଆସନ ବିଶିଷ୍ଟ ବିଧାନସଭାରେ ସଂଖ୍ୟା ବହୁମତ 45 ଥିବା ବେଳେ ଶାସକ ବିଜେପିକୁ 25ରୁ 30 ଆସନ ମଧ୍ୟରେ ରହିବା ନେଇ ମତ ପ୍ରକାଶ ପାଇଛି । ମାତ୍ର ଏକାକୀ ପ୍ରାୟ 45 ରୁ 55 ମଧ୍ୟରେ ଆସନ ହାତେଇ କଂଗ୍ରେସ ସରକାର ଗଠନ କରିବା ନେଇ ମଧ୍ୟ ମତ ପ୍ରକାଶ ପାଇଛି । ଏପରି ସ୍ଥିତିରେ କଂଗ୍ରେସ ଏକକ ବହୁମତ ହାସଲ କରି ସରକାର ଗଠନ କରିବାର ଅଧିକ ସମ୍ଭାବନା ରହିଛି । ଏଥିପାଇଁ ଦଳ ପ୍ରସ୍ତୁତି ମଧ୍ୟ କରିଦେଲାଣି । ବିଜେପି କିନ୍ତୁ ଏକଜିଟ ପୋଲର ସମ୍ପୂର୍ଣ୍ଣ ବିପରୀତ ଫଳାଫଳ ସମ୍ଭାବନାକୁ ଅପେକ୍ଷା କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
