नाशिकमध्ये मनोज जरांगे पाटलांची रॅली; 'भुजबळ फार्म'ची सुरक्षा वाढवली, शाळांना सुट्टी जाहीर - Manoj Jarange Patil Rally Nashik

Manoj Jarange Patil Rally Nashik : राज्यात ओबीसी आणि मराठा आरक्षणावरुन चांगलाच वाद पेटला आहे. मराठा समाजाला आरक्षण (Maratha Reservation) मिळावं या मागणीसाठी मनोज जरांगे पाटील (Manoj Jarange Patil) यांच्या नेतृत्वाखाली राज्यभर मराठा आरक्षण रॅली सुरू आहे. आज या रॅलीचा समारोप नाशिकमध्ये होत आहे.

नाशिक Manoj Jarange Patil Rally Nashik : मराठा आंदोलक मनोज जरांगे पाटील यांची आज नाशिकमध्ये भव्य रॅली होत आहे. नाशिक हा ओबीसी नेते छगन भुजबळ यांचा गड मानला जातो. यामुळं मराठा आणि ओबीसी नेते आमनेसामने येण्याची शक्यता आहे. त्यामुळं रॅलीदरम्यान कोणताही अनुचित प्रकार घडू नये, यासाठी पोलीस सतर्क आहेत.

लाखो मराठा बांधव नाशिकमध्ये दाखल : मनोज जरांगे पाटील (Manoj Jarange Patil) यांच्या नेतृत्वाखाली मराठा आरक्षणाच्या (Maratha Reservation) मागणीसाठी आज (मंगळवारी) शहरातून मराठा आरक्षण रॅली काढण्यात येणार आहे. या रॅलीसाठी राज्यभरातून लाखो मराठा बांधव नाशिकमध्ये दाखल झाले. या पार्श्वभूमीवर शहर पोलिसांनी बंदोबस्ताचं नियोजन केलं आहे. रॅलीदरम्यान कुठलाही अनुचित प्रकार होऊ नये यासाठी ओबीसी नेते मंत्री छगन भुजबळ यांच्या 'भुजबळ फार्म' (Bhujbal Farm Nashik) या निवासस्थानी बंदोबस्त वाढवण्यात आला आहे.

पोलिसांकडून कडेकोट बंदोबस्त : मराठा समाजाला आरक्षण मिळावं या मागणीसाठी मनोज जरांगे पाटील यांच्या नेतृत्वाखाली राज्यभर मराठा आरक्षण रॅली सुरू आहे. आज या रॅलीचा समारोप नाशिकमध्ये होत आहे. मराठा समाजाच्या वतीनं शहरात स्वगताची तयारी झाली. राज्यभरातून हजारो समर्थक या रॅलीमध्ये सहभागी होण्याची शक्यता आहे. यासाठी पोलिसांकडून वाहतुकीस अडथळा होऊ नये यासाठी मार्गात बदल करण्यात आला आहे. तसेच पोलिसांचा कडेकोट बंदोबस्त लावण्यात आला आहे.

पोलिसांकडून घडामोडींवर लक्ष : नाशिक शहर पोलिसांकडून शहरातील घडामोडींवर बारकाईनं लक्ष ठेवलं जात आहे. तसेच काही पदाधिकाऱ्यांना प्रतिबंधात्मक नोटीसा बजावण्यात आल्या आहेत. यासोबतच कठोर कारवाईची समजही पोलिसांकडून देण्यात आली आहे. पोलिसांच्या गोपनीय शाखेकडून करडी नजर ठेवली जात आहे. त्याचबरोबर भुजबळ फार्म येथे कडेकोट पोलीस बंदोबस्त तैनात करण्यात आला आहे. फार्मवर येणाऱ्या जाणाऱ्यांची तपासणी केली जात असल्याचं पोलीस अधिकाऱ्यांनी सागितलं.

या मार्गावरील वाहतूक बंद : 13 ऑगस्ट रोजी सकाळी आठ वाजेपासून शहरातील स्वामीनारायण मंदिर ते कन्नमार पुलापर्यंत, संतोष टी पॉईंट ते दिंडोरी नाकापर्यंतचा मार्ग बंद असणार आहे. शांतता रॅली समितीकडून दोन हजार स्वयंसेवकांची नियुक्ती करण्यात आली.

रस्त्याच्या मधोमध स्टेज : मराठा समाजाच्या शांतता रॅलीचा समारोप सीबीएस येथे होत आहे. यासाठी मुख्य रस्ता असलेल्या सीबीएस चौकात 20 बाय 30 आकाराचा भव्य स्टेज उभारण्यात आला. मनोज जरांगे पाटील यांना चारही बाजूनं बघता आणि ऐकता येण्यासाठी हा स्टेज उभारण्यात आल्याचं आयोजकांनी सांगितलं. मात्र, वाहतूक बंद करून रस्त्याच्या मधोमध स्टेज उभारण्यासाठी परवानगी कोणी दिली? असा प्रश्न सर्वसामान्य नागरिकांना पडला आहे.

शाळा, महाविद्यालयाला सुट्टी जाहीर : जरांगे पाटील यांच्या रॅलीसाठी जिल्हा प्रशासनानं शहरातील शाळा, महाविद्यालयांना सुट्टी जाहीर केली. जरांगे पाटील यांच्या समारोप सभेला मोठ्या संख्येने मराठा बांधव येणार असल्यानं, विद्यार्थ्यांची गैरसोय होऊ नये म्हणून प्रशासनानं हा निर्णय घेतला आहे.

हेही वाचा -