इर्शाळवाडी दुर्घटनेला एक वर्ष पूर्ण,अनेक कुटुंबं आजही हक्काच्या निवाऱ्यापासून वंचित - Irshalwadi Tragedy

Irshalwadi Tragedy इर्शाळवाडी येथे दरड कोसळून भीषण दुर्घटना घडली होती. त्या घटनेला आज एक वर्ष पूर्ण होत आहे. दुर्घटनेत उद्ध्वस्त झालेल्या कुटुंबीयांना आजही हक्काची घरं मिळाली नाहीत. या महिन्याच्या अखेरीस घरांचं बांधकाम पूर्ण होण्याची अपेक्षा व्यक्त होत आहे.

रायगड Irshalwadi Tragedy: रायगड जिल्ह्यातील इर्शाळवाडी येथील कुटुंबासाठी 19 जुलै 2023 हा दिवस अत्यंत दु:खद ठरला. त्या घटनेला आता एक वर्ष पूर्ण होत आहे. इर्शाळवाडी साखरझोपेत असताना थरकाप उडवणारी घटना घडली. या रात्री अकराच्या सुमारास अचानक दरड कोसरळसी. यात 84 लोकांचा मृत्यू झाला. 43 कुटुंबांतील 228 रहिवाशांपैकी 23 मुलांसह केवळ 144 जण या घटनेत वाचले. आजही या दुर्घटनेत मृत्यू झालेल्या 57 जणांचे मृतदेह टेकडीच्या भूभागात पुरलेले आहेत. एवढंच नाही तर, उद्ध्वस्त झालेल्या कुटुंबीयांना आजही हक्काची घरं मिळाली नाहीत.

• बचाव कार्य: दरड कोसळल्यानंतर दुसऱ्या दिवशी, म्हणजे 20 जुलै 2023 पासून बचाव कार्य सुरू झालं होतं. पालकमंत्री उदय सामंत यांनी चौथ्या दिवशी (23 जुलै 2024) संध्याकाळी 6 वाजता हे बचाव कार्य थांबवण्यात आल्याची घोषणा केली. अपघातानंतर दुर्गम भौगोलिक स्थान, अंधार आणि निसरडे रस्ते यामुळे बचावकार्यात मोठ्या प्रमाणात अडथळे येत होते.

बचाव कार्यात कोणतंही मशीन वापरण्यात आलं नाही: रायगडच्या खालापूर तहसीलमधील डोंगरमाथ्यावर असलेल्या या इर्शालवाडीला जाण्यासाठी कोणतेही पक्के रस्ते नाहीत. रस्त्यापासून ते किमान एक तासाच्या अंतरावर हे गाव आहे. बचाव पथके ऑपरेशनसाठी उत्खनन किंवा जेसीबी वापरण्यास सक्षम नव्हती. त्यामुळे बचाव पथकाला स्वतःहून ढिगारा खोदून काढावा लागला.

• पीडितांना अद्याप घरे मिळालेली नाहीत: या घटनेला एक वर्ष पूर्ण होऊनही अद्याप पीडित कुटुंबियांना घरे मिळाली नाहीत. महिन्याच्या अखेरी बांधकाम पूर्ण होण्याची अपेक्षा वर्तवण्यात येत आहे. मोरबे धरणाजवळील नानिवली गावात 2.6 हेक्टरचा भूखंड पुनर्वसन प्रकल्पासाठी देण्यात आला. 30 कोटी रुपये खर्चाचा हा प्रकल्प सिडकोकडे सुपूर्द करण्यात आला.

तात्पुरता निवारा: दुर्घटनेतून वाचलेले लोक एका वर्षापासून खालापूर येथील चौक गावात राज्य सरकारने दिलेल्या तात्पुरत्या कंटेनर होम्समध्ये वास्तवास आहेत. सरकारद्वारे 200 लोकांसाठी सकाळ, दुपार आणि रात्रीचं जेवण दिलं जात आहे. वैद्यकीय सुविधा, लहान मुलांसाठी रोपवाटिका, खेळाचे मैदान, 24 तास गरम आणि थंड पाण्याची व्यवस्था करण्यात आली आहे.

7,000 लोकांचे स्थलांतर: इर्शाळवाडी दुर्घटनेनंतर रायगड जिल्ह्यातील 103 भूस्खलन प्रवण गावांमधून 2,040 कुटुंबांतील सुमारे 7,000 लोकांना 51 छावण्यांमध्ये हलवण्यात आलं. 1980 पासून, महाराष्ट्रातील रायगड आणि कोकणात पावसाळ्यात मोठ्या भूस्खलनाच्या दुर्घटना घडल्या आहेत. हवामान बदलाच्या परिणामामुळे अशा घटना वारंवार घडत आहेत, असं तज्ज्ञांचे म्हणणं आहे.

हेही वाचा