माढा Uttamrao Jankar support NCP : माळशिरस तालुक्यातील धनगर समाजाचे अजित पवार गटाचे नेते उत्तमराव जानकर यांनी आज माढा लोकसभेसाठी राष्ट्रवादी काँग्रेस शरद पवार गटाला पाठिंबा दिलाय. आमच्या गटाचे नेते अजित पवार यांचा बारामतीमध्ये पराभव झाल्याशिवाय मी शरद पवार गटामध्ये प्रवेश करणार नाही असं त्यांनी सांगितलं. यावेळी राष्ट्रवादी काँग्रेसचे प्रदेशाध्यक्ष जयंत पाटील, माढा लोकसभेचे उमेदवार धैर्यशील मोहिते पाटील, जयसिंह मोहिते पाटील, विठ्ठल सरकारी साखर कारखान्याचे चेअरमन अभिजीत पाटील यांच्यासह हजारो कार्यकर्ते उपस्थित होते. तसंच आपण जाब विचारण्यासाठी फडणवीस यांची भेट घेतल्याचा खुलासाही जानकर यांनी केला.
कार्यकर्त्यांशी चर्चा करुन निर्णय : माढा लोकसभा मतदार संघात उमेदवारी जाहीर झाल्यापासूनच सातत्यानं रोज नवनवीन घडामोडी घडत आहेत. भाजपानं विद्यमान खासदार रणजीत सिंह नाईक निंबाळकर यांना उमेदवारी जाहीर केल्यानं अकलूज येथील मोहिते पाटील गट अस्वस्थ झाला होता. त्यांनी निंबाळकर यांची उमेदवारी बदलण्याची मागणी केली होती. अकलूज येथील शिवरत्न बंगल्यावर मोहिते पाटील समर्थकांची बैठक झाली आणि त्यात मोहिते पाटील यांनी माढा लोकसभा निवडणूक लढवण्यावर चर्चा झाली आणि मोहिते पाटील यांचा शरद पवार गटात समावेश झाला. मोहिते पाटील यांचा शरद पवार गटामध्ये प्रवेश झाल्यानं सोलापूर जिल्ह्यामध्ये शरद पवार गटाला ताकद मिळाली. मात्र मोहिते पाटील यांचा शरद पवार गटामध्ये प्रवेश झाल्यानंतर दुसऱ्या दिवशी खास विमानानं देवेंद्र फडणवीस यांनी धनगर समाजाचे नेते उत्तमराव जानकर यांना नागपूर इथं भेटीसाठी बोलवलं होतं. नागपूरमध्ये देवेंद्र फडणवीस यांच्याशी चर्चा झाल्यानंतर उत्तमराव जानकर यांनी वेळापूरमध्ये त्यांच्या कार्यकर्त्यांसह बैठक घेतल्यानंतर जानकर समर्थक कार्यकर्त्यांनी शरद पवार यांच्या तुतारीला पाठिंबा देण्याची मागणी करण्यात आली होती. तेव्हा उत्तमराव जानकर यांनी 19 तारखेला आपली भूमिका जाहीर करणार असल्याचं माध्यमांशी बोलताना सांगितलं होतं.
दोघांनी एकमेकांना मदत करायची : उत्तमराव जानकारांनी आगामी विधानसभा निवडणुकीसाठी तयारी सुरू असून केली असून तिथं मोहिते पाटील यांच्या पाठिंब्यावर ते माळशिरसमध्ये विधानसभा निवडणूक जिंकू शकतात असा अंदाज बांधला जातोय. मागील झालेल्या विधानसभा निवडणुकीमध्ये उत्तमराव जानकर यांचा आमदार राम सातपुते यांनी केवळ अडीच हजार मतांनी पराभव केला होता. त्यामुळं लोकसभेला जानकर यांनी मोहिते पाटील यांना मदत करायची तसंच विधानसभेला मोहिते पाटील यांनी उत्तम जानकर यांना मदत करायची असा ठराव झालाय. माळशिरस मतदारसंघामध्ये उत्तमराव जानकर यांना मानणारा मोठा जनसमुदाय आहे. उत्तमराव जानकर हे धनगर समाजाचे नेते असून जानकर यांच्या भूमिकेमुळं माढा लोकसभा मतदारसंघामध्ये विजयाची गणितं अवलंबून असणार आहेत. त्यामुळं उत्तमराव जानकर आपलं वजन मोहिते पाटील यांच्या पारड्यात टाकणार आहेत.
चाळीस वर्षातील राजकीय वैर संपुष्टात : माळशिरस तालुक्यात गेल्या चाळीस वर्षांपासून मोहिते पाटील आणि उत्तमराव जानकर यांचं राजकीय वैर आहे. मात्र मागील लोकसभा आणि विधानसभेमध्ये बाहेरील उमेदवार निवडून द्यावा लागत असल्यानं स्वतःचं अस्तित्व निर्माण करण्यासाठी मोहिते पाटील आणि जानकर एकत्र आले आहेत. आपण एकमेकांबरोबर किती दिवस संघर्ष करणार असा सवाल कार्यकर्ते विचारत होते. म्हणून स्थानिक नेतृत्वासाठी लोकसभेला मोहिते पाटील आणि विधानसभेला जानकर असं ठरल्यानं गेल्या चाळीस वर्षातील राजकीय वैर संपुष्टात येणार आहे.
हेही वाचा :
