गौराईंच्या खरेदीची लगबग; यंदा गौराईचा 'हा' आहे ट्रेंड, 'या' दिवशी होणार आगमन - Jyeshtha Gauri Avahana 2024

Jyeshtha Gauri Avahana 2024 : शनिवारी राज्यभरात ढोल-ताशाच्या गजरात गणरायाचं आगमन झालं. गणपतींपाठोपाठ आता 10 सप्टेंबर रोजी गौराईचं आगमन होणार आहे. यंदा गौराईसाठी काय ट्रेंड आहे? जाणून घेऊयात 'ईटीव्ही भारत'च्या स्पेशल रिपोर्टमधून....

मुंबई Jyeshtha Gauri Avahana 2024 : यंदा दरवर्षीप्रमाणे गणपती बाप्पांचं थाटामाटात आगमन झालं असून, आता गणपतीपाठोपाठ गौराईचं आगमन होणार आहे. गौराईचे मुखवटे आणि गौराईला सजवण्यासाठी लागणारे दागिने तसेच रेडीमेड नऊवारी साडी खरेदीसाठी भाविकांची लगबग सुरू असल्याचं दिसून येत आहे.

गौरी पूजन वेळ : यंदा मंगळवारी, 10 सप्टेंबर रोजी गौरीचं आवाहन होणार आहे. तर बुधवारी, 11 सप्टेंबर रोजी गौराईचं पूजन केलं जाणार आहे. तसेच गुरुवारी, 12 सप्टेंबर रोजी गौरीचं विसर्जन होणार आहे.

यंदा फेटांच्या गौराईंचा ट्रेंड : यंदा 'फेटा' परिधान केलेल्या गौराईचं खास आकर्षण असल्याचं दिसून येत आहे. अगदी वीस रुपयांपासून ते हजारो रुपयांपर्यंत गौराईचे वेगवेगळ्या प्रकारचे दागिने देखील लालबागमधील चिवडा गल्लीत असलेल्या 'न्यू हनुमान थेटर गल्ली'त उपलब्ध आहेत.

विविध अलंकार खरेदीसाठी उपलब्ध : लालबाग मार्केटमध्ये दागिन्यांमध्ये कोल्हापुरी साज, बाजूबंद, तोडे, बांगड्या, नथ, ठुशी, चंद्रकोर, साखळ्या, कंबरपट्टा, बिंदी, पैंजण, कृत्रिम फुलांचे गजरे-वेण्या अशी वैविध्यता आहे. या दागिन्यांची किंमत 200 रुपयांपासून ते अगदी 600 रुपयांपर्यंत उपलब्ध असल्याची माहिती चिवडा गल्लीतील विक्रेत्यानं दिली. त्याचप्रमाणं अगदी 20 रुपयांपासून ते थेट एक ते दोन हजार रुपयांपर्यंत गौराईला सजवण्यासाठी नथीपासून ते हार, कंबरपट्टा असे नानाविध अलंकार खरेदीसाठी उपलब्ध आहेत.

हेही वाचा -