मान्सूनमध्ये महाराष्ट्रात सरासरीच्या 99 टक्के पाऊस पडण्याची शक्यता; शेतकऱ्यांनी कधी पेरणी करावी? - Maharashtra Weather Forecast

Average Rainfall In Maharashtra : यंदाच्या मान्सूनमध्ये महाराष्ट्रात सरासरीच्या 99% पाऊस होण्याची शक्यता हवामान तज्ञांनी व्यक्त केलीय. त्यामुळं शेतकऱ्यांनी पुरेसा पाऊस झाल्यानंतरच पेरणी करावी, असं आवाहन हवामान तज्ञ रामचंद्र साबळे यांनी केलंय.

पुणे Average Rainfall in Maharashtra : गेल्या काही दिवसांपासून राज्यातील काही भागात उन्हाचा चटका, तर काही ठिकाणी अवकाळी पाऊस पाहायला मिळत आहे. केरळमध्ये यंदा मान्सून लवकरच दाखल झाला असून, महाराष्ट्रात पावसाचं आगमन देखील लवकर होणार आहे.यंदाच्या या मान्सूनमध्ये महाराष्ट्रात सरासरीच्या 99 टक्के पाऊस पडण्याची शक्यता, हवामान तज्ञ डॉ. रामचंद्र साबळे यांनी व्यक्त केली आहे.

महाराष्ट्रात सरासरीच्या 99% पाऊस : राज्यातील पावसाचा अंदाज काय असणार आहे, याबाबत डॉ.रामचंद्र साबळे यांची पुण्यात पत्रकार परिषद आयोजित करण्यात आली होती. यावेळी त्यांनी ही माहिती दिली. यावेळी रामचंद्र साबळे म्हणाले, महाराष्ट्रात सरासरीच्या 99% पाऊस होण्याची शक्यता आहे. हा अंदाज कमाल तापमान, सकाळ, दुपारची सापेक्ष आर्द्रता, वाऱ्याचा ताशी वेग, सुर्यप्रकाशाचा कालावधी या निकषावर आधारीत आहे.

असा असणार पाऊस : वाऱ्याचा वेग, सुर्यप्रकाशाचा कालावधी, तापमान कमी आढळल्यानं जुन, जुलै महिन्यात धुळे, राहुरी, अकोला, पाडेगाव, शिंदेवाही, पुणे, कोल्हापुर येथे पावसात मोठा खंड राहण्याची शक्यता आहे. तसंच दापोली, नागपूर, निफाड, सोलापुर, जळगाव, परभणी इथं पावसाच्या खंडाचा कालावधी कमी राहण्याची शक्यता आहे. ऑगस्ट, सप्टेंबर महिन्यात पावसाचं प्रमाण अधिक राहील, असं हवामान अंदाज साबळे यांनी व्यक्त केलाय. राज्यात यंदा पश्चिम विदर्भात 98, मध्य विदर्भात 98, तर पूर्व विदर्भात 103, मराठवाडा विभागात 97, कोकण विभागात 106, उत्तर महाराष्ट्रामध्ये 98, पश्चिम महाराष्ट्रामध्ये 97 टक्के पाऊस पडण्याची शक्यता आहे.

शेतकऱ्यांना आवाहन : यंदा मान्सूनमध्ये मोठा खंड पडणार असल्याची शक्यता असून शेती व्यवसाय दिवसेंदिवस हवामानामुळं प्रभावित होत आहे. जिथं जास्त पाऊस झाला, तिथंच शेतकऱ्यांनी पेरणी केली पाहिजे. जिथं कमी पाऊस आहे, तिथं पेरणी करू नये. तसंच पीक घेताना देखील काळजी घेतली पाहिजे, असं रामचंद्र साबळे म्हणाले.

हे वाचलंत का :