ନୂଆଦିଲ୍ଲୀ: 400 ପାର ସହ ପ୍ରଚଣ୍ଡ ବହୁମତ ନାରାରେ ଚଳିତ ସାଧାରଣ ନିର୍ବାଚନ ଲଢିଥିବା ‘ଏନଡିଏ’ ବଡ ଝଟକା ପାଇଥିଲା । ଲୋକସଭାରେ ମେଣ୍ଟର ମୁଖ୍ୟ ଦଳ ବିଜେପି ନିକଟରେ ଏବେ 240 ଆସନ ଓ ସହଯୋଗୀଙ୍କ ସଂଖ୍ୟା ମିଶାଇ 293 ରହିଛି । 2019 ନିର୍ବାଚନ ବା ସପ୍ତଦଶ ଲୋକସଭାଠାରୁ କମ ଆସନରେ ରହିଛି ମୋଦି 3.0 ସରକାର । ଏବେ ନିମ୍ନସଦନ ପରେ ରାଜ୍ୟସଭାରେ ମଧ୍ୟ ଶାସକ ମେଣ୍ଟର ସଂଖ୍ୟା ହ୍ରାସ ପାଇଛି । ବିଜେପି ସମର୍ଥିତ କିଛି ସାଂସଦଙ୍କ କାର୍ଯ୍ୟକାଳ ଶେଷ ହେବା ପରେ ସଂଖ୍ୟା 86କୁ ଖସିଛି । ରାଜ୍ୟସଭାରେ ଆବଶ୍ୟକ ସଂଖ୍ୟା ବହୁମତଠାରୁ 12 ଆସନ ପଛରେ ରହିଛି ଶାସକ ମେଣ୍ଟ ‘ଏନଡିଏ’ ।
ରାଜ୍ୟସଭା ସାଂସଦ ରାକେଶ ସିହ୍ନା, ରାମ ଶକାଲ, ସୋନାଲ ମାନସିଂହ ଓ ମହେଶ ଜେଠମାଳିନୀଙ୍କ କାର୍ଯ୍ୟକାଳ ଶେଷ ହୋଇଛି । ଏହି 4 ସଦସ୍ୟ ସରକାରୀ ଦଳର ସୁପାରିଶକ୍ରମେ ରାଷ୍ଟ୍ରପତିଙ୍କ ଦ୍ବାରା ଗୃହକୁ ମନୋନୀତ ହୋଇଥିଲେ । ସେମାନେ ବିଜେପି ସରକାରରେ ସମସ୍ତ ଆବଶ୍ୟକତାରେ ସହଯୋଗ ମଧ୍ୟ କରିଥିଲେ । ତେବେ ଏହି ଅବସର ପରେ ବିଜେପିର ସଂଖ୍ୟା 86କୁ ହ୍ରାସ ପାଇଥିବା ବେଳେ ‘ଏନଡିଏ’ ମେଣ୍ଟର ସଦସ୍ୟ ସଂଖ୍ୟା 101କୁ ଖସିଛି । 245 ଆସନ ବିଶିଷ୍ଟ ରାଜ୍ୟସଭାରେ ସଂଖ୍ୟା ଗରିଷ୍ଠତା ପାଇଁ 113 ଆସନ ଆବଶ୍ୟକ । ତେଣୁ ଶାସକ ମେଣ୍ଟ 12 ଆସନ ପଛରେ ରହିଛି । ତେଣୁ ଅଷ୍ଟାଦଶ ଲୋକସଭାରେ ମୋଦି ନେତୃତ୍ବାଧୀନ ଭାରତୀୟ ଜନତା ପାର୍ଟି କୌଣସି ଜଟିଳ କିମ୍ବା ବିବାଦୀୟ ବିଲ ପାସ କରିବା ପାଇଁ ମେଣ୍ଟ ସଦସ୍ୟ ନଥିବା କିଛି ଆଞ୍ଚଳିକ ଦଳଙ୍କ ସହଯୋଗ ଲୋଡିବାକୁ ବାଧ୍ୟ ହେବ ।
ତେବେ ରାଜ୍ୟସଭାରେ ବିରୋଧୀ ମେଣ୍ଟର ସଦସ୍ୟଙ୍କ ସଂଖ୍ୟା ରହିଛି 87 । ସେମଧ୍ୟରୁ ମୁଖ୍ୟ ବିରୋଧୀ କଂଗ୍ରେସ ନିକଟରେ 26 ଆସନ, ମମତାଙ୍କ ତୃଣମୂଳ କଂଗ୍ରେସ ନିକଟରେ 13 ଆସନ, ଦିଲ୍ଲୀ ଓ ତାମିଲନାଡୁରେ ଶାସନରେ ଥିବା ଆମ ଆଦମୀ ପାର୍ଟି ଓ ଡିଏମକେ ନିକଟରେ 10 ଲେଖାଏଁ ସଦସ୍ୟ ରହିଛନ୍ତି । ଅବଶିଷ୍ଟ ସଦସ୍ୟ ଦୁଇ ମେଣ୍ଟରେ ଅନ୍ତର୍ଭୁକ୍ତ ହୋଇନଥିବା କିଛି ଦଳଙ୍କ ନିକଟରେ ରହିଛି । କେସିଆରଙ୍କ ଭାରତ ରାଷ୍ଟ୍ର ସମିତି, ନବୀନ ପଟ୍ଟନାୟକଙ୍କ ବିଜୁ ଜନତା ଦଳ ଓ କିଛି ସ୍ବାଧୀନ ରାଜ୍ୟସଭା ସାଂସଦ ମଧ୍ୟ ରହିଛନ୍ତି ।
ତେବେ ଏପରି ସ୍ଥିତିରେ ବିଜେପି ସରକାର ନିଜର ପୂର୍ବ ସହଯୋଗୀ ‘ଏଆଇଡିଏମକେ’ ସମେତ ଜଗନ ରେଡ୍ଡୀଙ୍କ ଓ୍ବାଇଏସଆର କଂଗ୍ରେସ ପରି ଦଳଙ୍କ ଉପରେ ନିର୍ଭର ହେବାକୁ ବାଧ୍ୟ ହୋଇପାରେ ।ଏଆଇଡିଏମକେ ନିକଟରେ 11 ଓ ଜଗନଙ୍କ ଦଳରେ 4 ଜଣ ରାଜ୍ୟସଭା ସାଂସଦ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
