मुंबई Ratan Tata Pet Project : उद्योगपती रतन टाटा यांनी देशासाठी मोठं योगदान दिलं आहे. टाटांनी अनेक क्षेत्रात विविध समाजोपयोगी उपक्रम राबवले आहेत. त्याचा फायदा तळागळातील सामान्य लोकांना होत आहे. दरम्यान, आता पाळीव प्राणी पाळणाऱ्यांसाठी एक महत्त्वाची आणि आनंदाची बातमी आहे. रतन टाटा यांनी मुंबईत कुत्री, मांजरं, ससे आणि इतर लहान प्राण्यांसाठी 24 तास खुलं असणारं रुग्णालय बांधलं आहे. या रुग्णालयातून पाळीव प्राण्यांवर चोवीस तास उपचार घेता येणार आहे. यामुळं प्राणीप्रेमींनी आनंद व्यक्त केलाय.
2.2 एकर आणि 165 कोटी रुपये खर्च : उद्योगपती रतन टाटा यांना मुंबईत कोविडच्या आधी प्राण्यांसाठी रुग्णालय बांधायचं होतं. पण कोविडमुळं कामास विलंब झाला. कोविडकाळात रुग्णालयाचं बांधकाम थांबवावं लागलं होतं. यानंतर करार, कागदपत्रे आणि कागदपत्रांची पूर्तता या बाबींसाठी साधारण दीड वर्षांचा कालावधी लागला. आता या रुग्णालयाचं काम अंतिम टप्प्यात आलं आहे. मार्चच्या पहिल्या आठवड्यात रुग्णालय सुरू करण्यात येणार आहे. मुंबईतील महालक्ष्मी येथील हे रुग्णालय 2.2 एकर जागेत पसरलेलं आहे. 165 कोटी रुपये रुग्णालय बांधण्यासाठी खर्च करण्यात आले आहेत. 'टाटा ट्रस्ट्स स्मॉल अ‍ॅनिमल हॉस्पिटल' असं या रुग्णालयाचं नाव आहे. तर साधारण 200 प्राणी राहतील एवढी क्षमता आहे.
चोवीस तास सेवा : सुरुवातीला हे रुग्णालय नवी मुंबईतील कळंबोली येथे होणार होतं. मात्र टाटांनी हे रुग्णालय मुंबईतील मध्यवर्ती ठिकाणी बांधण्याचा निर्णय घेतला. कारण पाळीव प्राण्यांच्या पालकांना मुंबईत येताना प्रवासासाठी लागणारा वेळ, वाहतूक कोंडी या बाबींचा विचार करुन दक्षिण मुंबईतील महालक्ष्मी येथे हे रुग्णालय बांधण्यात आलं असल्याचं रतन टाटांनी सांगितलं. तसंच मुंबईत पाळीव प्राण्यांच्या आपत्कालीन सेवांची गरज ओळखून हे रुग्णालय बांधलं आहे. पाळीव प्राणी जसे कुत्री, मांजरं, ससे आणि इतर लहान प्राण्यांसाठी भारतातील काही रुग्णालयं चोवीस तास सेवा देतात, त्यापैकी मुंबईतील हे एक रुग्णालय असणार आहे.
माझे स्वप्न सत्यात उतरले : एक पाळीव प्राणी हा आजच्या कुटुंबातील सदस्यापेक्षा वेगळा नसतो. मी आयुष्यभर अनेक प्राणी पाळले आहेत. त्यांचा पालक म्हणून आणि अनेक पाळीव प्राण्याच्या पालकांची अडचण ओळखून मी हे रुग्णालय बांधलं आहे, असं 86 वर्षीय रतन टाटांनी म्हटलंय. शहरात एक अत्याधुनिक प्राणी आरोग्य केंद्र असावं हे माझं वैयक्तिक स्वप्न आहे आणि शेवटी ते आता सत्यात आल्याचं पाहून मला आनंद होत आहे. हे रुग्णालय प्राण्यांवर उपचार करुन प्राण्यांना जीवनदान देतील, रोग बरे करण्यास मदत होईल, असंही टाटा यांनी म्हटलंय.
वन्य प्राण्यांसाठीही रुग्णालय हवे : उद्योगपती रतन टाटा यांना मुंबईत पाळीव प्राण्यांसाठी रुग्णालय उभारलं आहे. यामुळं कुत्रे, मांजर, ससे अशा पाळीव प्राण्यांना वेळेवर उपचार मिळतील. यामुळं या प्राण्यांना जीवनदान मिळेल. जसं पाळीव प्राण्यासाठी रुग्णालय बांधलं आहे. तसे वाईल्ड अ‍ॅनिमलसाठी (आपल्या अवतीभवती असणारे प्राणी) देखील रुग्णालय झालं पाहिजे. कारण हे प्राणी जेव्हा जखमी होतात, तेव्हा त्यांना वेळेवर उपचार मिळत नाहीत, परिणामी यात काही प्राण्यांना जीव सुद्धा गमवावा लागतो, म्हणून वाईल्ड अ‍ॅनिमलसाठी एखादे रुग्णालय झाले पाहिजे, अशी अपेक्षा प्राणी मित्र शिवाजी बाली यांनी व्यक्त केलीय.
हेही वाचा -
