തൃശൂര്‍: ലോക്‌സഭ തെരഞ്ഞെടുപ്പ് പോരാട്ടത്തിൻ്റെ വാശിയേറിയ പരസ്യ പ്രചാരണത്തിന് സമാപനം. ഇനി നിശബ്‌ദ പ്രചാരണത്തിൻ്റെ മണിക്കൂറുകളിലേക്കാണ് കടക്കാനിരിക്കുന്നത്. തൃശൂർ സ്വരാജ് റൗണ്ടിൽ മൂന്ന് മുന്നണികളുടെയും പരസ്യ പ്രചാരണത്തിൻ്റെ അവസാന ലാപ്പിൽ പ്രവർത്തകരുടെ ആവേശം പ്രകടനം അരങ്ങേറി.
ഒന്നരമാസം നീണ്ടു നിന്ന വാശിയേറിയ തെരഞ്ഞെടുപ്പ് പ്രചാരണത്തിനാണ് ഇന്ന് സമാപനമായത്. പരസ്യ പ്രചാരണത്തിൻ്റെ അവസാന ലാപ്പിൽ ജില്ലാ കേന്ദ്രത്തിൽ മുന്നണികളുടെ പ്രകടനം ആവേശം അലതല്ലി. പരസ്യ പ്രചാരണത്തിൻ്റെ അവസാന നിമിഷങ്ങളിൽ സ്ഥാനാർഥികളും അരങ്ങു നിറഞ്ഞു നിന്നതോടെ പ്രവർത്തകർ നിറഞ്ഞാടി. തുറന്ന വാഹനങ്ങളിലെത്തിയ സ്ഥാനാർഥികൾ പ്രവർത്തകരുടെ ആവേശത്തിനൊപ്പം നിന്നു.
യുഡിഎഫ്- എൽഡിഎഫ് മുന്നണി സ്ഥാനാർഥികളായ കെ മുരളീധരനും വിഎസ് സുനിൽകുമാരും രാഷ്‌ട്രീയ അഭിവാദ്യം സ്വീകരിച്ചു മുന്നേറിയപ്പോൾ എൻഡിഎ സ്ഥാനാർഥി സുരേഷ് ഗോപി ഒരു പടി കടന്ന് ഒരു ഡാൻസ് തന്നെ കളിച്ച് പ്രവർത്തകരെ ഇളക്കി മറിച്ചു.
വരുന്ന 48 മണിക്കൂ‍ർ ഇനി വോട്ടുകൾ ഉറപ്പിക്കാനുള്ള നിശബ്‌ദ പ്രചാരണ കാലമാണ്. ഒന്നരമാസത്തെ തിരക്കിട്ട പ്രചാരണം കഴിഞ്ഞു സ്ഥാനാർഥികൾക്ക് അല്‌പം വിശ്രമം ലഭിക്കുമെങ്കിലും പാർട്ടി പ്രവർത്തകർക്ക് ഇനി നിർണ്ണായക ദിവസങ്ങളാണ്.
