കണ്ണൂര്‍ എഡിഎം ഇതുവരെ മോശം ട്രാക്ക് റെക്കോഡില്ലാത്ത ഉദ്യോഗസ്ഥന്‍... മലയാലപ്പുഴ പത്തിശേരി കാരുവേലില്‍ നവീന്‍ ബാബുവിനെ കുറിച്ച് നാട്ടുകാര്‍ക്കെല്ലാം പറയാനുള്ളത് നന്മ മാത്രം. അഞ്ച് പൈസ കൈക്കൂലി വാങ്ങാത്ത ഉദ്യോഗസ്ഥനായിരുന്നു. കറ തീര്‍ന്ന സിപിഎമ്മുകാരന്‍. തുടക്കത്തില്‍ എന്‍ജിഒ യൂണിയന്‍റെ സജീവ പ്രവര്‍ത്തകന്‍.
എഡിഎം ആയപ്പോഴും ഇടതു സര്‍വീസ് സംഘടനയില്‍ തുടര്‍ന്നു. കാസര്‍കോട് എഡിഎം ആയിരുന്നപ്പോഴാണ് തെരഞ്ഞെടുപ്പിന്‍റെ ഭാഗമായി നവീന്‍ ബാബുവിനെ കണ്ണൂരിലേക്ക് സ്ഥലം മാറ്റിയത്. തെരഞ്ഞെടുപ്പ് കഴിഞ്ഞ് നേരത്തേ സ്ഥലം മാറ്റപ്പെട്ടവരെയെല്ലാം തിരികെ മാറ്റിയെങ്കിലും നവീനെ മാത്രം മാറ്റിയില്ല.
കണ്ണൂരില്‍ ഒരു വിഭാഗം സിപിഎം പ്രവര്‍ത്തകര്‍ക്ക് പ്രിയങ്കരനായിരുന്നു അദ്ദേഹം. എന്നാല്‍ പാര്‍ട്ടിയിലെ വിഭാഗീയത മൂലം മാനസിക സമ്മര്‍ദം ഏറിയതോടെ അദ്ദേഹം നാട്ടിലേക്ക് സ്ഥലം മാറ്റം ചോദിച്ചു. വിരമിക്കാന്‍ ഏഴ് മാസം മാത്രമുള്ളപ്പോഴായിരുന്നു ഇത്. അദ്ദേഹത്തെ കണ്ണൂരില്‍ നിന്ന് വിടാന്‍ സിപിഎമ്മിലെ ഒരു പറ്റം നേതാക്കള്‍ക്ക് മടിയായിരുന്നു. വളരെയധികം സമ്മര്‍ദം ചെലുത്തിയാണ് പത്തനംതിട്ട എഡിഎമ്മായി സ്ഥലം മാറ്റം വാങ്ങിയത്.
കണ്ണൂരില്‍ നിന്ന് യാത്രയയപ്പ് കഴിഞ്ഞ് മടങ്ങിയെത്തുന്ന നവീന്‍ ബാബുവിന് വേണ്ടി ഭാര്യ കാത്തിരിക്കുമ്പോഴാണ് മരണ വാര്‍ത്ത എത്തുന്നത്. ഇതോടെ നവീനിന്‍റെ മലയാലപ്പുഴയിലെ വീട്ടിലേക്ക് നാട്ടുകാരുടെ പ്രവാഹമായി.
നവീൻ ബാബു സാറിന്‍റെ മരണ വാർത്ത അറിഞ്ഞപ്പോൾ വിശ്വസിക്കാൻ കഴിഞ്ഞില്ലെന്ന് കാസർകോട് നിന്നുള്ള മുന്‍ സഹപ്രവര്‍ത്തക വത്സല. അദ്ദേഹം അഴിമതി നടത്തുമെന്ന് കരുതുന്നില്ലെന്നും അവര്‍ പറഞ്ഞു. തന്‍റെ കീഴിലുള്ള സഹപ്രവർത്തകാരോട് സ്നേഹത്തോടെ അല്ലാതെ പെരുമാറുന്നത് കണ്ടിട്ടില്ല. ഇതുവരെ അദ്ദേഹത്തിന് എതിരെ ഇങ്ങനെ ആരോപണം ഉണ്ടായിട്ടില്ലെന്നും വത്സല ഇടിവി ഭാരതിനോട്‌ പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
2016 മുതൽ അദ്ദേഹം കാസർകോട് ഉണ്ടായിരുന്നു. തെരഞ്ഞെടുപ്പ് സമയത്തൊക്കെ മികച്ച പ്രവർത്തനം ആയിരുന്നു. അദ്ദേഹത്തിന്‍റെ ഭാര്യയും ജില്ലയിൽ ഉണ്ടായിരുന്നു. ഉയർന്നുവരുന്ന ആരോപണങ്ങളോട് യോജിക്കാൻ പറ്റില്ല. കാരണം അദ്ദേഹത്തെ അത്രയും അടുത്ത് അറിയാം.
അങ്ങനെ എന്തെങ്കിലും ഉണ്ടായിട്ടുണ്ടെങ്കിൽ ദിവ്യയ്ക്ക് വിജിലൻസിനെ സമീപിക്കാമായിരുന്നു. അല്ലെങ്കിൽ മുഖ്യമന്ത്രിയുടെ നാടല്ലേ അവരോട് പറയാമായിരുന്നുവെന്നും വത്സല കൂട്ടിച്ചേര്‍ത്തു.
ഇന്ന് (ഒക്‌ടേബര്‍ 15) രാവിലെയാണ് കണ്ണൂർ എഡിഎം നവീൻ ബാബുവിനെ വീടിനുള്ളില്‍ മരിച്ച നിലയിൽ കണ്ടെത്തിയത്. കണ്ണൂരിൽ നിന്നും സ്വന്തം നാടായ പത്തനംതിട്ടയിലേക്ക് സ്ഥലം മാറ്റം ലഭിച്ച അദ്ദേഹം പത്തനംതിട്ടയിലേക്ക് പോകാനിരിക്കെയാണ് ജീവനൊടുക്കിയത്. എന്നാൽ ഇന്ന് രാവിലത്തെ ട്രെയിനിൽ കയറിയില്ലെന്ന് കണ്ട് ബന്ധുക്കൾ കണ്ണൂരിൽ വിവരമറിയിക്കുകയായിരുന്നു.
താമസ സ്ഥലത്ത് പരിശോധിച്ചപ്പോഴാണ് വീട്ടിൽ ആത്മഹത്യ ചെയ്‌ത നിലയിൽ കണ്ടെത്തിയത്. എഡിഎം നവീൻ ബാബുവിനെതിരെ ജില്ല പഞ്ചായത്ത്‌ പ്രസിഡന്‍റ് ഇന്നലെ അഴിമതി ആരോപണം ഉന്നയിച്ചിരുന്നു. ഇന്നലെ എഡിഎമ്മിന്‍റെ യാത്രയയപ്പ് യോഗത്തിൽ വച്ചാണ് ക്ഷണിക്കാതെയെത്തിയ പിപി ദിവ്യ അഴിമതിയാരോപണമുന്നയിച്ചത്. ഇതിൽ മനംനൊന്താണ് ജീവനൊടുക്കിയതെന്നാണ് സൂചന.
Also Read: കണ്ണൂര്‍ എഡിഎം ആത്മഹത്യ ചെയ്‌ത നിലയില്‍; ജീവനൊടുക്കിയത് അഴിമതി ആരോപണത്തിന് പിന്നാലെ
