കാൺപൂർ (ഉത്തർപ്രദേശ്‌): ഇന്ത്യയിലെ ആദ്യത്തെ ഹൈപ്പർവെലോസിറ്റി എക്‌സ്‌പാൻഷൻ ടണൽ ടെസ്‌റ്റ്‌ സൗകര്യം വിജയകരമായി സ്ഥാപിക്കുകയും പരീക്ഷിക്കുകയും ചെയ്‌ത്‌ ഇന്ത്യൻ ഇൻസ്‌റ്റിറ്റ്യൂട്ട് ഓഫ് ടെക്നോളജി കാൺപൂർ (IITK ) ചരിത്രം കുറിച്ചു (IIT Kanpur develops India's first hypervelocity expansion tunnel test facility).
ഹൈപ്പർസോണിക് ടെസ്റ്റിംങ് ശേഷിയുള്ള വിരലിലെണ്ണാവുന്ന ചില രാജ്യങ്ങളുടെ പട്ടികയിൽ ഇന്ത്യയും ഉൾപ്പെടുത്തിയത് വലിയ നേട്ടമാണെന്ന് ഐഐടി കാണ്‍പൂർ എക്‌സിൽ കുറിച്ചു. അന്തരീക്ഷ പ്രവേശന സമയത്ത് നേരിടുന്ന ഹൈപ്പർസോണിക് അവസ്ഥകളെ അനുകരിക്കുന്നതിനാൽ ഗഗൻയാൻ, ആർഎൽവി (Reusable Launch Vehicle), ഹൈപ്പർസോണിക് ക്രൂയിസ് മിസൈലുകൾ എന്നിവയുൾപ്പെടെയുള്ള ഇന്ത്യൻ ബഹിരാകാശ ഗവേഷണ സ്ഥാപനത്തിൻ്റെയും ( ISRO) പ്രതിരോധ ഗവേഷണ വികസന സംഘടനയുടെയും (DRDO) നടന്നുകൊണ്ടിരിക്കുന്ന ദൗത്യങ്ങൾക്കായുള്ള വിലപ്പെട്ട പരീക്ഷണ സൗകര്യമാണിത്.
എയറോനോട്ടിക്കൽ റിസർച്ച് ആൻഡ് ഡെവലപ്‌മെൻ്റ് ബോർഡിൻ്റെയും ഇന്ത്യാ ഗവൺമെൻ്റ് ഓഫ് സയൻസ് ആൻഡ് ടെക്നോളജി വകുപ്പിൻ്റെയും ധനസഹായത്തോടെ മൂന്ന് വർഷത്തിനുള്ളിൽ തദ്ദേശീയമായി രൂപകൽപന ചെയ്യുകയും വികസിപ്പിച്ചെടുക്കുകയും ചെയ്‌ത 24 മീറ്റർ നീളമുള്ള സൗകര്യമാണ് 'ജിഗർതണ്ട' എന്ന് വിളിപ്പേരുള്ള എസ്‌2 സൗകര്യം.
ഇത് ഐഐടി കാണ്‍പൂരിന്‍റെ മഹത്തായ നേട്ടത്തേയും ഇന്ത്യയുടെ ബഹിരാകാശ, പ്രതിരോധ മേഖലകളിലെ പ്രധാന ശേഷി വർധനയെയും പ്രതിനിധീകരിക്കുന്നു. ആധുനിക ഹൈപ്പർവെലോസിറ്റി ടെസ്‌റ്റിങ് കഴിവുകൾ ഇപ്പോൾ ആഭ്യന്തരമായി ലഭ്യമാണ്. നൂതന ഹൈപ്പർസോണിക് സാങ്കേതിക വിദ്യകളും സംവിധാനങ്ങളും വികസിപ്പിക്കുന്നതിൽ ഇന്ത്യ മികച്ച സ്ഥാനത്താണ്.
