नायलॉन मांजा ठरतोय मृत्यूचं कारण, ड्रोनच्या माध्यमातून पोलीस ठेवणार पतंगबाजांवर नजर

नायलॉन मांजामुळं अनेक ठिकाणी अपघात होत असल्याच्या घटना वारंवार समोर येत आहेत. त्यामुळं आता यावर आळा घालण्यासाठी ड्रोनच्या माध्यमातून पोलीस पतंगबाजांवर नजर ठेवणार आहेत.

नाशिक : मकरसंक्रांतीचा सण नाशिक जिल्ह्यात मोठ्या उत्साहात साजरा केला जातो. मात्र, आता पतंग उडवण्यासाठी बंदी असतानाही वापरल्यानं, नायलॉन मांजा नागरिकांच्या जीवावर बेतत आहे. गेल्या महिन्याभरात नाशिक जिल्ह्यात नायलॉन मांजामुळं दोन जणांचा मृत्यू झालाय, तर अनेक जण गंभीर जखमी झाले आहेत. पोलीस प्रशासनानं नायलॉन मांजावर बंदी घातली असली तरी छुप्या पद्धतीनं नायलॉन मांजाची विक्री सुरूच आहे. नाशिक पोलिसांनी महिन्याभरात 19 मांजा विक्रेत्यांवर गुन्हे दाखल केले असून 22 संशयितांना ताब्यात घेतलंय. तर 6 जणांवर तडीपारीची कारवाई करण्यात आलीय. आत्तापर्यंत नायलॉन मांजाचे 843 गट्टू, असा सुमारे 6 लाख 50 हजाराचा माल पोलिसांनी हस्तगत केलाय.

नायलॉन मांजामुळे घडलेल्या अपघाताच्या घटना :

1. नाशिक शहरातील वडाळा गावात नऊ वर्षीय बालकाचा नायलॉन मांजामुळं मृत्यू
2. ओझर उड्डाणपुलावर जळगाव जिल्ह्यातील दुचाकीस्वारांचा मांजामुळं गळा चिरून मृत्यू
3. नाशिक-पुणे रोडवर युवकाची नायलॉन मांजामुळं करंगळी कापली
4. लेखा नगरला दुचाकीस्वाराचा मांजामुळं गळा चिरला आणि 28 टाके पडले
5. वडाळा येथे दुचाकीस्वाराचा मांजामुळे गळा कापला आणि 40 टक्के पडले
6. सावरकर सिडको येथे एका व्यक्तीच्या हाताची बोटं कापली गेली
7. सिन्नर येथील एकाच कुटुंबातील तिघांना नायलॉन मांजामुळं गंभीर जखमा
8. द्वारका भागात महिला नायलॉन मांजामुळं जखमी. कान, नाक, डोळ्याजवळ गंभीर जखमा.

साडेतीन किलो ताण पेलवणार नायलॉन मांजा : पतंग उडवण्यासाठी वापरला जाणारा सुरती मांजाचा ताण तपासला असता 3 किलोपर्यंत ताण सहन करण्याची त्यात क्षमता असल्याचं आढळून आलं. तसंच नायलॉन मांजा साडेतीन किलोपर्यंत ताण सहन करू शकतो, तर साधा मांजा जवळपास एक किलोपर्यंत टिकू शकतो.

ड्रोनद्वारे पाहणी करणार : "नायलॉन मांजा तपासणीसाठी पालिका आणि पोलिसांची पथकं तयार करण्यात आली आहेत. नायलॉन मांजा विक्रीसह वापरावरही बंदी आहे. त्यामुळं कोणीही मांजा वापर करू नये, अन्यथा दहा हजार रुपयांचा दंड आकारण्यात येईल", असं येवला येथील मुख्याधिकारी तुषार आहेर म्हणाले. तर नायलॉन मांजाच्या वापरावर ड्रोनद्वारे पाहणीचं नियोजन केलं असून ही पाहणी स्वतंत्र असणार असल्याचं येवला पोलिसांनी सांगितलं.

"नायलॉन मांजा विक्री आणि वापर करणाऱ्यांवर कठोर कारवाई केली जात आहे. यापुढंही नायलॉन मांजाद्वारे पतंग उडवणाऱ्यांवर आणि त्यांच्या पालकांवरही कारवाई केली जाईल"- संदीप कर्णिक, पोलीस आयुक्त

मागील वर्षी 37 मांजा विक्रेत्यांवर तडीपारीची कारवाई : जीवघेण्या नायलॉन मांजा विक्रीला बंदी असतानाही त्याची नाशिक शहरात छुप्या पद्धतीनं विक्री होत असल्याचं बघायला मिळतंय. जानेवारी 2024 मध्ये नाशिक पोलिसांनी कारवाई करत 37 नायलॉन मांजा विक्रेत्यांचा शोध घेतला होता. त्यांच्या विरोधात एकाचवेळी तडीपारीची कारवाई करण्यात आली होती. तर यापुढं नायलॉन मांजा वापरणाऱ्यांवर देखील कारवाई केली जाणार असल्याचं पोलिसांनी सांगितलंय.

खंडपीठाचा महत्त्वपूर्ण आदेश : घर, मैदान, दुकान किंवा खासगी मालमत्तेत मांजा सापडला तर ते ठिकाण सील करावे, अल्पवयीन मुलांकडं नायलॉन मांजा कुठून आला याची माहिती लपवली तर त्यांच्या पालकांवर गुन्हा दाखल करावा, घरावर पतंग उडवणाऱ्यांवर नजर ठेवावी. तसंच त्यांच्यावर कारवाई संबंधित मालमत्ता धारकांना विचारून करावी, असे आदेश औरंगाबाद खंडपीठानं दिले आहेत.

हेही वाचा -