തിരുവനന്തപുരം: എഡിജിപി എംആര്‍ അജിത് കുമാറിനെതിരെ ഉയര്‍ന്ന ആരോപണങ്ങള്‍ അന്വേഷിക്കാൻ പ്രത്യേക സംഘത്തെ നിയോഗിച്ച് സര്‍ക്കാര്‍. സംസ്ഥാന പൊലീസ് മേധാവി ഷെയ്‌ക് ദർവേഷ് സാഹിബിനാണ് ഉന്നതതല അന്വേഷണ സംഘത്തിന്‍റെ ചുമതല. എഡിജിപിക്കെതിരായ അന്വേഷണത്തിനായി താഴെ റാങ്കിലുള്ള ഉദ്യോഗസ്ഥരെയും ഉള്‍പ്പെടുത്തിയിട്ടുണ്ട്.
ജി സ്‌പർജൻ കുമാർ (ഐജിപി, സൗത്ത് സോൺ & സിപി, തിരുവനന്തപുരം സിറ്റി), തോംസൺ ജോസ് (ഡിഐജി, തൃശൂർ റേഞ്ച്), എസ് മധുസൂദനൻ (എസ്‌പി, ക്രൈംബ്രാഞ്ച്, തിരുവനന്തപുരം), എ ഷാനവാസ് (എസ്‌പി, എസ്എസ്‌ബി ഇന്‍റലിജൻസ്, തിരുവനന്തപുരം) എന്നിവരാണ് അന്വേഷണ സംഘത്തിലെ മറ്റ് ഉദ്യോഗസ്ഥര്‍. ഉന്നയിക്കപ്പെട്ട പരാതികളിലും ആരോപണങ്ങളിലും സംഘം അന്വേഷണം നടത്തും. മാത്രമല്ല ഒരു മാസത്തിനകം അന്വേഷണം പൂർത്തിയാക്കി സർക്കാരിന് റിപ്പോർട്ട് സമർപ്പിക്കണമെന്നാണ് അന്വേഷണ സംഘത്തോട് മുഖ്യമന്ത്രി നിർദേശം നൽകിയത്.
കഴിഞ്ഞ ഞായറാഴ്‌ചയാണ് (സെപ്‌റ്റംബർ 1) മുഖ്യമന്ത്രിയുടെ വിശ്വസ്‌തനായ എഡിജിപി അജിത് കുമാർ ഉൾപ്പെടെയുള്ള ചില ഉന്നത ഐപിഎസ് ഉദ്യോഗസ്ഥർക്കെതിരെ പി വി അൻവർ എംഎൽഎ ഗുരുതര ആരോപണവുമായി രംഗത്തെത്തിയത്. ഇതിന്‍റെ അടിസ്ഥാനത്തിൽ കേരള സർക്കാർ ഉന്നതതല അന്വേഷണം പ്രഖ്യാപിച്ചിരുന്നു. പിവി അൻവറിന്‍റെ ആരോപണങ്ങളിൽ പ്രതിഷേധിച്ച് പ്രതിപക്ഷവും രംഗത്ത് വന്നിരുന്നു.
മുഖ്യമന്ത്രി പിണറായി വിജയന്‍റെ പൊളിറ്റിക്കൽ സെക്രട്ടറി പി ശശിയും എഡിജിപി (ക്രമസമാധാനം) അജിത് കുമാറും വിശ്വാസ ലംഘനമാണ് നടത്തിയതെന്നും ഉത്തരവാദിത്തങ്ങൾ സത്യസന്ധമായി നിർവഹിക്കുന്നതിൽ അവർ പരാജയപ്പെട്ടെന്നുമായിരുന്നു നിലമ്പൂർ എംഎൽഎ അൻവർ ആരോപിച്ചത്.
Also Read: എഡിജിപിക്കെതിരായ പിവി അൻവര്‍ എംഎല്‍എയുടെ ആരോപണം; പൊതുവേദിയില്‍ അന്വേഷണം പ്രഖ്യാപിച്ച് മുഖ്യമന്ത്രി
