छत्रपती संभाजीनगर Sanjay Shirsat News : लोकसभा निवडणुकीत राज्यात काही धक्कादायक निकाल लागले. मात्र यात अनेकांचा तोटा झाला असला तरी काही ठिकाणी विजयी उमेदवारांमुळे काही जणांची लॉटरी लागली. असाच प्रकार छत्रपती संभाजीनगर इथं घडला. पालकमंत्री संदीपान भुमरे लोकसभा निवडणूक जिंकल्यानं संजय शिरसाट यांचा मार्ग मोकळा झाल्याचं बोललं जात आहे. एकनाथ शिंदे यांनी बंड केल्यावर ठाकरे सेनेवर आमदार संजय शिरसाट यांनी आक्रमकपणे हल्लाबोल केला. त्यांना मंत्रीपद मिळेल, अशी शक्यता असताना संदीपान भुमरे यांना संधी देण्यात आली. मात्र भुमरे खासदार झाल्यानं शेवटचे काही महिने का होईना, संजय शिरसाट यांना एक संधी निर्माण झाली.
संजय सिरसाट यांना मिळणार संधी ? : औरंगाबाद लोकसभा मतदार संघात महायुतीचे संदीपान भुमरे यांनी आश्चर्यकारक विजय मिळवला. मुख्यमंत्री एकनाथ शिंदे यांनी बंड केल्यावर, शिवसेनेच्या पारंपरिक जागांवर त्यांनी दावा करत ठाकरे यांच्या गटाच्या विरोधात शिवसेनेनं निवडणूक लढवली. त्यात औरंगाबाद ही जागा प्रतिष्ठेची मानली गेली. जिल्ह्यातील पाच आमदारांनी ठाकरे ऐवजी एकनाथ शिंदे यांना साथ दिली. त्यावेळी महत्वाची भूमिका पार पाडली, ती पश्चिम मतदार संघाचे आमदार संजय शिरसाट यांनी. त्यामुळे त्यांना मंत्रीपद मिळेल, अशी शक्यता होती. मात्र युतीमध्ये तीन मंत्रिपदं जिल्ह्याला मिळाले. त्यात पैठणचे आमदार संदीपान भुमरे, सिल्लोडचे आमदार अब्दुल सत्तार, पूर्वचे आमदार अतुल सावे यांची वर्णी लागली. या मंत्रिमंडळात मंत्री होण्याची संधी मिळणार नाही, असं वाटत असताना जिल्ह्याचे पालकमंत्री संदीपान भुमरे खासदार झाल्यानं संजय शिरसाट यांचा मंत्री होण्याचा मार्ग मोकळा झालाय. पण याबाबत बोलताना "मुख्यमंत्री एकनाथ शिंदे जो निर्णय घेतील, त्यानुसार आम्ही काम करू," असं आमदार संजय शिरसाट यांनी सांगितलं.
भाजपाला हवं पालकमंत्री पद : एकनाथ शिंदे मुख्यमंत्री झाल्यावर त्यांनी संभाजीनगर जिल्ह्याचं पालकमंत्री पद त्यांच्या पक्षाकडं राखून ठेवलं. त्यानंतर संदीपान भुमरे यांना कॅबिनेट मंत्री आणि पालकमंत्री पद देण्यात आलं. त्यावेळी मंत्रिपदासाठी आमदार शिरसाट यांनी आपली शक्ती पणाला लावली. मात्र त्यांना पक्षाचं प्रवक्ते पद देण्यात आलं. भुमरे खासदार पदी गेल्यावर आता शिरसाट यांच्या मंत्रिपदाचा मार्ग मोकळा झाला असून त्यांना पालकमंत्री पद देखील मिळेल, अशी चर्चा सुरू झाली. मात्र त्याला भाजपाचा खोडा लागण्याची शक्यता आहे. भाजपा आमदार अतुल सावे जालना जिल्ह्याचे पालकमंत्री असले, तरी त्यांना जिल्ह्याचा मान द्यावा, अशी सुप्त मागणी केली जात आहे. त्यामुळे अवघ्या काही महिन्यांसाठी का होईना संजय शिरसाट यांना मान मिळणार का? याकडं सर्वांचं लक्ष लागलं आहे.
हेही वाचा :
- Sushma Andhare On Sanjay Shirsat : आमदार संजय शिरसाटांना 'ते' वादग्रस्त वक्तव्य पडणार महागात; महिला आयोगाने घेतली गंभीर दखल
- संजय राऊत हे मास लिडर नाही, त्यामुळे मोठा उठाव होणार नाही - आमदार संजय शिरसाठ
- Ambadas Danve संजय शिरसाट यांचे रात्रीचे ट्विट असे म्हणत विरोधी पक्षनेते अंबादास दानवे यांची खोचक टीका
