मुंबई : बांगलादेशात हिंदूंवर अत्याचार होत असून मंदिरावर हल्ले होत आहेत. मात्र पंतप्रधान नरेंद्र मोदी आणि अमित शाहांना हिंदू केवळ मतांसाठी हवाय, असा हल्लाबोल उबाठा खासदार संजय राऊत यांनी केला. यावेळी त्यांनी पराभूत झालेल्या उमेदवारांवरुनही मोठं भाष्य केलं आहे. "ईव्हीएमवरुन आगामी काळात आंदोलन करण्यासाठी शरद पवार, उद्धव ठाकरे आणि राहुल गांधी यांची एकत्र बसून चर्चा होईल, त्यानंतर आंदोलनाची दिशा ठरवण्यात येईल," असंही त्यांनी यावेळी स्पष्ट केलं.
बांगलादेशात हिंदूंवर अत्याचार : बांगलादेशात हिंदूंवर मोठ्या प्रमाणात हल्ले होत आहेत. काही ठिकाणी मंदिरांची तोडफोड करण्यात आली आहे. यावरुनही उबाठा खासदार संजय राऊत यांनी पंतप्रधान नरेंद्र मोदी आणि गृहमंत्री अमित शाह यांच्यावर हल्लाबोल केला. "बांगलादेशात मोठ्या प्रमाणात हिंदूंवर अत्याचार करण्यात येत आहेत. हिंदूंची मंदिरं पाडण्यात येत आहेत. मात्र अद्यापही सरकारनं याबाबत कोणतीही कारवाई केली नाही. पंतप्रधान नरेंद्र मोदी आणि अमित शाह यांना हिंदू केवळ मतांसाठी हवे आहेत," अशी टीका संजय राऊत यांनी केली.
शरद पवार, उद्धव ठाकरे आणि राहुल गांधी ठरवणार आंदोलनाची दिशा : "मारकडवाडी इथं ईव्हीएमविरोधात आंदोलन उभं राहिलं आहे. आगामी काळात ज्या उमेदवारांना विजयाचा विश्वास होता, मात्र निवडणुकीच्या निकालात ते पराभूत झाले, अशांना घेऊन आंदोलन उभं करण्यात येईल. त्यासाठी राष्ट्रवादी शरदचंद्र पवार पक्षाचे प्रमुख शरद पवार, उद्धव ठाकरे आणि काँग्रेस नेते तथा विरोधी पक्षनेते राहुल गांधी यांची एकत्र बसून बैठक होईल. त्यानंतर आगामी आंदोलनाची दिशा ठरवण्यात येईल. मात्र तोपर्यंत ईव्हीएमविरोधात आंदोलन करणाऱ्यांना आमचा पाठिंबा असेल," असंही संजय राऊत यांनी यावेळी बोलताना सांगितलं.
हेही वाचा :
- 'महाराष्ट्र गुजरात भाऊ भाऊ, मात्र केंद्रातील नेत्यांनी नातं खराब केलं'; आता महाराष्ट्राचं पुढं काय होईल, संजय राऊतांचा सवाल
- 'भाजपा अन् मोदी-शाह यांच्या स्वार्थामुळेच जगभरातील हिंदू संकटात;' खासदार संजय राऊतांची टीका
- एकनाथ शिंदे, अजित पवार यांच्यात भांडण लावण्याचा भाजपाचा प्रयत्न; मारकडवाडी प्रकरणावरुन संजय राऊतांचा हल्लाबोल
