तोतया पोलीस पथकाचा कुरियर व्हॅनवर दरोडा; ५ कोटी ४० लाख लुटले, चौघांना अटक - Robber absconded

Cash Robbery Case : मुंबई-नाशिक महार्गावरील शहापूर तालुक्यातील आठगाव हद्दीतील महामार्गावर अज्ञात दरोडेखोरांनी 15 मार्च रोजी कुरिअर व्हॅनवर दरोडा टाकून 5 कोटी 40 लाखांची रोकड लुटली होती. याप्रकरणी दाखल तक्रारीवरून ठाणे जिल्ह्यातील शहापूर पोलिसांनी काल रात्री (20 मार्च) चार दरोडेखोरांना अटक केली आहे. उर्वरित चार दरोडेखोर फरार असून पोलीस त्यांचा शोध घेत आहेत.

ठाणे Cash Robbery Case : राष्ट्रीय महामार्गावर वाहनांना लुटण्याच्या घटना नेहमीच घडत असतात. अशीच एक घटना ठाणे जिल्ह्यातही घडलेली आहे. अज्ञात दरोडेखोरांच्या टोळीतील आठ जणांनी फिल्मी स्टाईलने पोलिसांचे पथक असल्याचे भासवून एका कुरिअर कंपनीच्या व्हॅनवर दरोडा टाकला. यानंतर त्यामधील ५ कोटी ४० लाखाची रोकड लुटल्याची खळबळजनक घटना समोर आली आहे. ही घटना मुंबई-नाशिक महामार्गावरील शहापूर तालुक्यातील आठगाव हद्दीतील महामार्गावर 15 मार्च रोजी घडली होती. याप्रकरणी कुरिअर कंपनीच्या कर्मचाऱ्याच्या तक्रारीवरून शहापूर पोलीस ठाण्यात अज्ञात आठ दरोडेखोरांवर विविध कलमांनुसार गुन्हा दाखल करण्यात आला आहे. काल रात्री चार दरोडेखोरांना अटक केली गेली. उर्वरित चार दरोडेखोर फरार असून पोलीस त्यांचा शोध घेत आहेत.

व्यापाऱ्यांची कोट्यवधीची रोकड घेऊन निघाले अन् : मिळालेल्या माहितीनुसार, तक्रारदार संतोष तानाजीराव थोरात हे जळगावचे रहिवाशी असून ते जळगाव मधील स्कायकिंग कुरियर सर्व्हिसमध्ये नोकरी करतात. या कुरियर मार्फत जळगावहून मुंबईतील व्यापारांना व्हॅनमध्ये रोकड पोहोचवण्याचा व्यवसाय करतात. त्यातच जळगाव वरून कैलाश लोहार आणि सचिन सोडे हे दोघे चालक आणि कामगार रोकड पोचविण्याचे काम करत असतात. नेहमी प्रमाणे हे दोघे जळगाव वरून १५ मार्च रोजी मुंबईच्या दिशेने व्हॅनमध्ये व्यापाऱ्यांची कोट्यवधीची रोकड घेऊन निघाले होते.

रक्कम घेऊन नाशिकच्या दिशेने काढला पळ : ही व्हॅन इगतपुरीवरून १५ मार्च रोजी पहाटेच्या सुमारास मुंबई-नाशिक महार्गावरील शहापूर तालुक्यातील आठगाव हद्दीतील महामार्गावर आली. दरम्यान इनोव्हा कारमधून अज्ञात दरोडेखोर त्यांच्या मागावर असताना त्यांनी त्या ठिकाणी पोलीस पथक असल्याचं सांगून व्हॅनच्या चालकाला व्हॅन थांबून बाजूला घेण्यास सांगितले. तसेच व्हॅनमध्ये काय रोकड आहे का? असल्यास तुम्हाला जेलमध्ये जावे लागेल. त्यामुळे तुमच्या व्हॅनची तपासणी करायची आहे, असं सांगून व्हॅनमधील नोटांच्या बंडल असलेल्या दोन पॅक गोण्यातील ५ कोटी ४० लाखांची रोकड बाहेर काढली. यानंतर दरोडेखोर ही रक्कम त्याच्या इनोव्हा कारमध्ये टाकून नाशिकच्या दिशेने पळून गेले.

शहापूर पोलीस ठाण्यात तक्रार दाखल : व्हॅन चालक आणि तक्रारदाराने मुंबईतील कुरियर कंपनीच्या कार्यालयात जाऊन हा प्रकार येथील व्यवस्थापकाला सांगितला. यानंतर त्यांनी मुंबईतील एल. टी. मार्ग पोलीस ठाण्यात १५ मार्च रोजी घडलेल्या घटनेचे कथन करून तक्रार देण्यासाठी गेले. मात्र, दरोड्याची घटना ठाणे जिल्ह्यातील शहापूर पोलीस ठाण्याच्या हद्दीत घडल्यानं याची तक्रार १७ मार्च रोजी शहापूर पोलीस ठाण्यात तक्रारदार संतोष तानाजीराव थोरात यांनी नोंदविली. त्यांच्या तक्रारीवरून अज्ञात आठ दरोडेखोरांवर भादंवि कलम १७०, ३४, ३४१, ३१९, ४२० प्रमाणे गुन्हा दाखल करून या लुटीच्या गुन्ह्याचा तपास पोलीस पथकाने सुरू केला. तसेच या गुन्ह्याचा तपास स्थानिक पोलीस पथकासह ठाणे ग्रामीण गुन्हे शाखेचे पथक समांतर तपास करीत आहेत.

चार दरोडेखोरांना अटक : या संदर्भात शहापूरचे डीवायएसपी मिलींद शिंदे यांच्याशी संपर्क साधला असता घटनेतील चार दरोडेखोरांना अटक केली. या गुन्ह्यातील इतर दरोडेखोरांचा शोध सुरू आहे. लवकरच ते दरोडेखोर पकडून त्यांच्याकडून लुटून नेलेली रोकड जप्त करण्यात येणार असल्याची माहिती त्यांनी दिली.

हेही वाचा :