ଜୟପୁର(ରାଜସ୍ଥାନ): ବାହାଘର ଭୋଜି ଖାଇବା ହେଲା କାଳ । ଭୋଜି ଖାଇ ଏକାଥରେ ଅସୁସ୍ଥ ହୋଇପଡିଲେ ଶତାଧିକ ଲୋକେ । କାହାର ଝାଡା ବାନ୍ତି ତ ଆଉ କାହାର ପେଟ ଯନ୍ତ୍ରଣା ହେଲା । ଏମିତି ଏକ ଘଟଣା ସାମ୍ନାକୁ ଆସିଛି ରାଜସ୍ଥାନର ଟୋଙ୍କ ଜିଲ୍ଲା ବିଜୱାଡ ଗାଁରୁ । ବାହାଘର ଭୋଜି ଖାଇବା ପରେ ଅସୁସ୍ଥ ହୋଇ ୧୦୦ରୁ ଅଧିକ ଲୋକେ ହସ୍ପିଟାଲରେ ଭର୍ତ୍ତି ହୋଇଛନ୍ତି । ସମସ୍ତଙ୍କ ଖାଦ୍ୟ ବିଷକ୍ରିୟା ବା ଫୁଡ ପଏଜନିଂ ହୋଇଥିବା ସନ୍ଦେହ କରାଯାଉଛି । ଏହି ଘଟଣା ଜଣାପଡିବା ପରେ ସ୍ଥାନୀୟ ତହସିଲଦାରଙ୍କ ସହ ଥାନା ଅଧିକାରୀ ବିବାହ ସ୍ଥଳରେ ପହଞ୍ଚି ଖାଦ୍ୟର ଯାଞ୍ଚ କରିବା ସହ ନମୁନା ସଂଗ୍ରହ କରିଛନ୍ତି ।
ସୂଚନା ମୁତାବକ, ବିଜୱାଡ ଗାଁରେ ଜଣଙ୍କର ବିବାହ ସମାରୋହ ଥିଲା । ଏହି ଅବସରରେ ଭୋଜିଭାତର ଆୟୋଜନ କରାଯାଇଥିଲା । ବିବାହରେ ପ୍ରାୟ ୧ ହଜାରରୁ ଅଧିକ ଲୋକ ସାମିଲ ହୋଇ ଭୋଜି ଖାଇଥିଲେ । କିନ୍ତୁ ଭୋଜି ଖାଇବାର କିଛି ଘଣ୍ଟା ମଧ୍ୟରେ କାହାର ବାନ୍ତି ହୋଇଥିଲା ତ ଆଉ କାହାର ପେଟ ଯନ୍ତ୍ରଣା ହୋଇଥିଲା । ଏକାଥରେ ୧୦୦ରୁ ଅଧିକ ଲୋକ ଅସୁସ୍ଥ ହୋଇପଡିଥିଲେ । ଏହାକୁ ନେଇ ସେଠାରେ ଆତଙ୍କ ଖେଳି ଯାଇଥିଲା । ତେବେ ଖାଦ୍ୟ ବିଷକ୍ରିୟା କାରଣରୁ ସମସ୍ତଙ୍କ ସ୍ବାସ୍ଥ୍ୟବସ୍ଥା ବିଗିଡି ଯାଇଥିବାର ଅନୁମାନ କରାଯାଉଛି ।
ଏହା ମଧ୍ୟ ପଢନ୍ତୁ: ନିର୍ବନ୍ଧ ଭୋଜି ଖାଇ ହେଲା ଫୁଡ ପଏଜନିଂ: ୪ ମୃତ, ୪୦ ଜଣ ହସ୍ପିଟାଲରେ ଭର୍ତ୍ତି
ଗ୍ରାମବାସୀ ଅସୁସ୍ଥମାନଙ୍କୁ ଆମ୍ବୁଲାନ୍ସରେ ନେଇ ନିକଟସ୍ଥ ହସ୍ପିଟାଲରେ ଭର୍ତ୍ତି କରିଥିଲେ । ଏହି ସୂଚନା ପାଇ ସ୍ଥାନୀୟ ଥାନା ପ୍ରଭାରୀ ତୁରନ୍ତ ଘଟଣାସ୍ଥଳରେ ପହଞ୍ଚି ଖାଦ୍ୟସାମଗ୍ରୀର ଯାଞ୍ଚ କରିଥିଲେ । ଏହି ସମୟରେ ଭୋଜିରେ ବ୍ୟବହାର ହୋଇଥିବା ଖୁଆରୁ ଖଟା ଦୁର୍ଗନ୍ଧ ବାହାରୁଥିବା ସହ ଏହା ପୁରାପୁରି ନଷ୍ଟ ହୋଇଯାଇଥିବା ଦେଖାଯାଇଥିଲା । ତେଣୁ ଏହି ଖରାପ ଖୁଆ କାରଣରୁ ସମସ୍ତଙ୍କର ଖାଦ୍ୟ ବିଷକ୍ରିୟା ବା ଫୁଡ ପଏଜନିଂ ହୋଇଥିବା ସନ୍ଦେହ କରାଯାଉଛି ।
ଏଠାରେ ଉଲ୍ଲେଖଯୋଗ୍ୟ ଯେ, କିଛି ଦିନ ତଳେ ରାଜସ୍ଥାନର ଉଦୟପୁର ଜିଲ୍ଲାରେ ନିର୍ବନ୍ଧ ଭୋଜି ଖାଇ ୪ ଜଣଙ୍କ ମୃତ୍ୟୁ ହୋଇଥିଲା । ୪୦ରୁ ଅଧିକ ଲୋକ ହସ୍ପିଟାଲରେ ଭର୍ତ୍ତି ହୋଇଥିଲେ । ଖାଦ୍ୟ ବିଷକ୍ରିୟା କାରଣରୁ ସମସ୍ତଙ୍କ ଦେହ ଅସୁସ୍ଥ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
