नवी दिल्ली- मुख्यमंत्री देवेंद्र फडणवीस यांनी पंतप्रधान नरेंद्र मोदींची भेट घेतली. या भेटीनंतर माध्यमांशी संवाद साधताना मुख्यमंत्री फडणवीस म्हणाले, "पंतप्रधान मोदींची भेट घेतली आहे. त्यांचा आशीर्वाद घेतला. पंतप्रधान महाराष्ट्राला पूर्ण सहकार्य करणार आहेत."
मुख्यमंत्री देवेंद्र फडणवीस काय म्हणाले? : नव्या सरकारमध्ये खातेवाटप झालेलं नाही. त्याबाबत मुख्यमंत्री देवेंद्र फडणवीस म्हणाले, "अजित पवार हे त्यांच्या कामानं आणि मी माझ्या कामानं आलो आहे. माझी आणि अजित पवारांच्या भेट झाली नाही. मंत्रिमंडळासाठी आमच्यात कोणताही तिढा नाही. एकनाथ शिंदे हे मुंबईत आहेत. आमच्या पक्षाचे नेते संसदीय मंडळ आणि पक्षाचे वरिष्ठ नेते मंत्री ठरवितात. कोण मंत्रिपदाचे उमेदवार असतील हे ठरवण्यात आले आहे. मंत्रिपदासाठी फॉर्म्युला ठरला आहे, हे तुम्हाला लवकरच कळणार आहे."
मा. राष्ट्रपती जी, मा. उपराष्ट्रपती जी, मा. पंतप्रधान नरेंद्र मोदीजी आणि पक्षातील प्रमुख नेत्यांची सदिच्छा भेट घेत महाराष्ट्राच्या विकासयात्रेसाठी आशीर्वाद प्राप्त केले.
— Devendra Fadnavis (@Dev_Fadnavis) December 12, 2024
(माध्यमांशी संवाद | नवी दिल्ली | 12-12-2024)#NewDelhi pic.twitter.com/1nTxcbPw00
त्यांना भेटणं ही आनंदाची बाब : पुढे मुख्यमंत्री म्हणाले, "मोदी आमच्यासाठी पितृतुल्य व्यक्तिमत्व आहेत. आम्ही चुकलो तर ते आमच्यावर रागावतात देखील. त्यांना भेटणं ही आनंदाची बाब असते. त्यांना छत्रपतींची प्रतिमा भेट दिली. कारण, स्वराज्याची राजधानी रायगडला भेट देऊन त्यांनी प्रचाराची सुरुवात केली होती. छत्रपतींनी दाखविलेल्या मार्गावरूनच ते चालतात."
ज्यावेळी आपण पहिल्यांदा मुख्यमंत्रि‍पदाची शपथ घेतो तेव्हा राष्ट्रपती, उपराष्ट्रपती, पंतप्रधान यांची भेट घ्यायची असते. त्याप्रमाणे मी त्यांची भेट घेतली आणि महाराष्ट्राच्या विकासयात्रेसाठी आशीर्वाद प्राप्त केले. - देवेंद्र फडणवीस, मुख्यमंत्री
शरद पवार यांना दिल्या शुभेच्छा : उपमुख्यमंत्री अजित पवार यांनी राष्ट्रवादीचे (एसपी) अध्यक्ष शरद पवार यांची भेट घेतली आहे. त्याबाबत मुख्यमंत्री देवेंद्र फडणवीस म्हणाले, " आमच्याकडून देखील शरद पवार यांना शुभेच्छा आहेत. त्यांच्या हातून देशाची सेवा घडत राहो, ही शुभेच्छा."
म्हणून शिवाजी महाराजांची मूर्ती त्यांना भेट दिली : पंतप्रधान नरेंद्र मोदी हे आमच्या पक्षाचे सर्वोच्च नेते आहेत. त्यासोबत पालकाच्या भूमिकेत ते असतात. काही चुकले तर रागवतात. मार्गदर्शन करतात. 2014 साली नरेंद्र मोदी यांनी त्यांच्या प्रचाराची सुरुवात रायगडावर येऊन छत्रपती शिवरायांना नमन करून केली होती. छत्रपती शिवाजी महाराजांबद्दल त्यांच्या मनात प्रचंड श्रद्धा आहे. छत्रपती शिवाजी महाराजांनी दाखवलेल्या मार्गावर ते चालण्याचा प्रयत्न करतात म्हणून मी छत्रपती शिवाजी महाराजांची मूर्ती त्यांना भेट म्हणून दिली
हेही वाचा -
